យោងតាមបណ្តាញទំនាក់ទំនងសង្គមហ្វេសប៊ុក លោក ហែម ដារិទ្ធិ អភិបាលខណ្ឌពោធិ៍សែនជ័យ នាព្រឹកថ្ងៃទី១៧ ខែមិថុនា ឆ្នាំ២០២១នេះ បានឲ្យដឹងថា «ការធ្វើតេសលើកទី១ នៃការព្យាបាលជំងឺកូវីដ១៩របស់លោក គឺអវិជ្ជមានហើយ»។
ជាមួយគ្នានោះ លោកអភិបាលខណ្ឌពោធិ៍សែនជ័យ បានអរគុណលោកគ្រូពេទ្យ និងបងប្អូនទាំងអស់ ថែមទាំងណែនាំឲ្យបងប្អូនចងចាំនូវបាលីរបស់សម្តេចតេជោ 3កុំ និង3ការពារផងដែរ។
គួររម្លឹកផងដែរថា តាមប្រភពព័ត៌មានក្នុងស្រុកមួយ បានឲ្យដឹងថា លោកអភិបាលខណ្ឌខាងលើ ត្រូវបានរកឃើញវិជ្ជមានកូវីដ១៩នេះ កាលពីថ្ងៃអាទិត្យ ទី៦ ខែមិថុនា ឆ្នាំ២០២១ ហើយពុំទាន់ដឹងថា លោកមានអាការៈធ្ងន់ធ្ងរដែរ ឬយ៉ាងណានោះទេ ប៉ុន្តែចាប់ពីពេល ដែលបានរកឃើញជំងឺនេះមក លោកបានសម្រាកនៅផ្ទះមិនបានមកធ្វើការនៅសាលាខណ្ឌឡើយ ។
ប្រភពដដែលបានបញ្ជាក់ថា ការរកឃើញ វិជ្ជមានកូវីដខាងលើនេះ ត្រូវសង្ស័យថាបានឆ្លងពីបុរសម្នាក់ ឈ្មោះ ធី ដែលជាអ្នកបើកបររថយន្តឲ្យលោក។
គួរបញ្ជាក់ដែរថា អភិបាលខណ្ឌរូបនេះ ក៏ធ្លាប់បានចាក់វ៉ាក់សាំងការពារជំងឺកូវីដ១៩ ២ដងរួចមកហើយ មិនតែប៉ុណ្ណោះមួយរយៈពេលនេះនៅក្នុងខណ្ឌពោធិ៍សែនជ័យ មានការផ្ទុះឡើងនូវជំងឺនេះយ៉ាងខ្លាំងរហូតតំបន់មួយ ចំនួនក្លាយជាតំបន់ក្រហមថែមទៀតផង៕
