(ភ្នំពេញ)៖ នៅថ្ងៃទី១៥ ខែមេសានេះ ក្រសួងសុខាភិបាល បាន ប្រកាសថា ស្ថិតក្នុងដំណាក់កាល ដែលអ្នក ជំងឺកូវីដ-១៩ នៅក្នុងរាជធានីភ្នំពេញ កំពុងមានចំនួនកើនឡើងច្រើន ហើយទីកន្លែងសម្រាប់ សម្រាកព្យាបាល មានការខ្វះខាត ក្រសួងកំពុងតែបន្តរៀបចំទីកន្លែងជាបន្តបន្ទាប់ ដោយសហការជាមួយអាជ្ញាធររាជធានីភ្នំពេញ។ ដូច្នេះក្រសួងសុខាភិបាល បានប្រកាសថា ប្រសិនបើបងប្អូនប្រជាពលរដ្ឋ ក្នុងរាជធានីភ្នំពេញ ដែលមានវិជ្ជមានវីរុសកូវីដ-១៩ មិនទាន់ទទួលបានកន្លែងសម្រាកព្យាបាល សូមបងប្អូន អនុវត្តតាមការណែនាំ ក្នុងការតាមដានរោគសញ្ញា និងការថែទាំព្យាបាលអ្នកជំងឺកូវីដ-១៩ នៅតាមផ្ទះ។
តាមសេចក្តីណែនាំ ករណីគ្មានរោគសញ្ញា ពុំចាំបាច់ ប្រើថ្នាំពេទ្យទេ។ តែបើករណីមានរោគសញ្ញាស្រាល ដូចជា ក្តៅខ្លួនលើស ៣៧,៥°C មានឈឺសាច់ដុំ មានឈឺបំពង់ក ញ៉ាំថ្នាំ ប៉ារ៉ាសេតាម៉ុល ៣ដង ក្នុង ១ថ្ងៃ។ ម្តង ១គ្រាប់។ ក្នុង ករណី មានសញ្ញាបន្ថែម ដូចជា តឹងច្រមុះ ឬហៀរសំបោរ ឬក្អក ( មាន ឬមិន មានស្លេះ សូម ប្រើថ្នាំ ប្រូម៉ិចស៊ីន ៨មីលីក្រាម ៣ដង ក្នុង ១ថ្ងៃ ឬសេទីរីហ្ស៊ីន ១០មីលីក្រាម ១ដង ក្នុង ១ថ្ងៃ ។ ក្រៅពីនេះ ត្រូវអនុវត្តវិធានការសុខាភិបាល ក្នុងរយៈពេលព្យាបាលនៅតាមផ្ទះ ដូចជា ស្នាក់នៅបន្ទប់ដាច់ដោយឡែក មានអនាម័យស្អាត និងមានខ្យល់ចេញ-ចូលល្អ ត្រូវពាក់ម៉ាស លាងសម្អាតដៃឲ្យញឹកញាប់ និងរក្សាគម្លាតយ៉ាងតិច ២ម៉ែត្រ ។ បរិភោគអាហារមានជីវជាតិគ្រប់គ្រាន់ សាច់ បន្លែ ផ្លែឈើ និងពិសាទឹកឲ្យបានច្រើន ជាដើម។
សូមរម្លឹកថា នៅថ្ងៃទី១៥មេសានេះ ក្រសួងសុខាភិបាល បានប្រកាសពីការរកឃើញករណីឆ្លងកូវីដថ្មី ចំនួន ៣៤៤នាក់ និងជាសះស្បើយចំនួន ២៩នាក់ កាលពីថ្ងៃទី១៤ ខែមេសា ។ ក្នុងនោះ នៅភ្នំពេញ បន្តរកឃើញច្រើនជាងគេ រហូតដល់ ២៤៣នាក់ ។ ខេត្តស្វាយរៀង ៧១នាក់។ ខេត្តកណ្តាល ៨នាក់ ខេត្តព្រះសីហនុ ៦នាក់។ ខេត្តកោះកុង ៥នាក់។ ខេត្តតាកែវ ៣នាក់។ ខេត្តក្រចេះ ២នាក់ និងខេត្តសៀមរាប ម្នាក់ ។
គិតមកដល់ព្រឹកថ្ងៃទី១៥ ខែមេសានេះ នៅទូទាំងប្រទេស រកឃើញអ្នកឆ្លងជំងឺកូវីដ១៩ សរុប ៥២១៨នាក់។ ក្នុងនោះ ឆ្លងសហគមន៍២០កុម្ភៈ ចំនួន ៤៦៧៦នាក់។ ចំណែកអ្នកជាសះស្បើយ ២៣១៩នាក់។ អ្នកកំពុងសម្រាកព្យាបាល ចំនួន ២៨៥៨នាក់ និងមានអ្នកស្លាប់ ៣៦នាក់ ៕
លោក រុន សារ៉េត
