ខេត្តបាត់ដំបង ៖ ឯកឧត្តម ណុប ដារ៉ា អភិបាលរងខេត្តបាត់ដំបង និងជាប្រធានក្រុមការងារខេត្តអនុវត្តការហាមឃាត់ជាបណ្តោះអាសន្តនូវការធ្វើដំណើរឆ្លងកាត់ខេត្ត ចេញ-ចូលខេត្តបាត់ដំបង នៅរសៀលថ្ងៃអាទិត្យ ទី១៨ ខែមេសា ឆ្នាំ២០២១ បានដឹកនាំក្រុមការងារចុះត្រួតពិនិត្យកម្លាំងចម្រុះដែលដាក់ប៉ុស្តិ៍ត្រួតពិនិត្យការឆ្លងកាត់ពីខេត្តមួយទៅខេត្តមួយ ត្រង់ចំណុចព្រំប្រទល់ខេត្តបាត់ដំបង-ពោធិ៍សាត់។
ឯកឧត្តមបានណែនាំឱ្យក្រុមការងារចម្រុះត្រូវយកចិត្តទុកដាក់ត្រួតពិនិត្យរាល់ការចេញចូលឆ្លងកាត់ខេត្តឱ្យបានត្រឹមត្រូវតាមបទបញ្ជារបស់រាជរដ្ឋាភិបាល និងថែរក្សាសុខភាព រក្សាអនាម័យ លាងដៃនឹងទឹកអាល់កុល រក្សាគម្លាត និងពាក់ម៉ាស់។ ក្នុងឱកាសនោះដែរ ឯកឧត្តមក៏បានផ្តាំផ្ញើឱ្យត្រួតពិនិត្យវាស់កំដៅអ្នកធ្វើដំណើរឆ្លងកាត់ និងឱ្យពួកគាត់លាងដៃសម្អាតជាមួយអាល់កុលឱ្យបានញឹកញាប់ ត្រូវពាក់ម៉ាស ដើម្បីចូលរួមទប់ស្កាត់ការរីករាលដាលនៃជំងឺកូវីដ-១៩ តាមការណែនាំក្រសួងសុខាភិបាល។
