(ភ្នំពេញ)៖ នៅព្រឹកថ្ងៃអង្គារ ១២រោច ខែបឋមាសាឍ ឆ្នាំឆ្លូវ ត្រីស័ក ពុទ្ធសករាជ២៥៦៥ ត្រូវនឹងថ្ងៃទី០៦ ខែកក្កដា ឆ្នាំ២០២១ រដ្ឋបាលខណ្ឌដូនពេញ បានបើកកិច្ចប្រជុំពិនិត្យ ពិភាក្សា និងដោះស្រាយសំនួរ សំណើ និងសំណូមពរ របស់ប្រជាពលរដ្ឋដែលបានលើកឡើងក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សារាជធានីភ្នំពេញ អាណត្តិទី៣ ឆ្នាំ២០២១ ក្រោមអធិបតីភាព លោក សុខ ពេញវុធ អភិបាល នៃគណៈអភិបាលខណ្ឌដូនពេញ និងជាប្រធានគណៈបញ្ជាការឯកភាពរដ្ឋបាលខណ្ឌដូនពេញ តាមរយៈកម្មវិធី Zoom Meeting។
កិច្ចប្រជុំបានរៀបចំឡើងដើម្បីពិនិត្យមើល និងបន្តដោះស្រាយរាល់សេវាតម្រូវការ សំនួរ សំណើ និងសំណូមពរ របស់បងប្អូនប្រជាពលរដ្ឋយើង ដែលកំពុងជួបប្រទះក្នុងជីវភាពរស់នៅប្រចាំថៃ្ងពួកគាត់ ឲ្យបានចប់សព្វគ្រប់ តាមដំណាក់កាល តាមបច្ចេកទេស និងវិធានការជាក់ស្តែង សំដៅលើកស្ទួយសេដ្ឋកិច្ចគ្រួសារ សហគមន៍ តាមរយៈការផ្តល់ព័ត៌មានជាក់លាក់ពីសំណាក់ប្រជាពលរដ្ឋ ដើម្បីឲ្យអាជ្ញាធរមានវិធានការដោះស្រាយចំបញ្ហា និងចំគោលដៅដែលសហគមន៍ចង់បានផងដែរ៕
