ថ្ងៃទី២៧ ខែកុម្ភៈ ឆ្នាំ២០២១ នៅចំណុចភូមិទូកមាស ឃុំទូកមាសខាងលិច ស្រុកបន្ទាយមាស ខេត្តកំពត លោកវរសេនីយ៍ឯក ឈឿង គឹមសុង នាយការិយាល័យនគរបាលព្រហ្មទណ្ឌកម្រិតស្រាលបានដឹកនាំកម្លាំងការិយាល័យជំនាញនិងក្រុមអន្តរាគមន៍បង្ការបង្ក្រាបចុះសហការជាមួយកម្លាំងការិយាល័យនគរបាលព្រហ្មទណ្ឌកម្រិតស្រាលនៃស្នងការនគរបាលខេត្តកំពត ដែលដឹកនាំដោយលោកវរសេនីយ៍ឯក លកញ៉ាវ បានចុះប្រតិបត្តិការអនុវត្តន៍តាមដីកាបញ្ជាឲ្យចូលខ្លួនលេខ០៩អ.យរបស់លោកគឺប៊ុណ្ណារ៉ាតំណាងអយ្យការនៃអយ្យការអមសាលាដំបូងខេត្តបាត់ដំបងបានបញ្ជាឲ្យជនសង្ស័យឈ្មោះ នាក់ ចន្ធូ ហៅធូភេទប្រុស ពាក់ព័ន្ធនឹងករណីលួចមានស្ថានទម្ងន់ទោស(កាច់សោរយកម៉ូតូ) ។
ជនសង្ស័យឈ្មោះ នាក់ ចន្ធូ ហៅធូភេទប្រុស ថ្ងៃខែឆ្នាំកំណើត ១១ ខែកញ្ញាឆ្នាំ១៩៦៦ទីកន្លែងកំណើត ភូមិព្រៃស្រឡៅ ឃុំត្រពាំងសាលា ស្រុកបន្ទាយមាស ខេត្តកំពត បច្ចុប្បន្ន មានទីលំនៅភូមិទូកមាស ឃុំទូកមាសខាងលិច ស្រុកបន្ទាយមាស ខេត្តកំពត ។
ជនសង្ស័យត្រូវរងបណ្តឹងពាក់ព័ន្ធនឹងការកាច់សោរយកម៉ូតូមួយគ្រឿង ម៉ាកហុងដា ឌ្រីមសេ ១២៥ ពណ៌ខ្មៅ ស៊េរីឆ្នាំ២០១៩ ពាក់ស្លាកលេខ ភ្នំពេញ 1HM7683 នៅចំណុចផ្សារឈើទាល ស្ថិតក្នុងភូមិឈើទាល ឃុំឈើទាល ស្រុកបាណន់ ខេត្តបាត់ដំបង កាលពីថ្ងៃទី០៩ខែកុម្ភៈ ឆ្នាំ២០២១ វេលាម៉ោង០៨:៣០នាទី ។
ចំណែកជនរងគ្រោះ ជាម្ចាស់ម៉ូតូ ឈ្មោះ មឿត សាមៀង មានទីលំនៅភូមិកំពង់ស្រមរ ឃុំឈើទាល ស្រុកបាណន់ ខេត្តបាត់ដំបង។
សកម្មភាពឃាត់ខ្លួននេះ គឺដោយអនុវត្តន៍តាមការណែនាំបញ្ជាផ្ទាល់ពីឯកឧត្ដមឧត្ដមសេនីយ៍ទោ សាត គឹមសានស្នងការ នៃស្នងការដ្ឋាននគរបាលខេត្តបាត់ដំបង ក៏ដូចជាលោកវរសេនីយ៍ឯក លឹមពុទ្ធីឡា ស្នងការរងផែនការងារនគរបាលព្រហ្មទណ្ឌ និងមានការសម្របសម្រួលទៅលើនីតិវិធីពីឯកឧត្ដម គឺ ប៊ុណ្ណារ៉ា ព្រះរាជអាជ្ញា នៃអយ្យការអមសាលាដំបូងខេត្តបាត់ដំបង ។
បច្ចុប្បន្ន កម្លាំងយើងកំពុងតែធ្វើការនាំខ្លួនជនសង្ស័យខាងលើទៅស្នងការដ្ឋាននគរបាលខេត្តបាត់ដំបងចាត់ការបន្តតាមនីតិវិធី ៕
