(ខេត្តកំពត)÷ ក្រុមការងារយុវជនគណបក្សប្រជាជនកម្ពុជា ត្រូវបង្កើនការសាមគ្គីភាពឱ្យកាន់តែស្អិតល្មួតថែមទៀតក្នុងកាតព្វកិច្ចបម្រើផលប្រយោជន៍ប្រជាពលរដ្ឋ។
នេះជាប្រសាសន៍ដ៏មានខ្លឹមសាររបស់លោក ភុន សារពេជ្រ ប្រធានយុវជនគណបក្សប្រជាជនខេត្តកំពត ក្នុងឱកាសផ្តល់ផ្ទះមួយខ្នងជូនប្រជាពលរដ្ឋដែលមានជីវភាពខ្វះខាត ប្តីឈ្មោះ ផាត សារិទ្ធ អាយុ៣៣ឆ្នាំ និងប្រពន្ធ ឈ្មោះ ស៊ិន ធារ៉ា អាយុ២០ឆ្នាំ នៅភូមិបឹងធំខាងកើត ឃុំអង្គសុរភី ស្រុកកំពង់ត្រាច ខេត្តកំពត កាលពីថ្ងៃទី៣១ ខែមករា ឆ្នាំ២០២១។
លោក ភុន សារពេជ្រ បានបន្ថែមទៀតថា ដោយអនុវត្តតាមគោលការណ៍របស់គណបក្ស គឺតម្រូវឱ្យក្រុមការងាររបស់គណបក្សចុះតាមដានបន្តទៀតដើម្បីពិនិត្យពីស្ថានភាព និងការរស់នៅរបស់បងប្អូនប្រជាពលរដ្ឋយើងនៅតាមមូលដ្នាន តើគាត់ជួបផលលំបាក ,ឬមានបញ្ហាប្រឈមអ្វីខ្លះ ហើយយកបញ្ហាទាំងនោះស្រង់ជារបាយការណ៍សម្រាប់ជូនថ្នាក់លើ ដើម្បីរកគន្លឹះដោះស្រាយជាបន្ទាន់ទៅតាមលទ្ធភាពដែលអាចធ្វើទៅបាន។
សូមបញ្ជាក់ដែរថា តាមរបាយការណ៍របស់ក្រុមការងារយុវជនគណបក្សប្រជាជនកម្ពុជា បានឱ្យដឹងថា ផ្ទះដែលសង់ជូនពលរដ្ឋមួយគ្រួសារនៅភូមិបឹងធំខាងកើត ដែលមានប្តីឈ្មោះ ផាត សារិទ្ធ ប្រពន្ធ ឈ្មោះ សុិន ធារ៉ា មានទំហំ ៤ម×៥ម កម្ពស់៣,៥ម៉ែត្រ សង់អំពីដែក ប្រក់ស័ង្កសី ដោយផ្នែកខាងក្រោមរៀបក្រវាត់ថ្ម ចាក់សាប ចំណាយថវិកាសរុបប្រមាណ១ពាន់ដុល្លារ។
របាយការណ៍បានបញ្ជាក់ទៀតថា សរុបមក ក្នុងបំណាច់ខែមករា ឆ្នាំ២០២១ ក្រុមការងារយុវជនគណបក្សប្រជាជនកម្ពុជា សង់ផ្ទះជូនគ្រួសារពលរដ្ឋដែលមានជីវភាពលំបាកបានចំនួន៣ខ្នង ហើយ ក្នុងនោះស្រុកកំពង់ត្រាច១ខ្នង ស្រុកបន្ទាយមាស១ខ្នង និងស្រុកដងទង់១ខ្នង៕ សេង ណារិទ្ធ
