កំពង់ឆ្នាំង ៖ លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ ប្រធានក្រុមការងារថ្នាក់កណ្តាលគណបក្សប្រជាជនកម្ពុជាចុះមូលដ្ឋានក្រុងកំពង់ឆ្នាំង រួមដំណើរដោយ ឯកឧត្តម ស៊ុន សុវណ្ណារិទ្ធិ អភិបាលបាលខេត្តកំពង់ឆ្នាំង និង ជាប្រធានគណបក្សប្រជាជនកម្ពុជាខេត្តកំពង់ឆ្នាំង ព្រមទាំង ក្រុមការងារថ្នាក់កណ្តាល ថ្នាក់ខេត្ត ក្រុង សង្កាត់ បាននាំយកទៀនព្រះវស្សា ទេយ្យវត្ថុ និង បច្ច័យវេរប្រគេនព្រះសង្ឃគង់ចាំព្រះវស្សានៅវត្តចំនួន១០វត្ត ក្នុងក្រុងកំពង់ឆ្នាំង ខេត្តកំពង់ឆ្នាំង នៅថ្ងៃទី២៤ ខែកក្កដា ឆ្នាំ២០២១ ។
លោកជំទាវ ជូ ប៊ុនអេង បានមានប្រសាសន៍ថាៈការអភិវឌ្ឍ របស់ប្រទេសកម្ពុជានាពេលបច្ចុប្បន្ននេះមិនអាចកាត់ផ្តាច់ចេញពីព្រះពុទ្ធសាសនានោះឡើយមានន័យថាការអភិវឌ្ឍប្រកបដោយនិរន្តរភាពគឺផ្អែកទៅលើកត្តាដាក់ចេញនូវយុទ្ធ
សាស្ត្រចក្ខុវិស័យ និងគោលនយោបាយឈ្នះឈ្នះ ក្នុងនោះ ត្រូវក៏មានការចូលរួមពីពុទ្ធសាសនាដោយបណ្ដុះសីលធម៌ សតិបញ្ញា ស្មារតីការគោរពដឹងគុណនិងការបណ្ដុះបណ្ដាលធនធានមនុស្សតាមបែបពុទ្ធសាសនា។
លោកជំទាវ បានមានប្រសាសន៍បន្តថាៈព្រះពុទ្ធសាសនា បានដើរតួយ៉ាងសំខាន់នៅក្នុងសង្គមរបស់យើងជាយូរលង់ណាស់មកហើយ ប៉ុន្ដែត្រូវបានបំផ្លិចបំផ្លាញទាំងស្រុងក្នុងរបបកម្ពុជាប្រជាធិបតេយ្យ សម័យប៉ុល ពត សម័យប្រល័យពូជសាសន៍ ពោលគឺសិទ្ធិគោរពជំនឿ សិទ្ធិអ្វីគ្រប់បែបយ៉ាងរបស់ប្រជាជនសម័យកាលនោះគឺត្រូវបានបំបិទទាំងអស់ ។ ដូច្នេះ ក្រោមម្លប់សន្ដិភាពតាមរយ:នយោបាយឈ្នះឈ្នះក្រោម ការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រីនិងជាប្រធានគណបក្សប្រជាជនកម្ពុជាប្រទេសកម្ពុជាមានការអភិវឌ្ឍលើគ្រប់វិស័យទាំងផ្លូវពុទ្ធចក្រ និងអាណាចក្រ។
លោកជំទាវ ជូ ប៊ុនអេង ក៏បានអំពាវនាវប្រគេនដល់ព្រះសង្ឃ អាជ្ញាធរដែនដី បងប្អូនប្រជាពុទ្ធបរិស័ទ សូមបន្តចូលរួមធ្វើអនាម័យជាប្រចាំដោយអនុវត្តតាមការណែនាំរបស់ក្រសួងសុខាភិបាលនិងអនុសាសន៍របស់ប្រមុខរាជរដ្ឋាភិបាលគឺ៣ការពារ និង៣កុំ អោយបានត្រឹមត្រូវ និងត្រូវអនុវត្តអោយបានម៉ឺងម៉ាត់នូវវិធានការបង្ការ ការពារ និងទប់ស្កាត់ ការរីករាលដាលនៃជំងឺCOVID-១៩ នៅក្នុងមូលដ្ឋានរបស់ខ្លួន និងត្រូវបន្តចូលរួម រិតបន្តឹងបញ្ហាសន្តិសុខ សុវត្ថិភាព សណ្ដាប់
ធ្នាប់សាធារណៈ កែលំអសោភ័ណភាពទីអារាម ភូមិស្ថានគ្មានល្បែងស៊ីសង ក្រុមក្មេងទំនើង ខិតខំដោះស្រាយបញ្ហាគ្រឿង
ញៀន គ្រោះថ្នាក់ចរាចរណ៍ បទល្មើសគ្រប់រូបភាព ដើម្បីឲ្យភូមិឃុំមានសុវត្ថិភាព ។
លោកជំទាវ ជូ ប៊ុនអេង និង ឯកឧត្តម ស៊ុន សុវណ្ណារិទ្ធិ ព្រមទាំងក្រុមការងារបានប្រគេននូវទេយ្យវត្ថុដល់ព្រះសង្ឃដែលគង់ចាំព្រះវស្សា ចំនួន១០ វត្ត ក្នុងមួយវត្តៗ ទទួលបាន ទៀនព្រះវស្សា ០១ គូ, អង្ករ១០០ គីឡូក្រាម,ទឹកសុទ្ធ០២ កេស, ភេសជ្ជៈ ០២ កេស,មី ០២ កេស,ត្រីខ ០២ យួរ,ទឹកត្រី០២ យួរ,ទឹកស៊ីវអ៊ីវ០២ យួរ,បច្ច័យបួន១៥មុឺនរៀលនិងបច្ច័យកសាង១លានរៀលផងដែរ៕
