(ឧត្ដរមានជ័យ)៖ នាព្រឹកថ្ងៃអាទិត្យ ៤រោច ខែជេស្ឋ ឆ្នាំឆ្លូវ ត្រីស័ក ព.ស. ២៥៦៥ ត្រូវនឹង ថ្ងៃទី៣០ ខែឧសភា ឆ្នាំ២០២១ ឯកឧត្ដម ប៉ែន កុសល្យ អភិបាល នៃគណៈអភិបាលខេត្តឧត្ដរមានជ័យ អញ្ជើញជួបសំណេះសំណាលជាមួយក្រុមសមាជិកព្រឹទ្ធសភាប្រចាំភូមិភាគទី៤ ដែលដឹកនាំដោយ ឯកឧត្ដម ប៉ុល លឹម ប្រធានក្រុមសមាជិកព្រឹទ្ធសភាប្រចាំភូមិភាគទី៤។
ឯកឧត្ដម អភិបាលខេត្ត បានថ្លែងអំណរគុណចំពោះក្រុមសមាជិកព្រឹទ្ធសភាប្រចាំភូមិភាគទទី៤ ដែលបាននាំយកអំណោយមនុស្សធម៌ ឧបត្ថម្ភជូនដល់រដ្ឋបាលខេត្ត ដែលកំពុងត្រូវការចាំបាច់ពេលនេះ។ ឯកឧត្តមអភិបាលខេត្ត ក៏បានចាត់ទុកអំណោយទាំងនេះ ជាការចូលរួមចំណែកយ៉ាងសំខាន់ជាមួយរដ្ឋបាលខេត្តសម្រាប់ប្រើប្រាស់ឲ្យក្នុងវិធានការ ប្រយុទ្ធប្រឆាំងទប់ស្កាត់ការឆ្លងរីករាលដាលជំងឺកូវីដ-១៩ ដែលរដ្ឋបាលខេត្តបច្ចុប្បន្នបាន និងកំពុងយកចិត្តទុកដាក់រួមចំណែកជាមួយរាជរដ្ឋាភិបាលលើសុខមាលភាពប្រជាពលរដ្ឋឲ្យចាកផុតពីជំងឺដ៏កាចសាហាវនេះ។
សូមបញ្ជាក់ថាអំណោយសប្បុរសជន នៅពេលនេះមាន៖ មី៥០ កេសតូច, ទឹកសុទ្ធ៥០ កេស, ម៉ាស់២៥០០ ម៉ាស់, អាល់កុល៥០ លីត្រ, ទឹកត្រី២៥ យួរ, ទឹកស៊ីអ៊ី២៥ យួរ, សៀវភៅ កម្រងឯកសារ ស្ដីពី ការរៀបចំការប្រព្រប្រព្រឹត្តទៅ សិទ្ធអំណាច មុខងារ និងតួនាទីភារកិច្ចរបស់រដ្ឋបាលថ្នាក់ក្រោមជាតិ ចំនួន២ ក្បាល និង កម្រងឯកសារ ស្ដីពី ការគ្រប់គ្រងហិរញ្ញវត្ថុ និងកិច្ចលទ្ធកម្ម សាធារណៈ នៅថ្នាក់ក្រោមជាតិ ចំនួន៣ ក្បាល។
ដើម្បីទទួលបានព័ត៌មានផ្លូវការ សូមអញ្ជើញចូលរួម Subscribe Telegram Channel អំពីខេត្តឧត្ដរមានជ័យ តាមរយៈ t.me/oddarmeanchey
