(ខេត្តកំពត)៖ នៅរសៀល ថ្ងៃអាទិត្យ ទី២១ ខែកុម្ភៈ ឆ្នាំ២០២១ អគារទីស្នាក់ការគណបក្សប្រជាជនកម្ពុជា ឃុំព្រែកត្នោត ស្រុកទឹកឈូ ខេត្តកំពត ត្រូវបានរៀបចំពិធីក្រុងពាលី និងបេីកការដ្ឋានសាងសង់ ក្រោមអធិបតីភាពដ៏ខ្ពង់ខ្ពស់ លោកជំទាវ អ៊ុន សុគន្ធា អ្នកតំណាងរាស្ដ្រមណ្ឌលខេត្ដកំពត និងជាប្រធានក្រុមការងារគណបក្សប្រជាជនកម្ពុជាថ្នាក់កណ្តាលចុះមូលដ្ឋានស្រុកទឹកឈូ ខេត្តកំពត។ពិធីនេះក៏មានការអញ្ជើញចូលរួមផងដែរពីសំណាក់ លោក លោកស្រី ជាសមាជិកក្រុមការងារគ្រប់ជាន់ថ្នាក់ និងអាជ្ញាធរដែនដីក្នុងតំបន់ផងដែរ។
សូមបញ្ជាក់ថា សំណង់អគារគណបក្សប្រជាជនកម្ពុជា ឃុំព្រែកត្នោត ស្រុកទឹកឈូ ខេត្តកំពត នេះមានទំហំ ១២ម៉ែត្រ គុណ ២០ម៉ែត្រ គ្រោងចំណាយថវិកាអស់ ៧៧,០០០ដុល្លារ ដោយអគារនេះចាប់ផ្តើមសាងសង់នៅថ្ងៃទី២១ ខែកុម្ភៈ ឆ្នាំ២០២១ និងគ្រោងបញ្ចប់ជាស្ថាពរក្នុងរយៈពេល៤ខែ ខាងមុខនេះ ហើយរហូតមកដល់ថ្ងៃនេះ យើងបានរៀបចំចាក់អាចម៍ដីបំពេញរួចរាល់ហើយ។
ក្នុងឱកាសនោះដែរ លោកជំទាវ អ៊ុន សុគន្ធា បានថ្លែងអំណរគុណរយ៉ាងជ្រាលជ្រៅចំពោះក្រុមការងារគណបក្ស និងសប្បុរសជនទាំងអស់ដែលបានចូលរួមឧបត្ថម្ភ បរិច្ចាគថវិកាជួយកសាងស្នាក់ការគណបក្សឃុំព្រែកត្នោត ដើម្បីប្រើប្រាស់ជាប្រយោជន៍រួមក្នុងចលនាបម្រើគណបក្សប្រជាជនកម្ពុជា ឲ្យបានស្ថិតស្ថេរជានិរន្ត៍៕ សេង ណារិទ្ធ
