ដើម្បីប្រសិទ្ធភាពការងារទប់ស្កាត់ការរីករាលដាលនៃជំងឺកូវីដ១៩ក្រសួងទេសចរណ៍ សូមណែនាំដល់ ម្ចាស់ និងអ្នកគ្រប់គ្រងមូលដ្ឋានអាជីវកម្មសេវាកម្មស្នាក់នៅទេសចរណ៍ ឱ្យបានជ្រាបអំពីការអនុវត្តវិធានការបន្ថែមចំពោះបុគ្គលជាភ្ញៀវទេសចរ និងទីតាំងអាជីវកម្មទេសចរណ៍ ដែលមិនសហការតាមការណែនាំនូវវិធានការមួយចំនួន ដូចខាងក្រោម៖
១. ចំពោះភ្ញៀវទេសចរជាជនបរទេស ត្រូវបណ្តេញចេញពីព្រះរាជាណាចក្រកម្ពុជា និងហាមចូលប្រទេសសារជាថ្មី ស្របតាមខ្លឹមសារមាត្រា៥០ និងមាត្រា៦៨ នៃច្បាប់ស្តីពីទេសចរណ៍ បានចែងថា “ទេសចរ ឬអ្នកដំណើរកម្សាន្តដែលប្រព្រឹត្តល្មើសនឹងមាត្រា៥០ នៃច្បាប់នេះ អាចត្រូវលុបចោលទិដ្ឋាការទេសចរណ៍ ហើយបណ្ដេញចេញ ឬហាមឃាត់វត្តមានក្នុងតំបន់គោលដៅទេសចរណ៍នៃព្រះរាជាណាចក្រកម្ពុជា ក្នុងរយៈពេលកំណត់ណាមួយដែលមិនលើសពី ០៥ (ប្រាំ) ឆ្នាំ ឬជាអចិន្ត្រៃយ៍”។
២. ចំពោះភ្ញៀវទេសចរជាជនជាតិខ្មែរ ត្រូវចាត់វិធានការតាមផ្លូវច្បាប់
៣. ចំពោះទីតាំងអាជីវកម្មទេសចរណ៍ ត្រូវដកហូតអាជ្ញាបណ្ណទេសចរណ៍ និងបិទអាជីវកម្មក្នុងទីតាំងស្របតាមខ្លឹមសារមាត្រា៤៤ និងមាត្រា៤៨ នៃច្បាប់ស្តីពីទេសចរណ៍។ រដ្ឋបាលថ្នាក់ក្រោមជាតិមានសិទ្ធិដាក់ចេញនូវវិធានការអនុវត្តខាងលើនេះចំពោះមូលដ្ឋានអាជីវកម្មទាំងឡាយដែលស្ថិតក្នុងដែនសមត្ថកិច្ចគ្រប់គ្រងរបស់ខ្លួន។
ទទួលបានសេចក្ដីណែនាំនេះសូមម្ចាស់ និងអ្នកគ្រប់គ្រងអាជីវកម្មសេវាកម្មស្នាក់នៅទេសចរណ៍ រៀបចំ និងអនុវត្តតាមការណែនាំប្រកបដោយស្មារតីទទួលខុសត្រូវ។
