ភ្នំពេញ៖ ដោយអនុវត្តតាមបទបញ្ជារបស់ ឯកឧត្តម ឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ នៅថ្ងៃទី១៩ ខែមេសា ឆ្នាំ២០២១ វេលាម៉ោង០៦និង០០នាទីល្ងាច លោកវរសេនីយ៍ឯក ហ៊ាង ថារ៉េត អធិការនគរបាលខណ្ឌឫស្សីកែវ បានដឹកនាំកម្លាំងចុះចាប់ឃាត់ខ្លួន ជនផឹកស៊ីចំនួន ០២ក្រុម មានគ្នាចំនួន ០៦នាក់ ដែលប្រមូលផ្តុំគ្នាស៊ីផឹក ក្នុងសង្កាត់ទួលសង្កែទី១ ល្មើសនឹងច្បាប់ ស្តីពីការប្រឆាំងនឹងជំងឺកូវីដ-១៩ មកកាន់អធិការដ្ឋាននគរបាលខណ្ឌឫស្សីកែវ ដើម្បីអនុវត្តតាមនីតិវិធីច្បាប់។
លោកវរសេនីយ៍ឯក ហ៊ាង ថារ៉េត អធិការនគរបាលខណ្ឌឫស្សីកែវបានឲ្យដឹង ថា នៅវេលាម៉ោង ៦និង០០នាទីល្ងាចថ្ងៃទី១៩ ខែមេសា ឆ្នាំ២០២១ បន្ទាប់ពីបានទទួលព័ត៌មានថា មានមនុស្ស២ក្រុមគ្នា៦នាក់ បានជួបជុំផឹកស៊ីផ្ទុយពីច្បាប់ស្តីពីការប្រឆាំងនឹងជំងឺកូវីដ១៩ ឧត្តមសេនីយ៍ឯក ស ថេត បានដាក់បទបញ្ជាយ៉ាងម៉ឺងម៉ាត់ដល់អធិការនគរបាលខណ្ឌឬស្សីកែវ ដឹកនាំកម្លាំងចុះចាប់ខ្លួនជនផឹកស៊ីទាំងនោះ ។
សូមបញ្ជាក់ថា នៅតាមខេត្តមួយចំនួនអាជ្ញាធរ និងសមត្ថកិច្ចខេត្តទាំងនោះ បានចុះបង្ក្រាបជាបន្តបន្ទាប់ ចំពោះការជួបជុំផឹកស៊ី ដែលជាហានិភ័យខ្ពស់ក្នុងការចម្លងជំងឺកូវីដ១៩៕
