ព្រះសីហនុ ៖ អនុវត្តន៍តាមគោលការណ៍ដឹកនាំដ៏ខ្ពង់ខ្ពស់របស់ លោកនាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការ កងរាជអាវុធហត្ថ លើផ្ទៃប្រទេស បានណែនាំដល់លោកមេបញ្ជាការ-រាជធានីខេត្ត ទាំង២៥ ត្រូវយកចិត្តទុកដាក់គិតគូរជួយដោះស្រាយចំពោះសុខទុក្ខ ការលំបាកក្នុងជីវភាពរស់នៅរបស់មន្ត្រីនិងគ្រួសារកងរាជអាវុធហត្ថក្រោមឱវាទ ដែលមានជំងឺប្រចាំកាយធ្ងន់ធ្ងន់ ខ្វះខាត មរណ:ភាព ចូលសោធននិវត្តន៍ ហើយនៅវេលាម៉ោង១០:០០នាទីព្រឹក ថ្ងៃចន្ទ ទី២១ ខែមិថុនា ឆ្នាំ២០២១ លោកឧត្តមសេនីយ៍ត្រី ហេង ប៊ុនទី មេបញ្ជាការ កងរាជអាវុធហត្ថខេត្តព្រះសីហនុ បានចាត់តំណាងឲ្យលោកឧត្តមសេនីយ៍ត្រី ខៀវ សំណាង មេបញ្ជាការរង កងរាជអាវុធហត្ថខេត្តព្រះសីហនុ និងលោកប្រធានមន្ទីររដ្ឋបាលនិងហិរញ្ញវត្ថុ ព្រមទាំងសហការី ចំនួន០៤នាក់ ជួបសំណេះសំណាល សួរសុខទុក្ខ និងប្រគល់ថវិកាមូនិធិមហាគ្រួសារកងរាជអាវុធហត្ថខេត្តព្រះសីហនុ ជូនដល់គ្រួសារកងរាជអាវុធហត្ថ និងអតីតសមាជិកកងរាជអាវុធហត្ថខេត្ត ដែលបច្ចុប្បន្នកំពុងជួបការលំបាក ខ្វះខាត ចំនួន ០៣ គ្រួសារ ។
ថវិកាមូនិធិមហាគ្រួសារកងរាជអាវុធហត្ថខេត្តព្រះសីហនុ ដែលគ្រួសារកងរាជអាវុធហត្ថ និងអតីតសមាជិកកងរាជអាវុធហត្ថខេត្ត ទទួលបាននាពេលនេះ បានមកពីការចូលរួមចំណែកដោយការស្ម័គ្រចិត្ត ឧបត្ថម្ភថវិកាតាមសទ្ធាចិត្តជ្រះថ្លារបស់ថ្នាក់ដឹកនាំ និងនាយទាហាន នាយទាហានរង នៃកងរាជអាវុធហត្ថខេត្តព្រះសីហនុ សរុបទឹកប្រាក់ចំនួន ១០.៣០០.០០០រៀល។
ក្នុងឱកាសនេះ គ្រួសារកងរាជអាវុធហត្ថ និងអតីតសមាជិកកងរាជអាវុធហត្ថខេត្ត បានថ្លែងអំណរគុណយ៉ាងជ្រាលជ្រៅចំពោះដ៏ល្អថ្លៃថ្លារបស់ លោកឧត្តមសេនីយ៍ត្រី មេបញ្ជាការកងរាជអាវុធហត្ថខេត្តព្រះសីហនុ ព្រមទាំងនាយទាហាន នាយទាហានរង នៃកងរាជអាវុធហត្ថខេត្តព្រះសីហនុ ដែលបានឧបត្ថម្ភថវិកាផ្ទាល់ខ្លួនជួយដោះស្រាយសម្រាលបន្ទុកនូវការលំបាកចំពោះមុខ និងសូមជូនពរដល់ថ្នាក់ដឹកនាំ នាយទាហាន នាយទាហានរង នៃកងរាជអាវុធហត្ថខេត្តព្រះសីហនុ ឱ្យជួបប្រទះតែពុទ្ធពរជ័យទាំង០៥ប្រការ និងទទួលបានការស្រលាញ់គាំទ្របន្ថែមទៀត ជាមួយនឹងភាពចម្រុងចម្រើនក្នុងអង្គភាព។
