ភ្នំពេញ ៖ លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ចបានជំរុញ និងលើកទឹកចិត្តឲ្យមន្ត្រីរាជការពង្រឹងសមត្ថភាពបន្ថែមលើវិស័យអធិការកិច្ច តាមដានការអនុវត្តច្បាប់ ដោះស្រាយពាក្យបណ្តឹង និងផ្សព្វផ្សាយច្បាប់។
ការជំរុញរបស់លោកជំទាវបែបនេះធ្វើឡើងនាព្រឹកថ្ងៃអង្គារ ៥រោច ខែមាឃ ឆ្នាំជូត ទោស័ក ព.ស. ២៥៦៤ ត្រូវនឹង ថ្ងៃទី២ ខែកុម្ភៈ ឆ្នាំ២០២១ ក្នុងឱកាសដែលលោកជំទាវអញ្ជើញជាអធិបតីក្នុងពិធីបើកសន្និបាតបូកសរុបលទ្ធផលការងារប្រចាំឆ្នាំ២០២០ និងទិសដៅការងារឆ្នាំ២០២១ របស់ក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច នៅភោជនីយដ្ឋានទន្លេបាសាក់២។
ថ្លែងក្នុងឱកាសនោះ លោកជំទាវក៏បានមានប្រសាសន៍ថា សន្និបាតនេះមានគោលបំណងត្រួតពិនិត្យវាយតម្លៃ និងបូកសរុបលទ្ធផលការ ងារដែលក្រសួងសម្រេចបានក្នុងឆ្នាំ កន្លងមកនិងដាក់ចេញនូវវិធានការទិសដៅថ្មីៗសម្រាប់អនុវត្តឆ្នាំបន្ទាប់ ដើម្បីបំពេញការងារជូនរាជរដ្ឋាភិបាល និងបម្រើប្រជាជន សំដៅរួមចំណែកពង្រឹងអភិបាលកិច្ចល្អដែលជាឧត្តមប្រយោជន៍របស់សង្គមជាតិទាំងមូលស្របតាមយុទ្ធសាស្ត្រចតុកោណដំណាក់កាលទី៤ ដោយបានកំណត់ នូវអាទិភាព សូចនាករ និងក្របខ័ណ្ឌពេលវេលាច្បាស់លាស់សម្រាប់អនុវត្ត និងយន្តការសម្រាប់តាមដាន ត្រួតពិនិត្យ និងវាយតម្លៃ ផ្អែកលើលទ្ធផលការងារ ព្រមទាំងមានកំណត់ការទទួលខុសត្រូវរបស់ក្រសួង-ស្ថាប័ននៅតាមមុំ ឬវិស័យនីមួយៗឲ្យទទួលបានជោគជ័យតាមផែនការ។
សន្និបាតរយៈពេលមួយថ្ងៃនេះ ក៏មានរបៀបវារៈចំនួន៤ ដែលនឹងត្រូវដាក់ចូលក្នុងកិច្ចពិភាក្សា រួមមាន ៖ ទី១. ការពង្រឹងប្រសិទ្ធភាពកិច្ចការទំនាក់ទំនងជាមួយរដ្ឋសភា-ព្រឹទ្ធសភា និងផ្សព្វផ្សាយច្បាប់។ ទី២. ការពង្រឹងប្រសិទ្ធភាពកិច្ចការរដ្ឋបាល និងហិរញ្ញវត្ថុ។ ទី៣. ការពង្រឹងប្រសិទ្ធភាពកិច្ចការអធិការកិច្ច ទទួលពាក្យបណ្ដឹង និង ដោះស្រាយពាក្យបណ្ដឹង និងទី៤. ការអភិវឌ្ឍធនធានមនុស្ស តាមរយៈវិទ្យាស្ថានអធិការកិច្ច។
ជាមួយគ្នានេះ លោកជំទាវក៏បានស្នើសុំសមាជិក សមាជិកានៃអង្គសន្និបាតឲ្យចូលរួមផ្តល់មតិក្នុងកម្មវិធី ពិភាក្សាឲ្យបានផុលផុសទៅតាមរបៀបវារៈសន្និបាត ហើយចូលរួមគាំទ្រ និងអនុវត្តឲ្យបានសកម្មបន្តទៀតនូវគោលនយោបាយសំខាន់ៗលើវិស័យទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច និងទិសដៅការងារសំខាន់ៗដែលត្រូវអនុវត្តនៅឆ្នាំ២០២១ឲ្យទៅជាចលនារួមដ៏ខ្លាំងក្លាសំដៅសម្រេចឲ្យ បានជាផ្លែផ្កាបន្តទៀត និងបានប្រកាសបើកសន្និបាតជាផ្លូវការ៕
