(ខេត្តកំពត)៖ មជ្ឈដ្ឋានក្នុងស្រុកកំពង់ត្រាច បាននឹងកំពុងនាំគ្នារិះគន់ឥតសំចៃ ខណៈដៃព្រែកចំណុចក្រោយបន្ទាយទាហានចាស់(ជាប់គល់ស្ពានកំពង់ត្រាច) ស្រុកកំពង់ត្រាច ខេត្តកំពត ត្រូវគេចាក់ដីលុបលយចូលក្នុងទឹកព្រែកប្រហែល៥០ទៅ ៦០ម៉ែត្រ។
មជ្ឈដ្ឋានដដែលបានបង្ហើបផងដែរថា ដីបន្ទាយនេះមានទំហំប្រមាណបីហិកតា ហើយក្រោយពីបន្ទាយទាហាន(វរ:៣០២)នេះត្រូវបានដោះដូរពីកន្លែងចាស់ ផ្លាស់ទៅទីតាំងថ្មីរួចមក ដីក្នុងបរិវេណបន្ទាយទាំងមូលត្រូវម្ចាស់ដីដែលទិញបានចាក់ដីបំពេញប៉ុន្តែម្ចាស់ដីមិនទាន់ចាក់ដីចូលក្នុងព្រែកនោះទេ។រហូតមកដល់ពេលថ្មីៗនេះ ក្រោយពីបានហ៊ុមព័ទ្ធបាំងរបងជុំជិត ស្រាប់តែម្ចាស់ដីបានជួលគ្រឿងចក្រមកជីកយកអាចម៍ដីដែលចាក់នៅទីនោះស្រាប់ ទៅចាក់បំពេញចូលក្នុងព្រែកកំពង់ត្រាចប្រហែល៥០ទៅ៦០ម៉ែត្របន្ថែមទៀត។
ប្រភពខាងលើបានលួចទម្លាយទៀតថា ក្រៅពីមានករណីចាក់ដីចូលក្នុងព្រែកក្រោយបន្ទាយទាហានចាស់ បើយើងក្រលេកទៅមើលចំណុចបឹងផ្នែកខាងជើងនៃផ្លូវជាតិលេខ៣៣ នៃទីប្រជុំជនស្រុកកំពង់ត្រាចដដែល ក៏មានគេបោះបង្គោលព្រោងព្រាតរហូតដល់ពាក់កណ្តាលបឹង ដើម្បីក្រសោបយកធ្វើជាកម្មសិទ្ធិ ហើយចំពោះករណីបែបនេះ គេមិនទាន់ដឹងថា អាជ្ញាធរក្នុងតំបន់ដឹងឬមិនដឹងនោះទេ។
ជុំវិញការរិះគន់ដូចខាងលើ អភិបាលស្រុកកំពង់ត្រាច លោក អូន ខន បានប្រាប់កម្ពុជាថ្មី តាមទូរស័ព្ទ នៅរសៀលថ្ងៃទី០៨ ខែកុម្ភៈ ឆ្នាំ២០២១នេះថា ចំណុចដៃព្រែកដែលគេចាក់បំពេញនោះ គឺម្ចាស់ដីមានឯកសារគ្រប់គ្រាន់រួចទៅហើយ ទើបគេឈូសឆាយដីដែលចាក់ពីមុនចុះក្រោមតែម្តង។ដោយឡែក ចំពោះបង្គោលដែលគេបោះនៅក្នុងបឹងកំពង់ត្រាចនោះលោកដឹងហើយ ដោយលោកបានឲ្យអភិបាលរងស្រុកកោះហៅមកប្រជុំ២លើកផងដែរ ហើយក៏តម្រូវឲ្យអ្នកបោះបង្គោលក្នុងបឹងយកឯកសារពាក់ព័ន្ធមកបង្ហាញដើម្បីងាយស្រួលធ្វើរបាយការណ៍ជូនថ្នាក់លើ។
លោក អូន ខន អភិបាលស្រុកកំពង់ត្រាច បានសង្កត់ធ្ងន់ថា ទោះជាយ៉ាងណា ដីបឹងធម្មជាតិដែលជាកេរ្ត៍ដំណែលពីដូនតា ពិតជាមិនអាចចេញប្លង់កម្មសិទ្ធិជូនបានឡើយ បើទោះជាពលរដ្ឋដែលបោះបង្គោលក្នុងបឹង អះអាងថាគាត់កាន់កាប់តាំងពីឆ្នាំ១៩៨០ក៏ដោយ៕ សេង ណារិទ្ធ
