ចេញផ្សាយដោយអង្គភាពប្រភពនៃព័ត៌មានសម្រាប់ ថ្ងៃសៅរ៍ ១៥ កើត ខែទុតិយាសាឍ ឆ្នាំឆ្លូវត្រីស័ក ពុទ្ធសករាជ ២៥៦៥ ដែលត្រូវនឹងថ្ងៃទី ២៤ ខែកក្កដា ឆ្នាំ២០២១
ខេត្តបន្ទាយមានជ័យ ៖ ដោយមានការណែនាំពីលោកឧត្តមសេនីយ៍ទោសិទ្ធិ ឡោះ ស្នងការនគរបាល ខេត្តបន្ទាយមានជ័យ និងមានការអនុវត្តដ៏ម៉ឺងម៉ាត់ពីរកម្លាំងនៃវរះនគរបាលការពារព្រំដែនលេខ ៩១១ ប៉ុស្ដិ៍បឹងសាគូ សហការជាមួយនិងកម្លាំងយោធាកងពលលេខ ៥១ បានតាមរកមុខសញ្ញាមេខ្យល់រត់ពន្ធមនុស្សខុសច្បាប់ពីរនាក់ ធ្វើការឃាត់ខ្លួន កាលពីវេលាម៉ោង ៤ និង ៣០ នាទី ទៀបភ្លឺព្រឹកថ្ងៃទី ២៤ ខែកក្កដាឆ្នាំ ២០២១ នេះខណៈពួកគេកំពុងព្យាយាមលួចធ្វើសកម្មភាពនាំមនុស្សឆ្លងដែនខុសច្បាប់ចេញពីទឹកដីថៃមកប្រទេសកម្ពុជា វិញ។ នេះបើយោងតាមប្រភពព័ត៌មានពីរលោកវរសេនីយ៍ត្រី រស់ ពិសិដ្ឋ នាយប៉ុស្តិ៍នគរបាលការពារព្រំដែនបឹងសាគូ បានឲ្យដឹងថាជនសង្ស័យដែលត្រូវបានចាប់ខ្លួនមានឈ្មោះ
១ឈ្មោះ ឡូញ ឡែម ភេទប្រុស អាយុ ២៩ ឆ្នាំ រស់នៅភូមិចាន់គីរី សង្កាត់ប៉ោយប៉ែតក្រុងប៉ោយប៉ែត ខេត្តបន្ទាយមានជ័យ ។ ២ឈ្មោះ សាន សំណាង ភេទប្រុស អាយុ ៣៥ ឆ្នាំ ។
លោកនាយប៉ុស្តិ៍បានបន្តថា ជនសង្ស័យទាំង២នាក់ ត្រូវបានចាប់ខ្លួននៅចំណុចមុខកាស៊ីណូDNA ក្នុងភូមិក្បាលស្ពាន1 សង្កាត់ប៉ោយប៉ែត ក្រុងប៉ោយប៉ែតខេត្តបន្ទាយមានជ័យ និងដកហូតបានវត្ថុតាងដូចជា ទូរស័ព្ទដៃ១គ្រឿង មានសារជាសម្លេងឆ្លើយឆ្លងគ្នា រវាងមេខ្យល់ខ្មែរនិងមេខ្យល់នៅខាងថៃចាំទទួលមនុស្សនៅខាងក្រោយផ្សារឡុងក្លឿ(ប្រទេសថៃ) និងម៉ូតូ១គ្រឿង ម៉ាកហុងដា C125 ផលិតឆ្នាំ២០១៩ពណ៌ខ្មៅ គ្មានស្លាកលេខ។
បច្ចុប្បន្នជនសង្ស័យមេខ្យល់ទាំងពីរនាក់ត្រូវបានបញ្ជូនទៅកាន់អធិការដ្ឋាននគរបាលក្រុងប៉ោយប៉ែត ដើម្បីបន្តនីតិវិធី ៕ដោយសហការី
