ខេត្ដស្វាយរៀង៖ នាព្រឹកថ្ងៃសុក្រ ៧ រោច ខែផល្គុន ឆ្នាំជូតទោស័ក ពុទ្ធសករាជ ២៥៦៤ត្រូវនឹងថ្ងៃទី៥ ខែមីនា ឆ្នាំ២០២១ លោកថោង សាមាន រួមជាមួយលោក នួន លីហួន ប្រធានមន្ទីរសាធារណការ និងដឹកជញ្ជូនខេត្ត លោក មាស សេដ្ឋា នាយកទីចាត់ការហិរញ្ញវត្ថុសាលាខេត្តស្វាយរៀង លោក ហែម សារិទ្ធ អភិបាល លោក ប៉ុល សារិត អភិបាលរងស្រុកស្វាយជ្រំ លោក ញូង យ៉េន មេឃុំ ក្រុមប្រឹក្សាឃុំ លោក ពៅ ស៊ុន មេប៉ុស្តិ៍នគរបាលរដ្ឋបាលបាសាក់ លោកមេភូមិ អនុភូមិ សមាជិកភូមិ ប្រជាជនភូមិបាយ៉ាបមួយចំនួន និងក្រុមការងារសាងសង់ផ្លូវថ្នល់ បានធ្វើពិធីសែនព្រេនតាមប្រពៃណីខ្មែរ សុំទឹក សុំដី និងទីកន្លែង បើកការដ្ឋានសាងសង់ផ្លូវក្រាលក្រួសក្រហម ១ខ្សែ និងដាក់បង្គោលភ្លើង នៅភូមិបាយ៉ាប ឃុំបាសាក់ ស្រុកស្វាយជ្រំ ខេត្តស្វាយរៀង ដែលជាអំណោយរបស់ឯកឧត្ដម ម៉ែន វិបុល អភិបាល នៃគណៈអភិបាលខេត្តស្វាយរៀង។
ក្នុងពិធីនោះ លោកថោង សាមានបានចំណាយថវិកាចំនួន ២០០.០០០រៀល (ពីររយពាន់រៀលគត់) ចូលរួមជាមួយក្រុមប្រឹក្សាឃុំ ទិញគ្រឿងសម្រាប់រៀបចំពិធី។
លោកថោង សាមាន សូមគោរពថ្លែងនូវអំណរអរគុណយ៉ាងជ្រាលជ្រៅបំផុត ជូនចំពោះឯកឧត្ដម ម៉ែន វិបុល អភិបាល នៃគណៈអភិបាលខេត្តស្វាយរៀង ដែលបានផ្ដល់នូវ ផ្លូវថ្មី១ខ្សែដោយក្រាលគ្រួសក្រហម និង ដាក់បង្គោលភ្លើង ជូនបងប្អូនប្រជាជននៅភូមិបាយ៉ាប ឃុំបាសាក់ ស្រុកស្វាយជ្រំ ខេត្តស្វាយរៀង ប្រើប្រាស់ជាប្រយោជន៍សាធារណៈ ។
ក្នុងនោះដែរលោក ថោង សាមាន អនុប្រធានក្រុមការងារចុះមូលដ្ឋានឃុំបាសាក់ និងជាប្រធានក្រុមការងារចុះភូមិបាយ៉ាប សូមគោរពជូនពរឯកឧត្ដម ម៉ែន វិបុល អភិបាលខេត្តស្វាយរៀង សូមមានសុខភាពល្អបរិបូរណ៍ កម្លាំងមាំមួន ជន្មាយុយឺនយូរ ដើម្បីបន្តដឹកនាំ និងអភិវឌ្ឍន៍ខេត្តស្វាយរៀងឱ្យកាន់តែរីកចម្រើនបន្ថែមទៀត។
ជាមួយគ្នាដែរ លោក សូមសំណូមពរដ៏ទទួចចំពោះប្រជាជនរស់នៅភូមិបាយ៉ាប ពិសេសប្រជាជនរស់នៅអមសងខាងផ្លូវថ្មី សូមចូលរួមថែទាំផ្លូវឱ្យបានល្អជានិច្ច ដើម្បីប្រើប្រាស់បានយូអង្វែងតរៀងទៅ។
លោកក៏បានអំពាវនាវដល់បងប្អូនប្រជារដ្ឋទាំងអស់រួមគ្នាប្រយុទ្ធប្រឆាំងនឹងជម្ងឺកូវីដ១៩ទាំងអស់គ្នាដោយធ្វើតាមសេចក្ដីណែនាំរបស់ក្រសួងសុខាភិបាល៕
