ភ្នំពេញ ៖ នាថ្ងៃទី០២ ខែកញ្ញា ឆ្នាំ២០២១ លោក ហ៊ុន ម៉ានី និងក្រុមការងារបានបន្តជួបសំណេះសំណាលសួរសុខទុក្ខ និងនាំយកអំណោយជូនកងរាជអាវុធហត្ថនៃបញ្ជាការដ្ឋានកងរាជអាវុធហត្ថរាជធានីភ្នំពេញ ដោយមានការទទួលបដិសណ្ឋារកិច្ចពីសំណាក់ឧត្តមសេនីយ៍ឯក រ័ត្ន ស្រ៊ាង មេបញ្ជាការកងរាជអាវុធហត្ថរាជធានីភ្នំពេញ និងមន្ត្រីកងរាជអាវុធហត្ថជាច្រើនរូប។
សម្ភារៈដែលត្រូវប្រគល់ជូននាពេលនោះរួមមានអង្ករចំនួន ១២,៥ តោន ត្រីខចំនួន១៣៧ កេស អាវភ្លៀងចំនួន ៨០០ អាវ កូកាកូឡាចំនួន២០០ កេស ទឹកបាញ់សម្លាប់មេរោគចំនួន២ ធុង វីតាមីន C ចំនួន៥ កេស និងកញ្ចប់ថវិការមួយចំនួនផងដែរ។
ថ្លែងក្នុងឱកាសនោះ លោក ហ៊ុន ម៉ានី បានធ្វើការកោតស្ញប់ស្ញែងនូវការលះបង់កម្លាំងកាយចិត្តរបស់បងប្អូនកងរាជអាវុធហត្ថទាំងអស់ដើម្បីរួមចំណែកក្នុងការការពារសន្តិភាព សន្តិសុខ និងសុខសុវត្ថិភាពរបស់បងប្អូនប្រជាពលរដ្ឋមិនថាក្នុងកាលៈទេសៈបែបណាក៏ដោយ។ ជាពិសេស ក្នុងដំណាក់កាលនៃការឆ្លងរាលដាលនៃវីរុសកូវីដ–១៩ ដោយកងកម្លាំងបានខិតខំប្រឹងប្រែងបំពេញភារកិច្ចចំពោះមុខ និងមិនបានចាត់ទុកហានិភ័យនៃការឆ្លងជាឧបសគ្គឡើយ។
លោក ហ៊ុន ម៉ានី បន្តថា នៅពេលដែលយើងទាំងអស់គ្នាកំពុងតែជួបប្រទះការលំបាកដោយវិបត្តិកូវីដ–១៩ ប៉ុន្តែយើងពិតជាមានភព្វសំណាងដោយយើងទាំងអស់គ្នាទទួលបាននូវការការពារ និងភាពកក់ក្ដៅពីរាជរដ្ឋាភិបាលក្រោមការដឹកនាំប្រកបដោយភាពឈ្លៀសវៃរបស់សម្ដេចតេជោ។ ជាក់ស្ដែងការទទួលបានវ៉ាក់សាំងរបស់បងប្អូន និងក្រុមគ្រួសារព្រមទាំងការរក្សាប្រាក់បៀវត្ស និងការឧបត្ថម្ភផ្សេងៗបានបង្ហាញពីការយកចិត្តទុកដាក់ពីសំណាក់ប្រមុខរដ្ឋាភិបាល និងថ្នាក់ដឹកនាំគ្រប់ជាន់ថ្នាក់មកលើបងប្អូនកងកម្លាំងរបស់យើង។
សូមបញ្ជាក់ថា ជាបន្តបន្ទាប់ លោក ហ៊ុន ម៉ានី តែងនាំយកអំណោយទៅចែកជូនបងប្អូនកងកម្លាំងប្រដាប់អាវុធគ្រប់មុខសញ្ញា ដែលបានបង្ហាញពីការយកចិត្តទុកដាក់ និងខ្វាយខ្វល់ពីសុខទុក្ខរបស់បងប្អូនដែលជាអ្នកឈរជើងនៅជួរមុខក្នុងការការពារ និងជួយសង្គ្រោះប្រជាពលរដ្ឋជួបការលំបាក។
