(ខេត្តបន្ទាយមានជ័យ) ៖ នៅវេលាម៉ោង០៨:១៥នាទី ព្រឹកថ្ងៃពុធ ទី១៦ ខែមិថុនា ឆ្នាំ២០២១ កម្លាំងអធិការដ្ធាននគរបាលក្រុងប៉ោយប៉ែត សហការជាមួយកម្លាំងជំនាញខេត្តបាត់ដំបង ឃាត់ខ្លួនជនសង្ស័យបានចំនួន ៤ នាក់ ស្រី ១ នាក់ រួមជាមួយវត្ថុតាងសង្ស័យថា មានគ្រឿងញៀន ប្រមាណជិត ៤០ គីឡូក្រាមត្រូវបានបង្ក្រាបនៅក្រុងប៉ោយប៉ែត ។
លោក វរសេនីយ៍ទោ បោន សីហា អធិការស្ដីទីនគរបាល ក្រុងប៉ោយប៉ែត បានសហការ ចុះអនុវត្តតាមដីការបញ្ជាអោយចូល នៅចំណុចផ្ទះល្វែង១កន្លែង ដែលស្ថិតក្នុងភូមិផ្សារកណ្តាល សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ ជាទីតាំង ជនល្មើសស្នាក់នៅ លុះក្រោយមក កងកម្លាំងនគរបាលក្រុងប៉ោយប៉ែត បានសហការ ឆែកឆេរនៅក្នុងលំនៅដ្ឋានខាងលើ ត្រួតពិនិត្យឃើញមានវត្ថុតាងសង្ស័យ គ្រឿងញៀន ដែលមានការវេចខ្ចប់ដាក់សំបកកញ្ចប់តែ ដែលមានពណ៌ទឹកមាស មានរូបសញ្ញាផ្កាយ៥ ដើម្បីបំភាន់ភ្នែកមហាជន និង សមត្ថកិច្ច តាមការប៉ាន់ស្មាន ប្រហែលជា ជិត៤០គីឡូក្រាម សមត្ថកិច្ច ក៏ធ្វើការឃាត់ ខ្លួនជនសង្ស័យចំនួន៤នាក់ ក្នុងនោះមាន ស្រី១នាក់ជាជនជាតិថៃ រួមនិងវត្ថុតាង សង្ស័យគ្រឿងញៀន ។នាព្រឹកថ្ងៃដដែលនេះ ក្រោមការដឹកនាំនិងបញ្ជាផ្ទាល់ពី លោក ឧត្តមសេនីយ៍ទោ សិទ្ធិ ឡោះ ស្នងការ នគរបាល.ខេត្តបន្ទាយមានជ័យ អមដំណើរដោយ លោកឧត្តមសេនីយ៍ត្រី នូ ជីវ័ន្ត ស្នងការ រង ផែនការងារនគរបាលព្រហ្មទណ្ឌនិង លោក វរសេនីយ៍ទោ បោន សីហា អធិការស្ដីទី នគរបាល.ក្រុងប៉ោយប៉ែត បានបន្តដឹកនាំកងកម្លាំងនគរបាលមន្ត្រីជំនាញ សហការជាមួយសមត្ថកិច្ច ស្រុកម៉ាឡៃ ចុះ ស្រាវជ្រាវរុករក ទីតាំងមុខសញ្ញា រក្សាទុកគ្រឿងញៀន បានជាបន្តបន្ទាប់ ដែលស្ថិតនៅក្នុង ស្រុកម៉ាឡៃ ខេត្តបន្ទាយមានជ័យ ដែលជាបក្សពួក របស់ជនល្មើស ។
បច្ចុប្បន្ន ជនសង្ស័យ រួមទាំងវត្ថតាង ខាងលើកម្លាំងនគរបាលជំនាញ បានកសាងសំណុំរឿង បញ្ជួនទៅថ្នាក់លើ ចាត់ការទៅតាមនិតិវិធីច្បាប់ ៕
