ខេត្តបន្ទាយមានជ័យ៖ នាព្រឹកថ្ងៃអាទិត្យ ៦ រោច ខែពិសាខ ឆ្នាំឆ្លូវ ត្រីស័ក ពស ២៥៦៥ ត្រូវនឹងថ្ងៃទី ០២ ខែឧសភា ឆ្នាំ ២០២១ លោក ឧត្តមសេនីយ៍ទោ សិទ្ធិ ឡោះ ស្នងការ នគរបាលខេត្តបន្ទាយមានជ័យ និងលោក ឧត្តមសេនីយ៍ស្នងការរង រួមសហការី និងមានការអញ្ជើញចូលរួមពី លោក ឧត្តមសេនីយ៍ឯក សម វណ្ណវីរៈ ប្រធាននាយកដ្ឋាន សន្តិសុខផ្ទៃក្នុង អញ្ជើញធ្វើការបែងចែកស្បៀង និងចុះជួបសំណេះសំណាលសួរសុខទុក្ខ និងនាំយកអំណោយជាគ្រឿងឧបភោគ បរិភោគ និងសម្ភារការពារជំងឺកូវីដ-១៩ រួមមាន៖
១-អង្ករចំនួន ៣ តោន
២-ថវិកាចំនួន ៩,០០០,០០០ រៀល(ប្រាំបួនលានរៀល)
៣-ទឹកសុទ្ធចំនួន ៥០០ យួរ
៤-ត្រីខចំនួន ១០ កេសធំ
៥-មីចំនួន ៧០ កេសតូច
៦-ទឹកត្រីចំនួន ៧០ យួរ
៧-ទឹកស៊ីអ៊ីវចំនួន ១០០ យួរ
៨-ម៉ាសចំនួន ៤០០០ ម៉ាស
ក្នុងនោះថវិកា ឧត្តមសេនីយ៍ឯក សម វណ្ណវីរៈ ឧបត្ថម្ភ ១,០០០,០០០ រៀល (មួយលានរៀល) ជូនដល់ កម្លាំងដែលប្រចាំការបិទខ្ទប់ត្រួតពិនិត្យចេញ ចូល តាមបណ្តោយផ្លូវជាតិលេខ៥៨ តាមគោលដៅនានា និងក្នុងភូមិសាស្ត្រក្រុងប៉ោយប៉ែត ខេត្តបន្ទាយមានជ័យ ។
លោក ឧត្តមសេនីយ៍ទោ ស្នងការ សូមថ្លែងអំណរគុណ និងកោតសរសើរចំពោះកិច្ចខិតខំប្រឹងប្រែង របស់កងកម្លាំង ដែលបានចូលរួមយ៉ាងសកម្មក្នុងការប្រយុទ្ធប្រឆាំងនឹងជំងឺកូវីដ-១៩ ជាមួយគ្នានោះដែរ កងកម្លាំងត្រូវយកចិត្តទុកដាក់ខ្ពស់តាមគោលការណ៍សំខាន់នានា និងបទបញ្ជា ដែលបានដាក់ចុះដើម្បីធ្វើការឱ្យបានម៉ត់ចត់ និងតាមដានត្រួតពិនិត្យបន្ត ធ្វើយ៉ាងណាទប់ស្កាត់ឱ្យខានតែបាននូវការរីករាល ក្នុងសហគមន៍ និងសូមកងកម្លាំងរក្សាអនាម័យ បាញ់អាល់កុល លាងជែល ជាប្រចាំ ព្រមទាំងអនុវត្តវិធានរបស់ក្រសួងសុខាភិបាល និងគោរពអនុវត្ត ៣ការពារ ៣កុំ ឱ្យបានខ្ជាប់ខ្ជួនផងដែរ ៕
