ខេត្តបន្ទាយមានជ័យ ៖ ស្ថានីយ៍ថ្លឹងរថយន្ដកូនដំរី សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ កំពុងរងការរិះគន់ពីក្រុមហ៊ុនរថយន្តដឹកទំនិញដែលមានឈ្មោះ (ឥន្ទ្រីស) ថា៖ ថ្លឹងលើសទម្ងន់ជាញឹកញាប់ ដោយរថយន្តដឹកទំនិញពួកគាត់ចូល តាមស្ថានីយ៍នៅតាមបណ្តាខេត្តផ្សេងមានភាពត្រឹមត្រូវមានតែចំនួន ៤១-៤២ តោន តែប៉ុណ្ណោះ។
ចំណែកស្ថានីយ៍ថ្លឹងរថយន្ដកូនដំរី ខេត្តបន្ទាយមានជ័យវិញ ពេលដែលក្រុមរថយន្តក្រុមហ៊ុនឈ្មោះ(ឥន្ទ្រីស) ចូលទៅថ្លឹងម្តងៗ បែជាមានភាព មិនប្រក្រតី លើសដល់ទៅ ៤៥.៦ តោន ឯណោះ ក្នុងកម្រឹតផាកពិន័យ ខាងក្រុមការងារស្ថានីយ៍នោះ តម្រូវអោយបង់ប្រាក់ ១០,២០០០០ រៀល (មួយលានពីសែនរៀល) ក្នុងមួយរថយន្ត មិនត្រឹមតែលើសទម្ងន់មួយរថយន្តនោះទេ គឺលើសទៅ ៣-៤ រថយន្តឯណោះ នេះបើយោងតានការបញ្ជាក់ពីក្រុមតៃកុងរថយន្តដឹកទំនិញ ឈ្មោះ (ឥន្ទ្រីស) កំពុងនាំគ្នាតវ៉ានៅមុខស្ថានីយ៍ថ្លឹងរថយន្តកូនដំរី នៅវេលាម៉ោង១១ព្រឹក ថ្ងៃទី៣១ ខែមីនា ឆ្នាំ២០២១ ដែលទីតាំងស្ថានីយ៍នោះ ស្ថិតក្នុងសង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ។
ក្រោយពីក្រុមតៃកុងរថយន្តយករថយន្តជាង ១០ គ្រឿង ធ្វើការចតបិទផ្លូវស្ថានីយថ្លឹងរថយន្ដកូនដំរី បានប្រហែល ៣ ម៉ោងជាង បន្ទាប់មកក្រុមការងារស្ថានីយបានឲ្យរថយន្តទាំងនោះចូលថ្លឹងម្ដងទៀតសារជាថ្មី បែរជាមានទម្ងន់ថយចុះគឺមានចំនួន ៤៤.៣ (សែសិបបួនតោនបីរយគីឡូ តែប៉ុណ្ណោះ)ក្នុងកម្រិតមួយត្រឹមត្រូវ តាមស្តង់ដារ សាយឡូរ របស់ក្រុមហ៊ុនរថយន្ត(ឥន្ទ្រីស) គឺខាងស្ថានីយ៍កូដំរីនោះ មិនអាចផាកពិន័យជាទឹកប្រាក់បានទេ នេះបើយោងតាមការផ្តល់បទសម្ភាសន៍ ពីក្រុមតៃកុងរថយន្ត នៅថ្ងៃខែឆ្នាំដដែលនេះ។
ជុំវិញករណីស្ថានីយ៍ថ្លឹងរថយន្ដកូនដំរី ដែលថ្លឹងលើសទម្ង់ជាច្រើនតោនតែរហូតមក ដែលមានភាពមិនប្រក្រតី ក្រុមសារព័ត៌មាន ជាង ៣០ ស្ថាប័ន ប្រចាំក្រុងប៉ោយប៉ែត ខេត្តបន្ទាយមានជ័យ មិនអាចសុំធ្វើបទសម្ភាសន៍ ពីប្រធានស្ថានីយ៍ថ្លឹងរថយន្ដកូនដំរី ដើម្បីបំភ្លឺបាននោះទេ? ដោយក្រុមការងារស្ថានីយ៍ លោកឆ្លើយយ៉ាងខ្លីថា មិនអាចផ្តល់បទសម្ភាសន៍បានទេនៅក្នុងរឿងនេះ។
អាស្រ័យហេតុនេះ ក្រុមតៃកុងរថយន្តដឹកជញ្ជូនទំនិញអោយក្រុមហ៊ុនឈ្មោះ (ឥន្ទ្រីស) សូមសំណូមពរទៅដល់ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណៈការដឹកជញ្ជូន សូមឯកឧត្តម មេត្តាពិនិត្យមើលស្ថានីយ៍ថ្លឹងរថយន្ដកូនដំរី ខេត្តបន្ទាយមានជ័យ ដែលមានភាពមិនប្រក្រតី និងសូមជួយដុះក្អែលលោកប្រធានស្ថានីយ៍ថ្លឹងរថយន្តកូនដំរីមួយនេះផងចុះទាន៕
