(បាត់ដំបង)÷សមត្ថកិច្ចបានបញ្ជាក់ឲ្យដឹងថា÷ នៅថ្ងៃទី ០៣ ខែឧសភា ឆ្នាំ ២០២១នេះកម្លាំងការិយាល័យជំនាញ នៃស្នងការនគរបាលខេត្តបាត់ដំបងបានរៀបចំបែបបទប្រគល់សំណុំរឿងទៅដល់ដៃព្រះរាជអាជ្ញាហើយដើម្បីបន្តនីតិវិធីតាមផ្លូវច្បាប់ដោយតម្រូវឲ្យម្ចាស់ទីតាំងដែលបើកលេងល្បែងភ្នាល់ជល់មាន់តាមអនឡាញ ១រូបចូលបំភ្លឺខណ:ប្រមូលផ្តុំមនុស្សច្រើនបំពានបម្រាមទប់ស្កាត់ជំងឺកូវីដ-១៩ដែលកំពុងរីករាលដាល។
ម្ចាស់ទីតាំងដែលផ្គើនលួចលាក់បើកលេងល្បែងភ្នាល់ជល់មាន់តាមទូរទស្សន៍អនឡាញខាងលើត្រូវបានគេស្គាល់ មានឈ្មោះ ហេង ឡុង ភេទប្រុស អាយុប្រហែលជិត ៥០ឆ្នាំមានទីលំនៅឋិតនៅក្នុងភូមិចំការសំរោង២ សង្កាត់ចំការសំរោង ក្រុងបាត់ដំបង ខេត្តបាត់ដំបង ជាទីតាំងលួចលាក់លេងល្បែងភ្នាល់អនឡាញដ៏ធំមួយ។
ការអនុវត្តកោះហៅម្ចាស់ទីតាំងប្រព្រឹត្តល្បែងអនឡាញខាងលើធ្វើឡើងបន្ទាប់មួយថ្ងៃក្រោយពេលដែលសមត្ថកិច្ចបើកការបង្ក្រាបហើយបាននាំខ្លួនអ្នកដែលពាក់ព័ន្ធសរុបចំនួន ១៧នាក់កសាងសំណុំរឿងបញ្ជូនទៅសាលាដំបូងខេត្តបាត់ដំបងរួចរាល់ហើយដែរដើម្បីវិនិច្ឆ័យទោសនៅថ្ងៃទី ០៣ ខែឧសភា ឆ្នាំ ២០២១នេះ៕
