ដោយអនុវត្តន៍តាមការណែនាំបញ្ជាផ្ទាល់ពីឯកឧត្ដមឧត្ដមសេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបង ក៏ដូចជាលោកវរសេនីយ៍ឯក លឹម ពុទ្ធីឡា ស្នងការរងផែនការងារនគរបាលព្រហ្មទណ្ឌ និងមានការសម្របសម្រួលលើនីតិវិធី ពីឯកឧត្តម គឺ ប៊ុណ្ណារ៉ា ព្រះរាជអាជ្ញា នៃអយ្យការអមសាលាដំបូងខេត្តបាត់ដំបង នៅថ្ងៃទី២០ ខែមីនា ឆ្នាំ២០២១ វេលាម៉ោង២២:២៥នាទី នៅចំណុចភូមិរំចេក ៤ សង្កាត់រតនៈ ក្រុងបាត់ដំបង ខេត្តបាត់ដំបង លោកវរសេនីយ៍ឯក ឈឿង គឹមសុង នាយការិយាល័យនគរបាលព្រហ្មទណ្ឌកម្រិតស្រាលបានដឹកនាំកម្លាំងក្រុមអន្តរាគមន៍បង្ការបង្ក្រាបចុះប្រតិបត្តិការបង្ក្រាបករណីលួច(យកម៉ូតូ)០១ករណីនឹងបានធ្វេីការនាំខ្លួនជនសង្ស័យចំនួន០២នាក់
1-ឈ្មោះ រិទ្ធ រ៉ាម៉ន ភេទប្រុស អាយុ៣១ឆ្នាំ មានទីលំនៅភូមិចម្លងរម៊ាំងក្រោម ឃុំអូរសំរិល ស្រុkសំឡូត ខេត្តបាត់ដំបង ។
2-ឈ្មោះ ឡាយ សំណាង ភេទប្រុសអាយុ៣៨ឆ្នាំ មានទីលំនៅភូមិរំចេក ៤ សង្កាត់រតនៈ ក្រុងបាត់ដំបង ខេត្តបាត់ដំបង។
ជនសង្ស័យទាំង ០២ នាក់ខាងលើបានឆ្លើយសារភាពនៅចំពោះមុខសមត្ថកិច្ចថា ៖ នៅថ្ងៃទី២០ ខែមីនា ឆ្នាំ២០២១ វេលាម៉ោង២១:៣៨នាទី ខ្លួនបានធ្វើសកម្មភាពលួចយកម៉ូតូរបស់ជនរងគ្រោះ ឈ្មោះ នង ពុទ្ធី ភេទប្រុសអាយុ២៤ឆ្នាំ មានទីលំនៅភូមិអូរតាគាំ ៣ សង្កាត់ទួលតាឯក ក្រុងបាត់ដំបង ខេត្តបាត់ដំបង ។ ក្រោយពីធ្វើសកម្មភាពបានរយៈពេលមួយម៉ោង ទើបសមត្ថកិច្ចធ្វើការនាំខ្លួនមកកាន់ស្នងការដ្ឋាន ដើម្បីធ្វើការសាកសួរ។
វត្ថុតាងដកហូតរួមមាន ៖
-ម៉ូតូ០១គ្រឿង ម៉ាកហុងដា ZOOMERX ពណ៌ខ្មៅទឹកក្រូច ស៊េរីឆ្នាំ២០១៧ ពាក់ស្លាកលេខបាត់ដំបង 1AJ2149 (ជារបស់ជនរងគ្រោះ)។
បច្ចុប្បន្ន ជនសង្ស័យទាំង ០២ នាក់ខាងលើ ត្រូវបានកម្លាំងជំនាញកំពុងកសាងសុំណុំរឿង បញ្ជូនទៅសាលាដំបូងខេត្តបាត់ដំបងចាត់ការបន្តតាមនីតិវិធី ៕
