ប៉ៃលិន៖ លោកស្រី បាន ស្រីមុំ អភិបាលខេត្តប៉ៃលិន បានអញ្ជើញ ចុះសាកសួរសុខទុក្ខ និងសំណាលជាមួយ មន្ត្រីសុខាភិបាលខេត្តនៅមន្ទីរសុខាភិបាលខេត្ត ជាមួយការចាក់វ៉ាក់សាំងការពារជំងឺកូវីដ១៩ នៅខេត្តប៉ៃលិន។
លោកស្រី បានមានប្រសាសន៍ថា ការចូលរួមចាក់វ៉ាក់សាំងបង្ការជំងឺកូវីដ១៩ ដោយការស្ម័គ្រចិត្ដ គឺជាកាតព្វកិច្ច និងអនុវត្ដវិធានការសុខាភិបាល ដើម្បីចូលរួមការពារមេរោគកូវីដ១៩ ដោយពុំមានការបង្ខិតបង្ខំគឺជាការស្ម័គ្រចិត្ដ និងកាតព្វកិច្ច ត្រូវទៅជាមួយគ្នា ព្រោះវាសំខាន់ណាស់ ដែលត្រូវតែយកចិត្ដទុក ដាក់ហើយត្រូវតែត្រៀមលក្ខណៈឱ្យបានរួចរាល់ បើការពារខ្លួនមិនឆ្លង វាមានន័យថា ការពារគ្រួសារយើង និងសហគមន៍ យើងមិនឱ្យឆ្លង។ លោកស្រី បានថ្លែងអំណរគុណចំពោះ រាជរដ្ឋាភិបាលដែលតែងតែយកចិត្តទុកដាក់ដល់ប្រជាពលរដ្ឋកម្ពុជា និងបានផ្តល់អាទិភាពចំពោះអ្នកសារព័ត៌មានសំរាប់ការចាក់វ៉ាក់សាំងបង្ការជំងឺកូវីដ១៩នេះ។ លោកស្រី បាន ស្រីមុំ បានសំណូមពរដល់ប្រជាពលរដ្ឋទាំងអស់ និងអ្នកកំពុងធ្វើចត្តាឡីស័ក័ ត្រូវអនុវត្តតាមគោលការណ៍ណែនាំរបស់ក្រសួងសុខាភិបាល ដើម្បីចៀសផុតពីការឆ្លងរីករាលដាលនៃជំងឺកូវីដ១៩សារជាថ្មីនៅក្នុងប្រទេសកម្ពុជា។
លោកស្រីអភិបាលខេត្តបានបន្តថា ក្រោមម្លប់សន្តិភាព ប្រជាជនទទួលបានការអភិវឌ្ឍន៍ រីកចំរើន រស់នៅសុខដុមរមនាបន្តទៀត និងបានថ្លែងអំណរគុណចំពោះរាជរដ្ឋាភិបាលដែលតែងតែយកចិត្តទុកដាក់ដល់ប្រជាពលរដ្ឋកម្ពុជាផងដែរ។
លោក ស្លះ យូ ប្រធានមន្ទីរសុខាភិបាលខេត្តប៉ៃលិនដែល បានទទួលវ៉ាក់សាំងមុនគេនេះបានឲ្យដឹងថា៖ មុនពេលចាក់វ៉ាក់សាំងកូវីដ១៩នេះ ត្រូវបានគ្រូពេទ្យពិនិត្យសុខភាព និងសួរព័ត៌មានអំពីសុខភាពរបស់យើងផងដែរ។ លោកបានបង្ហាញចំណាប់អារម្មណ៍បន្ទាប់ពីការចាក់វ៉ាក់សាំងបង្ការជំងឺកូវីដ១៩ថា លោកពិតជាមានមោទនភាពដែលបានចាក់វ៉ាក់សាំងកូវីដ១៩នេះ លោកសង្ឃឹមថា ប្រជាពលរដ្ឋកម្ពុជានឹងទទួលបាននូវការចាក់វ៉ាក់សាំងកូវីដ១៩ទាំងអស់គ្នា ក្រោមការដឹកនាំរបស់ប្រមុខរាជរដ្ឋាភិបាលកម្ពុជា សម្តេចតេជោ ហ៊ុនសែន។
គួរបញ្ជាក់ថា ខេត្តប៉ៃលិនទទួលបានវ៉ាក់សាំង ស៊ីណូហ្វាម របស់ចិន បង្ការជំងឺកូវីដ១៩ ពីប្រមុខរាជរដ្ឋាភិបាលដំណាក់កាលទី១ នេះមានចំនួន ១២០០ដូស ស្មើនឹងចាក់បានមនុស្សចំនួន ៦០០នាក់ ហើយសម្រាប់មន្ត្រីសុខាភិបាលខេត្តប៉ៃលិនទទួលបានវ៉ាក់សាំងនេះចំនួន ១៩១នាក់ ផងដែរ៕
