(ខេត្តកែប)៖ ការធ្វើតេស្តរហ័យ ពិនិត្យសំណាករកមេរោគកូវីដ-១៩ នៅផ្សារក្តាម ភូមិកែប សង្កាត់កែប ក្រុង/ខេត្តកែប ចាប់ពីវេលាម៉ោង៨ព្រឹក ថ្ងៃទី០៥ ខែសីហា ឆ្នាំ២០២១ រហូតដល់វេលាម៉ោង១១ព្រឹក ថ្ងៃដដែលនេះ ក្នុងចំណោមពលរដ្ឋជាង១០០នាក់ ដែលមកពិនិត្យ លទ្ធផលគឺ អវិជ្ជមានទាំងអស់។
នេះជាការឆ្លើយតបភ្លាមៗពីប្រមុខដឹកនាំខេត្តកែប គឺ ឯកឧត្តម សោម ពិសិដ្ឋ ក្នុងឱកាសដឹកនាំសហការី និងក្រុមករងារ ចុះត្រួតពិនិត្យ ការធ្វើតេស្តរហ័យដើម្បីពិនិត្យសំណាក រកមេរោគកូវីដ-១៩ ជូនដល់ពលរដ្ឋ និងអាជីវករនៅចំណុចផ្សារក្តាមស្ថិតក្នុងភូមិថ្មី សង្កាត់កែប ក្រុង/ខេត្តកែប ដែលមានចំនួនជាង១០០នាក់ នៅព្រឹកថ្ងៃទី០៥ ខែសីហា ឆ្នាំ២០២១នេះ។
សូមជម្រាបដែរថា ដើម្បីធានានូវវិធានការសុវត្ថិភាពសង្គម ស្របតាមគោលការណ៍ណែនាំរបស់រាជរដ្ឋាភិបាល និងក្រសួងពាក់ព័ន្ធ ក្នុងការទប់ស្កាត់ការឆ្លងរាលដាលនៃជំងឺកូវីដ-១៩ ក្នុងសហគមន៍ រដ្ឋបាលខេត្តកែបសូមដាក់ចេញនូវវិធានការដ៏ម៉ឺងម៉ាត់ ដោយតម្រូវឱ្យពលរដ្ឋ និងអាជីវករទាំងអស់ ក្នុងខេត្តកែប ទៅធ្វើតេស្តរហ័សរកមេរោគកូវីដ-១៩ ដែលបានរៀបចំតាមផ្សារនិមួយៗ ចាប់ពីថ្ងៃទី០៥ រហូតដល់ថ្ងៃទី១៣ ខែសីហា ឆ្នាំ២០២១ ចាប់ពីវេលាម៉ោង៨ព្រឹក រហូតដល់ម៉ោង១៦ តទៅ ស្ថិតនៅទីតាំងផ្សារនិមួយៗ ។ព័ត៌មានលម្អិតសូមអានតាមសេចក្តីជូនដំណឹងរបស់រដ្ឋបាលខេត្តកែប៕ សេង ណារិទ្ធ
