កាលពីថ្ងៃទី១៩ ខែកក្កដា ឆ្នាំ២០២១ វេលាម៉ោង១៧និង២០នាទី នៅចំណុចក្រុមទី១៧ ភូមិអូរខ្ជាយ ឃុំអូរដំបង ១ ស្រុកសង្កែ ខេត្តបាត់ដំបង អនុវត្តតាមយោបល់របស់លោកឧត្ដមសេនីយ៍ទោ សាតគឹមសាន ស្នងការនៃស្នងការដ្ឋាននគរបាលខេត្តបាត់ដំបង ក៏ដូចជាយោបល់របស់លោកវរសេនីយ៍ឯកលឹម ពុទ្ធីឡា ស្នងការរងផែនការងារនគរបាលព្រហ្មទណ្ឌ និងដោយមានការសម្របសម្រួលលើនីតិវិធីពីឯកឧត្តម កែវ សុជាតិ ព្រះរាជអាជ្ញានៃអយ្យការអមសាលាដំបូងខេត្តបាត់ដំបង លោកវរសេនីយ៍ឯក ឈឿង គឹមសុង នាយការិយាល័យនគរបាលព្រហ្មទណ្ឌកម្រិតស្រាលបានដឹកនាំកម្លាំងក្រុមអន្តរាគមន៍បង្ការបង្ក្រាបសហការជាមួយកម្លាំងអធិការដ្ឋាននគរបាលស្រុកសង្កែចុះប្រតិបត្តិការបង្ក្រាបករណីហិង្សា ដោយចេតនាមានស្ថានទម្ងន់ទោស និងធ្វើឱ្យខូចខាតដោយចេតនាមានស្ថានទម្ងន់ទោស (ប្រើប្រាស់កាំបិតកាប់) ០១ករណី ដែលករណីនេះ បាននាំខ្លួនជនសង្ស័យ០១នាក់ឈ្មោះ យឿន វ៉ាន់ថៃ ភេទប្រុសអាយុ១៨ឆ្នាំ មានទីលំនៅភូមិកំពង់ពិល ឃុំវត្តតាមឹម ស្រុកសង្កែ ខេត្តបាត់ដំបងធ្វើករសាកសួរ ហេីយតាមរយៈការសាកសួរនេះ នាវេលាម៉ោង១៩និង៣០នាទីថ្ងៃខែឆ្នាំដដែលនៅចំណុចផ្ទះរបស់ជនសង្ស័យឈ្មោះ យឿន វ៉ាន់ថៃ កម្លាំងសមត្ថកិច្ចបានធ្វើការនាំខ្លួនជនសង្ស័យចំនួន០៥នាក់បន្ថែមទៀតគឺ៖
១-ឈ្មោះ គេង សុថេត ភេទប្រុស អាយុ ១៧ ឆ្នាំ មានទីលំនៅ ភូមិ ទួលល្វៀង ឃុំ អូរដំបង ២ ស្រុក សង្កែ ខេត្ត បាត់ដំបង ។
២-ឈ្មោះ ម៉ៅ ប៊ុន យ៉ុង ភេទប្រុស អាយុ ២០ ឆ្នាំ មានទីលំនៅ ភូមិ ត្រាង ឃុំ អូរតាគី ស្រុក ថ្មគោល ខេត្ត បាត់ដំបង ។
៣-ឈ្មោះ ភណ្ឌ័ សំភេទ ភេទប្រុស អាយុ ១៥ ឆ្នាំ មានទីលំនៅ ភូមិ ត្រាង ឃុំ អូរតាគី ស្រុក ថ្ម គោល ខេត្ត បាត់ដំបង ។
៤-ឈ្មោះ រិ សារ៉ាក់ ហៅ ប៉ោត ភេទប្រុស អាយុ ១៧ ឆ្នាំ មានទីលំនៅ ភូមិ ត្រាង ឃុំ អូរតាគី ស្រុក ថ្ម គោល ខេត្ត បាត់ដំបង ។
៥-ឈ្មោះ វ័យ រ៉ាវីន ភេទប្រុស អាយុ ២០ ឆ្នាំ មានទីលំនៅ ភូមិ ត្រាង ឃុំ អូរតាគី ស្រុក ថ្មគោល ខេត្ត បាត់ដំបង ។
វត្ថុតាងដកហូតរួមមាន ៖
– កាំបិតខ្វែវដងដែកប្រវែង០១ម៉ែត្រចំនួន០១ដើម
-កាំបិតកែច្នៃដងឈើមុខស្រួចប្រវែង០១ម៉ែត្រចំនួន០១ដើម
-ម៉ូតូចំនួន០១គ្រឿងម៉ាកហុងដាឌ្រីមសេ១២៥ពណ៌ខ្មៅបាញ់ថ្នាំពណ៌ក្រហមស៊េរីឆ្នាំ២០១៦បិតតែមស៊េរីឆ្នាំ២០២១លេខតួ-ម៉ាស៊ីន9715284គ្មានស្លាកលេខ។
សូមជម្រាបជូនថា កាលពីថ្ងៃទី១៨ ខែកក្កដា ឆ្នាំ២០២១ វេលាម៉ោង១៦និង៣០នាទីនៅចំណុចតូបលក់ប្រហិតស្ថិតក្នុងភូមិភ្នំគល់ឃុំកន្ទឺស្រុកបាណន់ខេត្តបាត់ដំបងក្រុមជនសង្ស័យខាងលើរួមជាមួយបក្សពួកមួយចំនួនទៀតដែលកំពុងរត់គេចខ្លួនបានចូលរួមធ្វើសកម្មភាពយកកាំបិតខ្វែវកាប់ទៅលើជនរងគ្រោះឈ្មោះឈានសាឃីមភេទប្រុសអាយុ២០ឆ្នាំមានទីលំនៅភូមិភ្ជាវឃុំត្រែងស្រុករតនៈមណ្ឌលខេត្តបាត់ដំបងបណ្តាលឱ្យរងរបួសមុតរលាត់ស្បែកលើខ្នងចំនួន០៣កន្លែងនិងយកកាំបិតដុំថ្មកាប់នឹងគប់ទៅលើម៉ូតូរបស់ជនរងគ្រោះបណ្តាលឱ្យខូចខាតយ៉ាងដំណំ។
នៅក្រោយពេលកើតហេតុនិងបន្ទាប់ពីទទួលបានបណ្តឹងពីករណីនេះ ទើបសមត្ថកិច្ចធ្វើការ ស្រាវជ្រាវរហូតកំណត់មុខសញ្ញានិងឈានដល់ការឃាត់ខ្លួនបានជាបន្តបន្ទាប់តែម្តង។
បច្ចុប្បន្ន ការិយាល័យ ជំនាញ បានកសាងសំណុំរឿងដេីម្បីបញ្ជូនទៅសាលាដំបូងខេត្តបាត់ដំបងចាត់ការបន្តតាមនីតិវិធី-ច្បាប់៕
(រូបភាពផែនការ ងារនគរបាលព្រហ្មទ័ណ្ឌ/គឹមសុង)By kosal!@@@
