ខេត្តកំពង់ធំ ៖ បទល្មើសនេសាទបានកើតឡើងពេញបន្ទុកស្របពេលដែលមន្ត្រីជលផលមួយចំនួនធំ កំពុងតែរងចាំមើលការតែងតាំងនាយខណ្ទរដ្ឋបាលជលផលថ្មី ។
ដូចរង់ចាំអ៊ុតគ្រប់អាប៉ោង ដោយមានមាត់ចាបមាត់ព្រាប ទស្សន៍ទាយដូចហោរ៉ាគ្មានក្បួន ថាអ្នកនេះឡើង អ្នកនោះឡើង បែបជាមេឈ្មួញបង្កើតបទល្មើសបានកើតឡើងពេញបន្ទុក ដែលត្រូវបានគេដឹងថា លោក ស៊ិន សុភី នាយសង្កាត់រដ្ឋបាលជលផលឃុំផាត់សណ្តាយ បានឃុបឃិតជាមួយអ្នកដាក់បទល្មើសពេញផ្ទៃទឹក ។
ជាក់ស្តែងបទល្មើសនេសាទ ដែលបានបំផ្លាញធនធានមឆ្ឆាជាតិ បានលើកឡើងដូចជា របាំងរាប់រយ លុក មានទាំងសាច់សារ៉ូ សាច់ក្រហម សាច់ខៀវ អ៊ួនក្រឡាញឹកពាសពេញផ្ទៃបឹងទន្លេសាប ក្នុងឃុំផាត់សណ្ដាយស្រុក កំពង់ស្វាយ ខេត្តកំពង់ធំ ដែលត្រូវបានគេដឹងថា ប្រព័ន្ឋឃុបឃិតគ្នានេះ ត្រូវបានអនុវត្តជារៀងរាល់ឆ្នាំ ជាមួយថៅកែទិញត្រី ឈ្មោះ ចែអ៊ី ប្រពន្ឋលោក ហេង មនោ មេឃុំផាត់សណ្តាយ ។
យោងតាមសេចក្តីរាយការណ៍ ពីប្រជានេសាទបានបញ្ជាក់ច្បាស់ថា បានបង់លុយជូននាយសង្កាត់ នាយផ្នែក ដែលជាថ្នូរមិនបង្ក្រាបបទល្មើស នៅចំណុចជ្រោយវាលវែង មកដល់ដងទង់ គឺមានឈ្មោះ កងស៊ី ជាអ្នកដាក់បទល្មើសខ្នាតធំជាងគេរាប់ និងជាអ្នកប្រមូលលុយឲ្យសមត្ថកិច្ចជំនាញ និងស្ថាប័នក្នុងក្របខណ្ទ និងក្រៅក្របខណ្ទ។
មិនតែប៉ុណ្ណោះលោកស៊ិន សុភី នាយសង្កាត់ បានអនុញ្ញាតឲ្យ ចែអ៊ី ប្រពន្ឋលោកហេង មនោ មេឃុំផាត់សណ្តាយ ដាក់បទល្មើសជាង១០ទូកនៅចំនុចក្រឡុកបាយក្អែក ចំណុចមាត់បាយចេស ឡើងមកខាងលិចរហូតដល់មកទ្ធារបឹង គឺមានឈ្មោះ សឺង ឈ្មោះ លាន ឈ្មោះ ថា ឈ្មោះ ឃឿនលើ ឈ្មោះ លាង ឈ្មោះ ស៊ង ឈ្មោះ អ៊ូក ឈ្មោះ ហ៊ាង ឈ្មោះ ថាធា ឈ្មោះ ទី និងឈ្មោះឆេង ដាក់វែងជាងគេនៅចំណុចបាទាល់ បាកោង ។
សូមបញ្ជាក់ថា អ្នកប្រព្រឹត្តបទល្មើសនេសាទទាំងអស់ បានរួមគ្នាកសាងប្រព័ន្ឋសុវត្តិភាព ជាមួយជំនាញរដ្ឋបាលជលផល ទាំងផ្នែក ទាំងសង្កាត់ ដើម្បីរួមគ្នាបំផ្លាញធនធានមច្ឆាជាតិជារៀងរាល់ឆ្នាំ បានធ្វើអោយមច្ឆាជាតិទាំងតូចទាំងធំរលាយបាត់អស់បន្តិចម្ដងបន្តិចម្ដងរហូតផុតពូជក៏ថាបាន សូម្បីតែឡូត៍អភិរក្សសម្រាប់ទុកពូជត្រីអោយពងកូនក៏គ្មានត្រីដែរ រហូតដល់ថ្នាក់ ប្រជាពលរដ្ឋយល់ថា ថៅកែឡូត៍នៅលើផ្ទៃបឹងទន្លេសាប បច្ចុប្បន្នគឺជាជំនាញជលផលហ្នឹងហើយ ។
ទាក់ទិនទៅនិងបញ្ហាចោទប្រកាន់ថា លោកនាយសង្កាត់ ផាត់សណ្តាយ បានបណ្តែតបណ្តោយ មិនខ្វល់និងការបង្ក្រាប និងខ្វល់និងការវិនាសធនធានមឆ្ឆាជាតិនេះ គឺអង្គភាពសារព័ត៌មាន បានព្យាយាមធ្វើការទំនាក់ទំនង តែទូរស័ព្ទពុំអាចទាក់ទងបាន ក្នុងនោះក៏មានការសំណូមពរ ពីសំណាក់បងប្អូនប្រជាពលរដ្ឋថា សុំឲ្យអភិបាលខេត្តកំពង់ធំដែលជាគណ:បញ្ជាការឯកភាពខេត្តទទួលបន្ទុកបង្ក្រាបបទល្មើសធនធានធម្មជាតិនិងបទល្មើសនេសាទ ជួយការពារធនធានមច្ឆាជាតិ ដើម្បីការពារឲ្យត្រីពងកូនក្នុងរដូវបិទនេសាទនេះផង ៕
អង្គភាពយើងខ្ញុំរងចាំការបកស្រាយពីសាមីពាក់ព័ន្ធរៀងរាល់ម៉ោងធ្វើការ
