ខេត្តប៉ៃលិន ៖ នៅរសៀលថ្ងៃទី១០ ខែសីហា ឆ្នាំ២០២១នេះ ឯកឧត្តម ឧត្តមសេនីយ៍ឯក ហ៊ុន ម៉ាណែត អនុប្រធា នគណៈប្រតិបត្តិ នៃគណៈកម្មការអន្តរក្រ សួងប្រយុទ្ធនឹងជំងឺកូវីដ-១៩ ទទួលបន្ទុកអនុគណៈ កម្មការបច្ចេកទេស និងព្យាបាលនិងក្រុមការងារ អមដំណើរដោយឯកឧត្តម សៅ សារ៉ាត់តំណាងរាស្ត្រមណ្ឌលប៉ៃលិន លោកជំទាវ បាន ស្រីមុំ អភិបាល នៃគណៈអភិបាលខេត្តប៉ៃលិន ក្រុម ការងារសុខាភិបាល អញ្ជើញចុះពិនិត្យមើលនិងរៀបចំសាងសង់មណ្ឌលព្យាអ្នកជំងឺកូវីដ-១៩កម្រិតស្រាលជាច្រើនទីតាំងទៀត នៅក្នុងខេត្តប៉ៃលិន ដើម្បីត្រៀមបំរុងសម្រាប់ទទួលបងប្អូនពលករ ដែលវិលត្រលប់ពីប្រទេសថៃ ដែលមានវិជ្ជមានកូវីដ-១៩។
ក្នុងដំណើរអញ្ជើញ ដឹកនាំគណៈប្រត្តិភូចុះពិនិត្យនោះដែរឯកឧត្តម ឧត្តមសេនីយ៍ឯក ហ៊ុន ម៉ាណែត ក៏ជម្រុញដល់ ថ្នាក់ដឹកនាំខេត្ត ក៏ដូចជាក្រុមការងារសាងសង់ ត្រូវពន្លឿនដំណើរការសាងសង់ ឲ្យបានឆាប់រួចរាល់ ដើម្បីដាក់ដំណើការព្យាបាលជូនអ្នកជំងឺកូវីដ-១៩។
ទន្ទឹមនោះឯកឧត្តម ក៏បានថ្លែងការកោតសរសើរចំពោះថ្នាក់ដឹកនាំខេត្ត ជាពិសេសលោកជំទាវ បាន ស្រីមុំ អភិបាលនៃគណ:អភិបាលខេត្តប៉ៃលិន ដែលជាថ្នាក់ដឹកនាំជាស្ត្រីដ៏ឆ្នើមឈ្លៀសវៃក្នុងការដឹកនាំ មន្ត្រីរាជការ កងកម្លាំង ដែលកន្លងមកបានខិតខំយ៉ាងសស្រាក់សស្រាំក្នុងយុទ្ធនាការប្រយុទ្ធប្រឆាំងជំងឺកូវីដ-១៩ ដែលយើងត្រូវតែរួបរួមគ្នា ដើម្បីទប់ស្កាត់ ឲ្យបាននូវការឆ្លងរាលដាលជំងឺកូវីដ-១៩ ចូលក្នុងសហគមន៍ ពិសេសប្រភេទបំប្លែងថ្មី Delta ដែល វាមានលទ្ធភាពចម្លងលឿន នឹងគ្រោះថ្នាក់ធ្ងន់ធ្ងរបើសិនយើងព្យាបាលមិនបានទាន់ពេលវេលា។
សូមបញ្ជាក់ថាបច្ចុប្បន្ននៅទូទាំងខេត្តប៉ៃលិនមាន មណ្ឌលចត្តាឡីស័កចំនួន៦ទីតាំងនិងមណ្ឌលព្យាបាលអ្នកជម្ងឺកូវិដ.១៩ មានចំនួន០២ទីតាំងនិងត្រៀមមណ្ឌលព្យាបាល និងមណ្ឌលចត្តាឡីស័កខ្នាតធំអាចដាក់មនុស្សបានរហូតដល់៤ពាន់ ទៅ៦នាក់ចំនួន០២ទីតាំងទៀត គឺមួយទីតាំងសំរាប់ព្យាបាល និងមួយទីតាំងទៀតសំរាប់ធ្វើចត្តាឡីស័កទាំងពីរកន្លែងនេះ ស្ថិតនៅស្រុកសាលាក្រៅ ខេត្តប៉ៃលិន ដើម្បីត្រៀមទទួលពលករដែលមកពីក្រៅប្រទេស។
ហើយរហូតមកដល់ថ្ងៃទី១០ ខែសីហា ឆ្នាំ២០២១នេះ ខេត្តប៉ៃលិនបានទទួលពលករមកពីប្រទេសថៃ ហើយកំពុងធ្វើចត្តាឡីស័កមាន ចំនួន២២៩៦នាក់កំពុងព្យាបាលមានចំនួនជាង១ពាន់នាក់ និងគ្រោងទទួលពលករបន្ថែមទៀតដោយអនុវតន៍តាមអនុសាសន៍ របស់ប្រមុខរាជរដ្ឋាភិបាល ឲ្យពួកគាត់ធ្វើចត្តាឡីស័កនៅ ខេត្តប៉ៃលិនពេញមួយសប្តាហ៍ ទើបដឹកពួកគាត់ត្រឡប់ទៅតាមខេត្តរៀងៗខ្លួនវិញ៕
