ខេត្តប៉ៃលិន ៖ ថ្ងៃទី០២ ខែកុម្ភៈ ឆ្នាំ២០២១ នៅសាលប្រជុំធំសាលាខេត្ត បានបើកកិច្ចប្រជុំសាមញ្ញលើកទី២០ របស់ក្រុមប្រឹក្សាខេត្ត អាណត្តិទី៣ ដែលកិច្ចប្រជុំនេះស្ថិតក្រោមអធិបតីភាព ឯកឧត្តម ជា ចាន់ឌិន ប្រធានក្រុមប្រឹក្សាខេត្តស្តីទី លោកជំទាវ បាន ស្រីមុំ អភិបាលនៃគណអភិបាលខេត្ត ព្រមទាំងមានការអញ្ជើញចូលរួមពី សមាជិកក្រុមប្រឹក្សាខេត្ត ឯកឧត្តមអភិបាលរងខេត្ត អភិបាលក្រុងស្រុក កងកម្លាំងទាំងបីប្រភេទ មន្ទីរអង្គភាពពាក់ព័ន្ធជុំវិញខេត្ត និងមេឃុំចៅសង្កាត់ផងដែរ។
កិច្ចប្រជុំបានប្រព្រឹត្តិទៅដែលមានរបៀបវារៈសំខាន់ៗចំនួន៦ គឺ៖
ទី១.ពិនិត្យ និងអនុម័តកំណត់ហេតុកិច្ចប្រជុំសាមញ្ញលើកទី១៩ ។
ទី២.ពិនិត្យ និងអនុម័តរបាយការណ៍ស្តីពីការអនុវត្តការងាររបស់រដ្ឋបាលខេត្តប្រចាំខែមករា ឆ្នាំ២០២១។
ទី៣.ពិនិត្យ និងអនុម័របាយការណ៍ស្តីពីការអនុវត្តការងារប្រចាំឆ្នាំ២០២០ របស់រដ្ឋបាលខេត្ត ។
ទី៤.ពិនិត្យ និងអនុម័តកម្មវិធីវិនិយោគបីឆ្នាំរំកិល ២០២២-២០២៣។
ទី៥.ពិនិត្យ និងអនុម័តប្រតិទិនការងារសម្រាប់រៀបចំកម្មវិធីវិនិយោគបីឆ្នាំរំកិល ២០២២ -២០២៣ និងទី៦. បញ្ហាផ្សេងៗ។
ឯកឧត្តមសមាជិកក្រុមប្រឹក្សាខេត្តបានលើកបញ្ហាប្រឈមមួយចំនួនដូចជា៖បញ្ហារបាយការណ៍នៅតាមន្ទីរមួយចំនួនដាក់មកដដែលៗ, បញ្ហាផ្សារសាមគ្គីគ្មានសណ្តាប់ធ្នាប់ឃើញនៅមានចតឡាន ម៉ូតូរញេរញ៉ៃលើដងផ្លូវ និងនៅមានអ្នកបើកបរបញ្ច្រាស់ទិសមិនគោរពស្លាកចរាចរណ៍, បញ្ហាបរិស្ថាននៅក្នុងក្រុងពិសេសផ្លូវវាងក្រុង, បញ្ហាសៃឡូដាក់សៀសំណរតាមជញ្ជីង, បញ្ហាឡានធំចេញតាមច្រកព្រំដែនបើកបរលឿនដែលងាយបង្ករហានិភ័យដល់បងប្អូនប្រជាពលរដ្ឋ ។
លោកជំទាវ បាន ស្រីមុំ អភិបាលនៃគណអភិបាលខេត្តបានមានប្រសាសន៍ថា៖ រាល់បញ្ហាប្រឈមដែលសមាជិកក្រុមប្រឹក្សាបានលើកឡើងក្នុងកិច្ចប្រជុំនេះ រដ្ឋបាលខេត្តទទួលយក និងខិតខំប្រឹងប្រែងធ្វើការដោះស្រាយអោយបានទាន់ពេលវេលា ដូច្នេះហើយសូមអោយមន្ទីរអង្គភាពទាំងអស់ជុំវិញខេត្តត្រូវតែធ្វើការកែសម្រួលឡើងវិញនូវអ្វីដែលបានលើកឡើងនេះ ។ ជាពិសេសត្រូវរៀបចំបែងចែកអោយមន្ត្រីរបស់យើងមានការងារតាមជំនាញនីមួយៗអោយបានច្បាស់លាស់។
លោកជំទាវបានបន្តថា៖ ចំពោះបញ្ហាបរិស្ថានសូមអោយអាជ្ញាធរក្រុងស្រុកត្រូវពិនិត្យមើលឡើងវិញ ដោយធ្វើជាឃ្លីបសំលេងពីបរិស្ថាន ដើម្បីធ្វើការផ្សព្វផ្សាយអប់រំដល់បងប្អូនប្រជាពលរដ្ឋអោយយល់ដឹងពីបរិស្ថានកុំបោះចោលសម្រាមឬកាកសំណលពាសវាលពាសកាលនៅតាមដងផ្លូវសារណៈ និងនៅតាមសួនច្បារដែលនាំអោយខូចសោភ័ណ្ឌភាពទីក្រុង។ ជាពិសេសមន្ទីរអប់រំ យុវជន និងកីឡាខេត្តត្រូវបញ្ជ្រាបការផ្សព្វផ្សាយដល់សិស្សានុសិស្សនៅតាមសាលារៀននីមួយៗអោយយល់ដឹងពីការអនាម័យបរិស្ថាននៅតាមសាលារៀន តាមផ្ទះ និងនៅតាមទីប្រជុំជនបទនានា។ ហើយចំពោះរឿងសណ្តាប់ធ្នាប់នៅផ្សារសាមគ្គីសូមអោយស្នងការដ្ឋាននគរបាលខេត្តប៉ៃលិនត្រូវចាត់មន្ត្រីនគរបាលអោយចុះរៀបចំសណ្តាប់ធ្នាប់នូវបរិវេនផ្លូវជុំវិញផ្សារប៉ាហ៊ី និងពន្យល់ណែនាំដល់បងប្អូនប្រជាពលរដ្ឋអោយយល់ដឹងពីស្លាកសញ្ញាចរាចរដែលដាក់នៅកន្លែងផ្លូវចូលផ្សារ កុំជិះបញ្ច្រាស់ផ្លូវដែលធ្វើកកស្ទះចរាចរណ៍។
លោកជំទាវបានបន្តទៀតថា៖ សូមអោយស្នកការនគរបាលខេត្តនិងមន្ត្រីប្រចាំច្រកព្រំ ត្រូវណែនាំនិងមានវិធានការយ៉ាងតឹងរឹងចំពោះឡានដឹកទំនិញធំៗចេញតាមច្រកព្រំដែនកម្ពុជាថៃ ដែលបើកបរលឿនៗធ្វើអោយបងប្អូនប្រជាពលរដ្ឋមានការភ័យខ្លាច និងរៀបចំដាក់ស្លាកសញ្ញាចរាចរណ៍កំណត់ល្បឿនចំពោះឡានធំៗចាប់ពីច្រកចេញរហូតដល់ក្រុង។
លោកជំទាវអភិបាលខេត្តបានជម្រុញអង្គភាពមន្ទីរជំនាញជុំវិញខេត្តត្រូវបន្តចុះមូលដ្ឋានអោយដល់គោលដៅ និងបម្រើសេវាសាធារណៈជូនដល់បងប្អូនប្រជាពលរដ្ឋអោយមានប្រសិទ្ធភាពនិងទាន់ពេលវេលា។ ពិសេសចូលរួមសហការគ្នាទប់ស្កាត់នៃការរីករាល់ដាលជំងឺឆ្លងមេរោគកូវីដ-១៩អោយបានយ៉ាងម៉ឺងម៉ាត់។
ឯកឧត្តម ជា ចាន់ ប្រធានក្រុមប្រឹក្សាខេត្តស្តីទីបានមានប្រសាសន៍បូកសរុបលទ្ធផលនៃកិច្ចប្រជុំដោយបានធ្វើការអនុម័តកំណត់ហេតុកិច្ចប្រជុំសាមញ្ញលើកទី១៩, បានអនុម័តរបាយការណ៍ស្តីពីការអនុវត្តការងាររបស់រដ្ឋបាលខេត្តប្រចាំខែមករា ឆ្នាំ២០២១, បានអនុម័របាយការណ៍ស្តីពីការអនុវត្តការងារប្រចាំឆ្នាំ២០២០ របស់រដ្ឋបាលខេត្ត ,បានអនុម័តកម្មវិធីវិនិយោគបីឆ្នាំរំកិល ២០២២-២០២៣ និងបានអនុម័តប្រតិទិនការងារសម្រាប់រៀបចំកម្មវិធីវិនិយោគបីឆ្នាំរំកិល ២០២២ -២០២៣ ។ ឯកឧត្តមបានកោតសសើរចំពោះរដ្ឋបាលខេត្ត និងកង កំលាំងប្រដាប់អាវុធទាំងបីប្រភេទរួមទាំងមន្ទីរអង្គភាពជុំវិញខេត្ត មេឃុំចៅសង្កាត់ទាំងអស់ដែលបានខិតខំប្រឹងប្រែងធ្វើការងារបម្រើសេវាសាធារណៈជូនដល់បងប្អូនប្រជាពលរដ្ឋបានល្អប្រសើរ។ ឯកឧត្តមបានស្នើដល់ថ្នាក់ដឹកនាំ មន្ទីរអង្គភាពជុំវិញខេត្ត ត្រូវបង្កើនកិច្ចសហការ សាមគ្គីគ្នាផ្ទៃក្នុង បំពេញតួនាទីភារកិច្ចឲ្យបានល្អប្រសើ ដើម្បីរួមចំណែកក្នុងការអភិវឌ្ឍខេត្តប៉ៃលិនឲ្យមានការរីកចម្រើន ។ និងថ្លែងអំណរគុណដល់ឯកឧត្តម លោកជំទាវសមាជិកក្រុមប្រឹក្សា មន្ទីរអង្គភាពទាំងអស់ដែលបានរួមគ្នាផ្តល់មតិយោបល់ល្អៗក្នុងគោលបំណងកែលម្អរការងារមួយចំនួនរបស់រដ្ឋបាលខេត្ត ឲ្យកាន់តែមានភាពល្អប្រសើរបន្ថែមទៀត៕
