ថ្ងៃចន្ទ ៨ កើត ខែពិសាខ ឆ្នាំឆ្លូវ ត្រីស័ក ពុទ្ធសករាជ ២៥៦៤ ត្រូវនឹងថ្ងៃទី១៩ ខែមេសា ឆ្នាំ២០២១
ឯកឧត្តម ណុប ដារ៉ា អភិបាលរងខេត្តបាត់ដំបងនិងជាប្រធានគណៈកម្មការស្រាវជ្រាវបង្ក្រាបល្បែងគ្រប់ប្រភេទក្នុងភូមិសាស្ត្រខេត្តបាត់ដំបង នារសៀលនេះ បានដឹកនាំកម្លាំងចម្រុះចុះបង្ក្រាបការប្រមូលផ្ដុំលេងល្បែងភ្នាល់ទឹកភ្លៀងដែលប្រឆាំងទៅនឹងបម្រាមរបស់ប្រមុខរាជរដ្ឋាភិបាលក្នុងការទប់ស្កាត់ការរីករាលដាលជំងឺកូវិដ-១៩ ប្រតិបត្តិការបង្ក្រាបនេះបានចំនួន ៣គោលដៅ ដែលកំពុងប្រមូលផ្ដុំគ្នាលេងល្បែងភ្នាល់ទឹកភ្លៀងនៅក្រោយផ្សារ ភូ ពុយ ខេត្តបាត់ដំបង ។
ប្រតិបត្តិការចុះបង្ក្រាបការប្រមូលផ្ដុំអ្នកលេងល្បែងភ្នាល់ទឹកភ្លៀងទាំង ៣គោលដៅនេះ សមត្ថកិច្ចជំនាញបានធ្វើការឃាត់ខ្លួនអ្នកលេងល្បែងភ្នាល់ទឹកភ្លៀងចំនួន ១៣នាក់ ក្នុងនោះមានស្រី១ ម៉ូតូចំនួន ១៤គ្រឿង រថយន្តចំនួន ៤គ្រឿងបញ្ជូនមកស្នងការនគរបាលខេត្តបាត់ដំបង ដើម្បីធ្វើការសាកសួរកសាងសំណុំរឿងបញ្ជូនទៅតុលាការចាត់ការតាមនីតិវិធីច្បាប់ ។
ក្នុងប្រតិបត្តិការនេះក៏មានការចូលរួមពីសំណាក់ព្រះរាជអាជ្ញារងសាលាដំបូងខេត្តបាត់ដំបងដោយប្រើប្រាស់កម្លាំងរបស់ស្នងការនគរបាលខេត្តបាត់ដំបង មានកម្លាំងសន្តិសុខផ្ទៃក្នុង និងកម្លាំងព្រហ្មទណ្ឌកម្រិតស្រាលនៃស្នងការនគរបាលខេត្តបាត់ដំបង។
