នៅថ្ងៃទី២៤ ខែមីនា ឆ្នាំ២០២១ ឯកឧត្តម នាយឧត្តមសេនីយ៍ទេសរដ្ឋមន្ត្រី សែម សុវណ្ណនី អនុប្រធានគណៈកម្មាធិការជាតិសម្របសម្រួល កិច្ចការបញ្ជូនកងកម្លាំងចូលរួមបេសកកម្មរក្សាសន្តិភាព ឯកឧត្តម មាន ច័ន្ទយ៉ាដា អភិបាលរងរាជធានីភ្នំពេញ និងមន្ត្រីជំនាញក្រសួងសុខាភិបាល បានអញ្ជើញចុះពិនិត្យជាក់ស្តែងទីតាំងចត្តាឡីស័ក និងព្យាបាលអ្នកជំងឺកូវីដ១៩នៅសាលាហ្វឹកហ្វឺនកងកម្លាំងរក្សាសន្តិភាពពហុសាសន៍(PKO) និងវិទ្យាស្ថានហ្វឹកហ្វឺន (ឧដុង្គ) ខេត្តកំពង់ស្ពឺ ។
នៅក្នុងដំណើរចុះពិនិត្យនេះ សាលារាជធានីភ្នំពេញ និងមន្ត្រីជំនាញក្រសួងសុខាភិបាលបានសម្រេចយកមណ្ឌលចត្តាឡីស័ក ២កន្លែងទៀតរបស់មជ្ឈមណ្ឌលជាតិ គ្រប់គ្រងកងកម្លាំងរក្សាសន្តិភាព បោសសំអាតមីន និងកាកសំណល់សង្គ្រាម រួមមាន៖ មណ្ឌលចត្តាឡីស័កនៅសាលាហ្វឹកហ្វឺនកងកម្លាំងរក្សាសន្តិភាពពហុសាសន៍(PKO) ស្រុកភ្នំស្រួច និងមណ្ឌលចត្តាឡីស័កនៅវិទ្យាស្ថានហ្វឹកហ្វឺន(ឧត្តុង្គ ) ខេត្តកំពង់ស្ពឺ ធ្វើជាមណ្ឌលចត្តាឡីស័ក និងព្យាបាលអ្នកជំងឺកូវីដ១៩ តាមអនុសាសន៍ណែនាំរបស់សម្តេចអគ្គមហាសេនាបតីតេជោ ហ៊ុន សែននាយករដ្ឋមន្ត្រីនៃព្រះរាជាណាចក្រកម្ពុជា។
នាយឧត្តមសេនីយ៍ទេសរដ្ឋមន្ត្រី សែម សុវណ្ណនី ក្នុងនាមអនុប្រធានគណៈកម្មាធិការជាតិ និងអគ្គនាយកមជ្ឈមណ្ឌលជាតិរក្សាសន្តិភាព បានបញ្ជាក់នៅថ្ងៃទី២៤ ខែមីនានេះ ថាការយកមណ្ឌលចត្តាឡីស័កទាំងពីរកន្លែងរបស់អង្គភាពទ័ពមួកខៀវសម្រាប់ធ្វើចត្តាឡីស័ក និងព្យាបាលអ្នកជំងឺកូវីដ១៩ លើកងកំលាំងយោធា និងពលរដ្ឋស៊ីវិល គឺបានធ្វើឡើងបន្ទាប់ពីក្រុមគ្រូពេទ្យទ័ពមួកខៀវយើងទាំងអស់មានបទពិសោធន៍ និងសមត្ថភាពគ្រប់គ្រាន់ក្នុងការព្យាបាលអ្នកជំងឺកូវីដ១៩បានជាសះស្បើយ ជាពិសេសការព្យាបាលជាសះស្បើយចំពោះអ្នកជំងឺទ័ពមួកខៀវមកពីសាធារណៈរដ្ឋអាហ្វ្រិកកណ្តាលលើកចុងក្រោយបានជាចំនួន៩នាក់ និងខណៈ ២នាក់ទៀតកំពុងព្យាបាលបន្ត ។
សូមបញ្ជាក់ថា នៅក្នុងឱកាសចុះពិនិត្យមណ្ឌលព្យាបាលអ្នកជំងឺកូវីដទីតាំងថ្មីនេះ ក្រុមគ្រូពេទ្យ ក៏បានអញ្ជើញមកចាក់ថ្នាំវ៉ាក់សាំងការពារកូវីដ១៩ជូនដល់កងទ័ពមួកខៀវកម្ពុជាចំនួន ១១៧នាក់ ដែលទើបត្រឡប់មកពីប្រទេសលីបង់ និងសាធារណៈអាហ្វ្រឹកកណ្តាល និងទើបបានបញ្ចប់ការធ្វើចត្តាឡីស័កនៅក្នុងសាលាហ្វឹកហ្វឺនកងកម្លាំងរក្សាសន្តិភាពពហុសាសន៍ក្នុងខេត្តកំពង់ស្ពឺនេះផងដែរ។
នាយឧត្តមសេនីយទេសរដ្ឋមន្ត្រី សែម សុវណ្ណនី បានបញ្ជាក់ដែរថា សម្រាប់កងទ័ពមួកខៀវដែលកំពុងបំពេញបេសកកម្មថែរក្សាសន្តិភាពនៅក្រៅប្រទេស បច្ចុប្បន្នគឺមានទ័ពមួកខៀវនៅប្រទេសស៊ូដង់ ស៊ូដង់ខាងត្បូង សាធារណៈរដ្ឋអាហ្វ្រីកកណ្តាល និងលីបង់ គឺបានចុះឈ្មោះចាក់វ៉ាក់សាំងការពារកូវីដ១៩ ដែលរៀបចំដោយអង្គការសហប្រជាជាតិអស់ហើយដោយឡែកកងកម្លាំងត្រៀមចុះឈ្មោះបន្តផងដែរ ។
