(ខេត្តកំពត)៖ យោងតាមរបាយការណ៍របស់មន្ទីរទេសចរណ៍ខេត្តកំពត បានឲ្យដឹងថា នៅក្នុងឱកាសចូលឆ្នាំប្រពៃណីជនជាតិចិន-វៀតណាមរយៈពេល៣ថ្ងៃ ខេត្តកំពតមានអ្នកទេសចរជាតិ និងអន្តរជាតិមកទស្សនា សម្រាកលម្ហែកម្សាន្តចំនួន១០២.០២៦មុឺននាក់។
ប្រធានមន្ទីរទេសចរណ៍ខេត្តកំពត លោក សយ ស៊ីណុល បានប្រាប់ឲ្យដឹងផងដែរថា ក្នុងឱកាសចូលឆ្នាំចិន-វៀតណាម ចាប់ពីថ្ងៃទី១២ រហូតដល់ថ្ងៃទី១៤ ខែកុម្ភៈ ឆ្នាំ២០២១នេះ ខេត្តកំពត មានភ្ញៀវទេសចរជាតិ អន្តរជាតិ មកសម្រាកលម្ហែកម្សាន្ត សរុបចំនួន ១០២.០២៦ ក្នុងនោះ ភ្ញៀវទេសចរណ៍ជាតិ មានចំនួន១០១.៣០២នាក់ ភ្ញៀវទេសចរណ៍អន្តរជាតិចំនួន ៧២៤នាក់ ។
ប្រធានមន្ទីរទេសចរណ៍ខេត្តកំពត បានបន្តប្រាប់ឲ្យដឹងដែរថា ផ្ដើមចេញលទ្ធផលខាងលើនេះ ដោយសារមានការជំរុញ និងចង្អុលបង្ហាញ ពីឯកឧត្តមរដ្ឋមន្ត្រីក្រសួងទេសចរណ៍ ក៏ដូចជាឯកឧត្តម ជាវ តាយ អភិបាលខេត្តកំពត ដែលតែងតែយកចិត្តទុកដាក់ កៀរគរ និងលើកទឹកចិត្ត អ្នកវិយោគនានា ជាពិសេសអ្នកវិនិយោគលើវិស័យទេសចរណ៍ឲ្យមកបោះទុនរកស៊ី បានធ្វើឲ្យខេត្តកំពត សម្រេចនូវសមិទ្ធិផលទេសចរណ៍ដ៏ទាក់ទាញជាច្រើនក្នុងរយៈពេលចុងក្រោយនេះ ហើយនឹងមានកន្លែងដ៏ទាក់ទាញជាច្រើនទៀតបាននឹងកំពុងស្ថាបនា។
ជាក់ស្តែង នៅក្នុងឱកាសចួលឆ្នាំចិននេះ គឺដោយសារមានការចូលរួមប្រឹងប្រែងពីមន្ត្រីជំនាញមន្ទីរទេសចរណ៍ និងស្ថាប័នពាក់ព័ន្ធផង ក្នុងការការពារ សន្តិសុខ សណ្តាប់ធ្នាប់សាធារណៈ សុវត្ថិភាព អនាម័យ បរិស្ថានស្អាត សេវាកម្មល្អ ជាពិសេសការអនុវត្តតាមគោលការណ៍ណែនាំរបស់ក្រសួងទេសចរណ៍ ទាំង៦ចំណុច និងការចូលរួមអនុវត្តរបស់សេវាករទេសចរណ៍ទូទាំងខេត្តផងនោះ បានបង្កឱកាសឲ្យខេត្តកំពតស្រូបទាញបានទេសចរច្រើនជាងបណ្តាខេត្តផ្សេងៗមួយចំនួនផងដែរ។
លោកប្រធានមន្ទីរក៏បានបន្តថា នៅក្នុងអំឡុងពេលនេះដែរ មន្ទីរទេសចរណ៍ខេត្ត ក្រោមការណែនាំចង្អុលបង្ហាញ របស់ឯកឧត្តមជាវ តាយអភិបាលខេត្តបានរៀបចំក្រុមការងារចំនួន ៤ក្រុម ដើម្បីចុះតាមគោលដៅ និងកន្លែងផ្តល់សេវាកម្មទេសចរណ៏ជាប្រចាំថ្ងៃ ដើម្បីពង្រឹងគុណភាពសេវាកម្ម អនាម័យ ការគ្រប់គ្រងតម្លៃ សណ្តាប់ធ្នាប់ និងជំរុញការអនុវត្តវិធានសុវត្ថិភាពទេសចរណ៏ ក្នុងការបង្ការទប់ស្កាត់ ការឆ្លងរីករាលដាលជំងឺកូវីដ១៩ តាមការណែនាំរបស់ក្រសួងទេសចរណ៏ និងក្រសួងសុខាភិបាល ។ក្រៅពីនោះមន្ទីរបានសហការជាមួយសមត្ថកិច្ចនានា ក្នុងការរៀបចំសណ្តាប់ធ្នាប់ សុវត្ថិភាព ទេសចរណ៍លើផ្ទៃទឹក ដូចជាការពាក់អាវពោងសុវត្ថិភាព និង ការផ្ទុកមនុស្សតាមទូកទេសចរណ៍ជាដើម។
លោកប្រធានមន្ទីរបានបញ្ជាក់ផងដែរថា ទន្ទឹមនឹងដំណើរកម្សាន្តរបស់ប្រជាពលរដ្ឋក៏ដូចជាភ្ញៀវទេសចរណ៍ជាតិអន្តរជាតិ ក្នុងឱកាសបុណ្យចូលឆ្នាំចិននេះដែរ បើទោះបីមានការប្រព្រឹត្តិទៅបានដោយរលូន និងពោពេញដោយភាពសប្បាយរីករាយក៏ពិតមែន តែមន្ត្រីជំនាញនៅតែបន្តត្រួតពិនិត្យនិងធ្វើការណែនាំដល់អ្នកទេសចរឲ្យមានភាពអនាម័យជាប់ជាប្រចាំ ដើម្បីទប់ស្កាត់ការពារជំងឺកូវីដ១៩។
ប៉ុន្តែទោះបីជាយ៉ាងណា លោក សយ ស៊ីណុល ប្រធានមន្ទីរទេសចរណ៍ខេត្តកំពត ក៏បានបញ្ជាក់ទៀតថា សរុបជារួមចំនួនភ្ញៀវទេសចរមកទន្សនា រយៈពេល៣ថ្ងៃនេះ គិតចាប់ពីថ្ងៃទី១២ រហូតដល់ ថ្ងៃទី១៤ខែកុម្ភៈ ឆ្នាំ២០២១ មានលក្ខណៈល្អប្រសើរ ចំពោះសភាពការណ៏ទូទៅតាមគោលដៅ និងសេវាកម្មទេសចរណ៏ នៃខេត្តខេកំពត បានដំណើរការទៅដោយរលូន ពុំមានបញ្ហាអ្វីកើតឡើង គួរឲ្យកត់សម្គាល់ឡើយ៕ សេង ណារិទ្ធ
