នៅរសៀលថ្ងៃពុធ ៩រោច ខែពិសាខ ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី០៥ ខែឧសភា ឆ្នាំ២០២១ ឯកឧត្តម ណុប ដារ៉ា អភិបាលរង នៃគណៈអភិបាលខេត្ត បានអញ្ជើញដឹកនាំកិច្ចប្រជុំពិភាក្សាអំពីការគ្រប់គ្រងសន្តិសុខ និងសណ្តាប់ធ្នាប់នៅតាមគោលដៅ និងតំបន់ចត្តាឡីស័កក្នុងខេត្តបាត់ដំបង ដើម្បីទប់ស្កាត់ ការរីករាលដាលនៃជំងឺ កូវីដ-១៩។ ឯកឧត្តម ណុប ដារ៉ា បានណែនាំ ដល់ គណៈបញ្ជាការឯកភាពក្រុង-ស្រុក និងកងកម្លាំងគ្រប់ ផ្នែក ត្រូវយកចិត្តទុកដាក់ បំពេញ ការងារ ជាពិសេស ត្រូវពង្រឹងការ អនុវត្តវិធានសុខាភិបាល និងវិធានការ នានាប្រឆាំងនឹងកូវីដ-១៩។
ក្នុងនោះដែរ ឯកឧត្តម បាន បន្ថែម ថា គណៈបញ្ជាការឯកភាពក្រុង-ស្រុក និងកងកម្លាំងគ្រប់ ផ្នែកទាំងអស់ ត្រូវ ពង្រឹង ការងារ ផ្នែក សន្តិសុខ សណ្តាប់ធ្នាប់ ទាំងនៅក្នុង មណ្ឌលចត្តាឡីស័ក និង នៅក្នុង មូលដ្ឋាន ផងដែរ ជាពិសេស ត្រូវ កសាង សំណុំរឿងចាត់ការតាមច្បាប់ ចំពោះជនណា ដែលល្មើសវិធានការ ទប់ស្កាត់ ជំងឺកូវីដ-១៩ របស់រាជរដ្ឋាភិបាល និងរដ្ឋបាលខេត្ត ដោយ មិន យោគយល់ដាច់ខាត។
ជាចុងក្រោយ ឯកឧត្តម បាន ណែនាំ ឱ្យ កងកម្លាំង គ្រប់ ប្រភេទ ទាំងអស់ ត្រៀមខ្លួនជានិច្ច ដើម្បី អន្តរាគមន៍អ្នកជំងឺ ឬបុគ្គលពាក់ព័ន្ធ ឬទីតាំងដែលមិនសហការជាមួយ អាជ្ញាធរ ប្រធានមណ្ឌល និងគណៈបញ្ជាការឯកភាព ក្រុង-ស្រុក។
