(ប៉ៃលិន) ៖ ប្រភពព័ត៌មានបង្ហើបចេញពីមន្ត្រីសាលាខេត្តប៉ៃលិន បានឱ្យដឹងកាលពីព្រឹកថ្ងៃទី២០ ខែមីនា ឆ្នាំ២០២១ នេះថា ៖ មូលហេតុដែលលោកជំទាវ បាន ស្រីមុំ អភិបាលខេត្តប៉ៃលិន បណ្តេញលោក ខឹម មុនីកុសល ជាមន្ត្រីការិយាល័យបង្ការ និង គ្រប់គ្រងជំងឺមន្ទីរសុខាភិបាលនៃរដ្ឋ បាលខេត្តប៉ៃលិន ចេញពីក្របខណ្ឌមន្ត្រីសុខាភិបាលជាន់ខ្ពស់ ដោយសារតែមូលហេតុលោកមានកំហុស និង ការឆ្គាំឆ្គងក្នុងវិជ្ជាជីវ: ។
ប្រភពបន្តដដែលបានបន្តទៀតថា មន្ត្រីនៃមន្ទីរសុខាភិបាលរូបនេះ មិនបានមកបំពេញការងារ តួនាទីរបស់ខ្លួន ឱ្យបានទៀងទាត់ និងជាប់លាប់នោះទេ គឺមកម្តងម្កាល ប៉ុណ្ណោះ ហើយជារៀងរាល់ដង គេសង្កេតឃើញថា គាត់តែងតែបង្ហោះសារ លើបណ្តាញ សង្គមហ្វេសប៊ុក ផ្សព្វផ្សាយបំភ្លៃព័ត៌មាន អុជអាល ញុះញង់ បំបែកបំបាក់សាមគ្គីរបស់ទ័ពអាវស ដែលពួកគាត់កំពុងតែបំពេញបេសកម្មយ៉ាងមមាញឹក ក្នុងការប្រយុទ្ធប្រឆាំងទៅនឹងជម្ងឺកូវីដ-១៩ ខណ:ដែលជម្ងឺមួយនេះ កំពុងតែផ្ទុះឡើង និងរាតត្បាត នៅតាមបណ្តាខេត្តនានា ដូចជា ខេត្តកណ្តាល ខេត្តកំពង់ស្ពឺ ខេត្តព្រះសីហនុ និងរាជធានីភ្នំពេញជាដើម ។
ដូច្នេះ ទើបនៅក្នុងខេត្តប៉ៃលិន លោកជំទាវអភិបាលខេត្ត រួមជាមួយនឹងមន្ត្រីរាជការមកពីមន្ទីរជុំវិញខេត្ត សហការជាមួយកម្លាំងសមត្ថកិច្ចគ្រប់ស្ថាប័ន ខិតខំសស្រាក់សស្រាំ ក្នុងការយកចិត្តទុកដាក់ យាមកាមនៅតាមច្រកទ្វារអន្តរជាតិ និងច្រករបៀង ដើម្បីទទួលពលករដែលឆ្លងដែនមកពីប្រទេសថៃ ឱ្យចូលធ្វើចត្តាឡីស័ក ។
រីឯពលករ ប្រុសស្រីក្មេងចាស់ ដែលមានស្រុកកំណើតរស់នៅខេត្តផ្សេងៗ ខាងអាជ្ញាធរខេត្តប៉ៃលិន ក៏បានចាត់បញ្ជូនឱ្យអ្នកទាំងនោះ ទៅធ្វើចត្តាឡីស័កនៅក្នុងខេត្តរៀងៗខ្លួន ដោយឡែកអ្នករស់នៅក្នុងខេត្តប៉ៃលិនផ្ទាល់ គឺចូលធ្វើចត្តាឡីស័កនៅតាមមណ្ឌលនានាក្នុងខេត្ត រយ:ពេល១៤ថ្ងៃ ទើបអាចអនុញ្ញាតឱ្យជួបជុំក្រុមគ្រួសារ ។
ប្រភពបញ្ជាក់ថា តែក្រោយពីឃើញលោក ខឹម មុនីកុសល ជាមន្ត្រីសុខាភិបាលខាងលើ បានបង្ហោះនូវព័ត៌មាន នៅលើបណ្តាញសង្គមហ្វេសប៊ុក បំភ្លៃការពិត ខណ:រូបគេយូរៗ ម្តង ទើបចូលទៅកន្លែងចត្តាឡីស័ក ក៏ត្រូវបានលោកជំទាវ អភិបាលខេត្តប៉ៃលិន ធ្វើការបណ្តេញចេញពីក្របខណ្ឌមន្ត្រីតែម្តង ។
បើយោងតាមព្រះរាជក្រឹត្យស្តីពីលក្ខន្តិកៈ ដោយឡែកសម្រាប់បុគ្គលិករដ្ឋបាលថ្នាក់ក្រោមជាតិ មាត្រាទី៦៣ ការអនុវត្តខាងទណ្ឌកម្ម វិន័យទី២ ត្រូវសម្រេចដីការបស់រដ្ឋបាលថ្នាក់ក្រោមជាតិ ក្រោយពីមានយោបល់របស់ក្រុមប្រឹក្សាវិន័យ ក៏សម្រេចដកបុគ្គលរូបនេះចេញពីក្របខណ្ឌតែម្តង ។ អាស្រ័យហេតុនេះ សូមសារណៈមតិ និងមហាជនមេត្តាជ្រាប ៕
