(ខេត្តកំពត)៖ សមិទ្ធផលអណ្ដូងទឹកស្អាត និងកន្លែងលាងសម្អាតដៃ ដែលជាអំណោយមនុស្សធម៌របស់កាកបាទក្រហមកកម្ពុជា ត្រូវបានសម្ពោធដាក់ឲ្យសិស្សានុសិស្ស និងគ្រូនៅសាលាបឋមសិក្សារលួស ឃុំបឹងទូក ស្រុកទឹកឈូ ខេត្តកំពត ប្រើប្រាស់ដើម្បីថែរក្សាសុខភាព អនាម័យ ពិសេសចូលរួមបង្ការនិងទប់ស្កាត់ការរីករាលដាលនៃជំងឺកូវីដ១៩។
មានប្រសាសន៍សំណេះសំណាលនៅក្នុងពិធីសម្ភោធដាក់ឱ្យប្រើប្រាស់នូវសមិទ្ធផលអណ្តូងទឹកស្អាត និងកន្លែងលាងសម្អាតដៃ ដែលជាអំណោយមនុស្សធម៌របស់សាខាកាកបាទក្រហមកម្ពុជាខេត្តកំពត ជូនលោកគ្រូ អ្នកគ្រូ សិស្សានុសិស្សនៅសាលាបឋមសិក្សារលួស ស្ថិតក្នុងភូមិរលួស ឃុំបឹងទូក ស្រុកទឹកឈូ ខេត្តកំពត នៅព្រឹកថ្ងៃទី០៣ ខែកុម្ភៈឆ្នាំ ២០២១ លោកស្រីលាង ហៃ ជាវតាយ អនុប្រធានអចិន្ត្រៃយ៍គណៈកម្មាធិការសាខា តំណាងឯកឧត្តម ជាវ តាយ ប្រធានគណៈកម្មាធិការសាខាកាកបាទក្រហមខេត្តនិងជាអភិបាលខេត្ត បានពាំនាំនូវការផ្តាំផ្ញើការសួរសុខទុក្ខ របស់សម្តេចកិត្តិព្រឹទ្ធបណ្ឌិតប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនដល់ លោកគ្រូ អ្នកគ្រូ និងកុមារតូចៗ ដែលជាសិស្សានុសិស្សទាំងអស់ជាទីនឹករលឹក ដែលជានិច្ចកាលសម្តេចកត្តិព្រឹទ្ធបណ្ឌិតតែងបានយកចិត្តទុកដាក់ខ្ពស់ ពីសុខទុក្ខរាល់បញ្ហានានារបស់ប្រជាពលរដ្ឋទូទៅ ពិសេសការផ្ដាំផ្ញើដល់លោកគ្រូ អ្នកគ្រូ សិស្សានុសិស្សទាំងអស់នៅឱកាសនោះ ឲ្យបន្តមានការយកចិត្តទុកដាក់ខ្ពស់ពីបញ្ហាថែរក្សាអនាម័យ គិតគូរថែទាំសុខភាព ឱ្យបានកាន់តែល្អប្រសើរថែមទៀត។ដូចជាការពិសាទឹកដាំពុះ លាងសម្អាតដៃនិងសាប៊ូឱ្យបានស្អាតញឹកញាប់ជាប្រចាំមុនពេលបរិភោគអាហារ ដើម្បីបង្ការជំងឺផ្សេងៗ ហើយរឹតតែពិសេសទៅទៀតនោះត្រូវបង្កើនការប្រុងប្រយ័ត្ននិងចូលរួមក្នុងការបង្ការទប់ស្កាត់ ជំងឺកូវីស១៩ផងដែរ។
លោកស្រី លាង ហៃ ជាវតាយ ក៏បានជំរុញ លើកទឹកចិត្តដល់លោកគ្រូ អ្នកគ្រូ បន្តយកចិត្តទុកដាក់ខិតខំអប់រំបណ្តុះបណ្តាលធនធានមនុស្សដែលជាកុមារ ពីវ័យក្មេងឲ្យបានកាន់តែល្អ និងមានគុណភាព ព្រោះកុមារជាទំពាំងស្នងឬស្សី ជាមូលដ្ឋានសម្រាប់ការអភិវឌ្ឍនិងជាអនាគតដ៏បវររបស់ប្រទេសជាតិ។ ចំណែកឯសិស្សានុសិស្ស ក៏ត្រូវខិខំរៀនសូត្រស្តាប់ដំបូន្មានឳពុកម្តាយ និងលោកគ្រូអ្នកគ្រូ ដើម្បីក្លាយខ្លួនជាអ្នកស្នងប្រទេសជាតិ ក៏ល្អសម្រាប់អនាគតប្រទេសជាតិផងដែរ ។
ជាមួយឱកាសនោះ លោកស្រីក៏បានលើកទឹកចិត្តដល់លោកគ្រូ អ្នកគ្រូ និងសិស្ស សូមចូលរួមប្រើប្រាស់សន្សំសំចៃទឹក ទាំងនៅក្នុងនិងក្រៅសាលា ដើម្បីឆ្លើយតបតាមការណែនាំ និងអំពាវនាវរបស់រាជរដ្ឋាភិបាល ក្នុងការបង្ការ ការខ្វះខាតទឹកប្រើប្រាស់ ពេលជួបគ្រោះរាំងស្ងួតដោយសារបញ្ហាបម្រែបម្រួលអាកាសធាតុ និងចូលរួមថែរក្សាអណ្តូងទឹកស្អាតនេះឲ្យបានប្រើប្រាស់យូរអង្វែង។
ក្នុងឱកាសនោះក៏បានផ្តល់អំណោយរួមមានសៀវភៅសរសេរ ប៊ិច ខ្មៅដៃ និងថវិកាមួយចំនួនជូនដល់សិស្សានុសិស្ស ចំនួន ២៦៣នាក់និងថវិកាមួយចំនួនទៀតដល់លោកគ្រូអ្នកគ្រូ ផងដែរ៕ សេង ណារិទ្ធ
