(បាត់ដំបង)÷ដោយអនុវត្តន៍តាមការណែនាំបញ្ជាផ្ទាល់ផ្ទាល់ពីឯកឧត្ដមឧត្ដមសេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបងក៏ដូចជាលោកវរសេនីយ៍ឯក លឹម ពុទ្ធីឡា ស្នងការរងផែនការងារនគរបាលព្រហ្មទណ្ឌ និងមានការសម្របសម្រួលទៅលើនីតិវិធីពីឯកឧត្ដម គឺ ប៊ុណ្ណារ៉ា ព្រះរាជអាជ្ញា នៃអយ្យការអមសាលាដំបូងខេត្តបាត់ដំបងនៅថ្ងៃទី១៦ ខែមីនា ឆ្នាំ២០២១ វេលាម៉ោង១៤:៣០នាទី នៅចំណុចភូមិទួលតាឯក សង្កាត់ទួលតាឯក ក្រុងបាត់ដំបង ខេត្តបាត់ដំបង លោកវរសេនីយ៍ឯក ឈឿង គឹមសុង នាយការិយាល័យនគរបាលព្រហ្មទណ្ឌកម្រិតស្រាលបានដឹកនាំកម្លាំងក្រុមអន្តរាគមន៍បង្ការបង្ក្រាបចុះប្រតិបត្តិការបង្ក្រាបករណីហិង្សា ដោយចេតនាមានស្ថានទម្ងន់ទោស (វាយដោយដំបងដែក) ០១ ករណី និងបានធ្វើការនាំខ្លួនជនសង្ស័យចំនួន០២នាក់ ។
1-ឈ្មោះ ព្រំ សុជាតិ ភេទប្រុសអាយុ២១ឆ្នាំមានទីលំនៅភូមិទួលតាឯកសង្កាត់ទួលតាឯកក្រុងបាត់ដំបងខេត្តបាត់ដំបង។
2-ឈ្មោះ ខា សីហា ហៅ ទិត្យ ភេទប្រុស អាយុ១៩ឆ្នាំ មានទីលំនៅភូមិអូរតាគាំ១ សង្កាត់ទួលតាឯក ក្រុងបាត់ដំបង ខេត្តបាត់ដំបង ។
កាលពីថ្ងៃទី១៤ ខែមីនា ឆ្នាំ២០២១ នៅចំណុចមុខភោជនីយដ្ឋានសាច់អាំងផ្សារលើ ២ ដែលស្ថិតនៅក្នុងភូមិកម្មករសង្កាត់ស្វាយប៉ោ ក្រុងបាត់ដំបង ខេត្តបាត់ដំបង ជនសង្ស័យទាំង ០២ នាក់ខាងលើ បានធ្វើសកម្មភាពយកដំបងដែក និងខ្សែក្រវ៉ាត់ក្បាលដែក វាយទៅលើជនរងគ្រោះឈ្មោះ សយ វិស័យ ភេទប្រុសអាយុ១៩ឆ្នាំ មានទីលំនៅភូមិបោះពោធិ៍ ឃុំអូរដំបង១ ស្រុកសង្កែ ខេត្តបាត់ដំបង ដែលបណ្តាលឲ្យរងរបួសត្រង់ក្បាលផ្នែកខាងស្តាំ ដេរចំនួន០៣ថ្នេរ ត្រង់ក្បាលខាងឆ្វេងដេរចំនួន០៤ថ្នេរ រយៈចុងចិញ្ចើមស្តាំ ដេរចំនួន០៤ថ្នេរ និងហើមប៉ោងភ្នែកខាងស្តាំ។
បច្ចុប្បន្ន ការិយាល័យជំនាញកំពុងតែធ្វើការកសាងសំណុំរឿងដើម្បីបញ្ជូនទៅសាលាដំបូងខេត្តបាត់ដំបងចាត់ការបន្តតាមនីតិវិធី ៕
