(ខេត្តកំពត)៖ បុរសម្នាក់បានស្លាប់យ៉ាងអាណោចអធ័មដោយសាររន្ទះបាញ់សម្លាប់ខណៈវិលត្រឡប់ពីភ្ជួរស្រែ ស្របពេលមេឃកំពុងភ្លៀងខ្លាំង កាលពីវេលាម៉ោង១និង៣០នាទី រសៀល ថ្ងៃទី១៣ ខែឧសភា ឆ្នាំ២០២១ ស្ថិតក្នុងភូមិស្តេចគង់ ឃុំស្តេចគង់ខាងត្បូង ស្រុកបន្ទាយមាស ខេត្តកំពត។
បុរសរងគ្រោះ ឈ្មោះ សាំង ធី ភេទប្រុស អាយុ៤៩ឆ្នាំ មុខរបរកសិករ មានទីលំនៅភូមិស្តេចគង់ ឃុំស្តេចគង់ខាងត្បូង ស្រុកបន្ទាយមាស ខេត្តកំពត។
យោងតាមប្រភពព័ត៌មានពីក្រុមគ្រួសារសព បានឲ្យដឹងថា មុនពេលកើតហេតុបុរសរងគ្រោះ រួមជាមួយកូនប្រុសម្នាក់ទៀតបានយកគោយន្តទៅភ្ជួរស្រែដែលនៅចម្ងាយពីផ្ទះជិត១គីឡូម៉ែត្រ លុះភ្ជួរបានបន្តិចក៏មានភ្លៀងខ្យល់យ៉ាងខ្លាំង ទើបឪពុកនិងកូននាំគ្នាវិលត្រឡប់មកផ្ទះវិញ។ប្រភពដដែលបានបញ្ជាក់ទៀតថា លុះពេលធ្វើដំណើរបានបន្តិចស្រាប់តែរន្ទះបាញ់លាន់ឮយ៉ាងកក្រើកបណ្តាលឲ្យស្លាប់បុរសជាឪពុកយ៉ាងអណោចអធ័មនៅពាក់កណ្តាលផ្លូវ។ដោយឡែកកូនប្រុសបានរួចផុតពីសេចក្តីស្លាប់ដោយសារកូនប្រុសដើរនៅខាងមុខបុរសជាឪពុក។
ក្រោយពីកើតហេតុ អាជ្ញាធរនិងសមត្ថកិច្ចមូលដ្ឋានបានចុះមកអន្តរាគមន៍និងពិនិត្យ រួចប្រគល់សពជូនក្រុមគ្រួសារធ្វើបុណ្យតាមប្រពៃណី៕ សេង ណារិទ្ធ
