ខេត្តប៉ៃលិន ៖ ក្រោយពីទទួលដំណឹងភ្លាម់ៗថា មានជនរងគ្រោះម្នាក់ ដែលបើកត្រាក់ទ័រស៊ីឈ្នួល ភ្ជួរដីឱ្យប្រជាពលរដ្ឋមួយកន្លែង នៅរសៀលថ្ងៃទី០៣ ខែមេសា ឆ្នាំ២០២១ លោកជំទាវ បាន ស្រីមុំ អភិបាលខេត្តប៉ៃលិន និងជាប្រធានសាខាកាកបាទក្រហមកម្ពុជាខេត្ត បានចាត់ឱ្យ ឯកឧត្តម ហុក សុផល អភិបាលរងខេត្ត និងជាអនុប្រធានសាខា ដោយមានការអញ្ជើញចូលរួមពី ឯកឧត្តម សៅ សារ៉ាត់ អ្នកតំណាងរាស្ត្រមណ្ឌលប៉ៃលិន នាំយកថវិកាសង្គ្រោះបន្ទាន់ចំនួន៣លានរៀល ជូនដល់លោក ប៊ន សាមិត្ត ហៅខ្លឹម អាយុ២៦ឆ្នាំ ដែលកំពុងសង្គ្រោះនៅមន្ទីរពេទ្យបង្អែកខេត្តប៉ៃលិន បន្ទាប់ពីបានរងគ្រោះដោយសារភ្ជួរដីប៉ះចំមីនតោនផ្ទុះ ខណ:សេសសល់ពីសម័យសង្គ្រាម ។
បច្ចុប្បន្នជនរងគ្រោះខាងលើ ត្រូវបានគ្រូពេទ្យបញ្ជូនទៅសង្គ្រោះនៅមន្ទីរពេទ្យខេត្តបាត់ដំបង ហើយក្រុមការងារបន្តយកចិត្តទុកដាក់តាមដានសភាពនៃរបួស ក៏មានការផ្តាំផ្ញើពីសំណាក់លោកជំទាវអភិបាលខេត្តផងដែរ ។
សូមបញ្ជាក់ថា នៅថ្ងៃកើតហេតុ ជនរងគ្រោះបើកត្រាក់ទ័រស៊ីឈ្នួលភ្ជួរដីឱ្យអ្នកភូមិម្នាក់ បម្រុងនឹងដាំដំឡូងមីដូចសព្វដង ស្រាប់តែជាន់ទៅលើមីនតោន ដែលសេសសល់ពីសម័យសង្គ្រាម ក៏ផ្ទុះយ៉ាងកក្រើក បណ្តាលឱ្យរងរបួសធ្ងន់ ខូចខាតត្រាក់ទ័រផ្នែកខាងមុខ បែកកង់ខាងស្តាំខ្ទេចខ្ទី កាលពីវេលាម៉ោង៩និង០០នាទីព្រឹកថ្ងៃទី០៣ ខែមេសា ឆ្នាំ២០២១ ស្ថិតនៅចំណុចភ្នំស្ពុង ក្នុងចំការដំឡូងមី នៅភូមិអូរឫស្សីក្រោម ឃុំសាលាក្រៅ ស្រុកសាលាក្រៅ ខេត្តប៉ៃលិន ៕
សេង ត
