(ភ្នំពេញ)៖ នៅព្រឹកថ្ងៃទី១ ខែកុម្ភៈ ឆ្នាំ២០២១នេះ បានប្រកាសថា នៅឆ្នាំ២០២១នេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា គឺមិនមានគម្រោងលុបពិធីបុណ្យចូលឆ្នាំថ្មី ប្រពៃណីជាតិខ្មែរ ដូចឆ្នាំមុននោះទេ ព្រោះថា កម្ពុជាមានគ្រប់គ្រងស្ថានការណ៍ជំងឺកូវីដ-១៩ និងការចេញ ចូលររបស់ប្រជាពលរដ្ឋ និងពលករខ្មែរ ដែលត្រឡប់មកពីប្រទេសថៃ បានយ៉ាងល្អ។
ការបញ្ជាក់បែបនេះ នេះរបស់សម្តេចតេជោ ធ្វើឡើក្នុងឱកាសអញ្ជើញបើកការដ្ឋានសាងសង់ រោងចក្រប្រព្រឹត្តកម្មទឹកស្អាត-បាក់ខែង និងពិធីសម្ពោធដាក់ឱ្យដំណើរការជាផ្លូវការ រោងចក្រប្រព្រឹត្តកម្មទឹកស្អាតចម្ការមន នៅព្រឹកថ្ងៃទី០១ ខែកុម្ភៈ ឆ្នាំ២០២១នេះ។
ប្រមុននៃរាជរដ្ឋាភិបាលកម្ពុជា បានបញ្ជាក់យ៉ាងដូច្នេះថា៖ «ឆ្នាំនេះ ច្បាស់ណាស់ថាខ្ញុំ គ្មានគម្រោងនឹងលុបនូវបុណ្យចូលឆ្នាំ ដូចកាលពីឆ្នាំទៅក្នុងសភាពការណ៍មិនច្បាស់លាស់ ឆ្នាំទៅមូលហេតុដែលផ្អាក់ គឺថាចូលឆ្នាំនៅតែចូល ប៉ុន្តែ ផ្អាក់ការឈប់សម្រាក ក្នុងពេលចូលឆ្នាំ ហើយវិញ៥ថ្ងៃក្រោយ ឆ្នាំនេះ គ្មានគម្រោងទេ»។
ពាក់ពឹន្ធនឹងចំណុចនេះដែរ សម្តេចតេជោ ហ៊ុន សែន ក៏បានបញ្ជាក់ពីមូលហេតុនៃការលុបចោលការឈប់សម្រាកពិធីបុណ្យចូលឆ្នាំថ្មីកាលើពីឆ្នាំ២០២០ ដោយសារតែមូលហេតុមានប្រជាពលរដ្ឋ និងពលករខ្មែរយើងចំនួនជាង១២ម៉ឺននាក់ បានត្រឡប់មកពីប្រទេសថៃ ចូលមកប្រទេសកម្ពុជា ជាបន្តបន្ទាប់ រួមទាំងប្រជាពលរដ្ឋចេញពីភ្នំពេញដូច្នេះ ត្រង់ចំណុចនេះហើយ ដែលមិនអាចបញ្ជាក់ថា អ្នកណាម្នាក់មានផ្ទុកជំងឺកូវីដ-១៩នោះទេ។
ប្រមុខនៃរាជរដ្ឋាភិបាលកម្ពុជា បានបន្ថែមថា ដោយឡែកសម្រាប់ការមិនលុបពិធីចូលឆ្នាំថ្មី ប្រពៃណីជាតិខ្មែរ នៅឆ្នាំ២០២១នេះ ដោយសារតែប្រទេសកម្ពុជា បានគ្រប់គ្រងសភាពការណ៍ដែលប្រជាពលរដ្ឋខ្មែរ រួមទាំងពលករដែលមកពីប្រទេសថៃ ឱ្យធ្វើចត្តាឡីស័ក នៅតាមមណ្ឌលចត្តាឡីស័ក ដែលបានរៀបចំដោយអាជ្ញាធរខេត្តនៅតាមខេត្តជាប់ព្រំដែនកម្ពុជា-ថៃ បានល្អប្រសើរ។
សម្តេចតេជោ ហ៊ុន សែន បានបញ្ជាក់ថា សង្ឃឹមថា ករណីរាតត្បាតជំងឺកូវីដ -១៩ នៅក្នុងសហគមន៍ គឺមិនមាននោះទេ ប៉ុន្តែ ច្បាប់នៅក្នុងគ្រាមានអាសន្ននឹងមិនត្រូវប្រកាសឱ្យប្រើនោះទេ ដូច្នេះ សូមប្រជាពលរដ្ឋខ្មែរទាំងអស់ ត្រូវមានការប្រុងប្រយ័ត្ន និងអនុវត្តតាមវិធានសុខាភិបាល និងការណែនាំរបស់រដ្ឋាភិបាល រក្សាគម្លាតសុវត្ថិភាព ដើម្បីការពារជំងឺកូវីដ-១៩ នៅក្នុងពិធីបុណ្យឆ្នាំថ្មី។
តាមការបញ្ជាក់របស់សម្ដេចតេជោនាយករដ្ឋមន្ត្រី ប្រទេសកម្ពុជាមិនទាន់រួចផុតពីហានិភ័យនៃការគំរាមកំហែងពីជំងឺកូវីដ១៩នៅឡើយទេ ដោយសារប្រទេសថៃដែលជាប្រទេសជិតខាងកម្ពុជានោះ កំពុងឆ្លងរីករាលដាលនៅក្នុងសហគមន៍ ក្នុងនោះកម្មករកម្ពុជាក៏បានឆ្លងនៅប្រទេសថៃ ១៣៦ នាក់ដែរ ហើយកំពុងសម្រាកព្យាបាល។ ក្រៅពីនោះ ពួកគេក៏បានចូលក្នុងប្រទេសកម្ពុជាវិញបានឆ្លងជំងឺកូវីដប្រមាណ ៧០-៨០ នាក់ ហើយកំពុងសម្រាកព្យាបាល និងកំពុងធ្វើចត្តាឡីស័កនៅតាមបណ្ដាខេត្តជាប់ព្រំដែនថៃ។
សម្ដេចតេជោ ហ៊ុន សែន បានប្រាប់ទៅកាន់អាជ្ញាធរនៅតាមព្រំដែនថា កិច្ចការចម្បងនៅចំពោះមុខនេះ គឺត្រូវខិតខំទប់ស្កាត់យ៉ាងណាកុំឱ្យមានការឆ្លងនៅក្នុងសហគមន៍សាជាថ្មី។
សម្ដេចតេជោបានលើកឡើងថា ប្រទេសអ្នកមានទាំងអស់ មានបច្ចេកទេសជឿនលឿន វេជ្ជសាស្ត្រពូកែជាប្រទេសកម្ពុជារាប់រយដង ប៉ុន្តែបែរជាមានមនុស្សឆ្លង និងស្លាប់ច្រើនទៅវិញ។ រីឯប្រទេសអ្នកក្រក្នុងអាស៊ាន រួមមាន កម្ពុជា ឡាវ ទីម័រខាងកើត ឆ្លងតិចហើយ អត់ទាន់មានមនុស្សស្លាប់ទៀត។
សូមជម្រាបថា ដោយសារពិធីបុណ្យចូលឆ្នាំចិនបានខិតជិតមកដល់ហើយនោះ សម្ដេចតេជោនាយករដ្ឋមន្ត្រី ក៏បានអំពាវនាវដល់ប្រជាពលរដ្ឋដាច់ខាតមិនអាចភ្លេចយុទ្ធនាការ «៣ការពារ» ដែលមានពាក់ម៉ាស លាងដៃ និងរក្សាគម្លាតសុវត្ថិភាពនោះឡើយ ដែលនេះគឺជាការធ្វើសមយុទ្ធប្រឆាំងនឹងជំងឺកូវីដ-១៩។
សូមបញ្ជាក់ថា សម្រាប់ពិធីបុណ្យចូលឆ្នាំថ្មី ប្រពៃណីជាតិខ្មែរ នឹងប្រារព្ធធ្វើឡើងរយៈពេល៣ថ្ងៃ គឺចាប់ពីថ្ងៃ ០៣កើត ខែចេត្រ ដល់ថ្ងៃ ០៥កើត ខែចេត្រ ព.ស២៥៦៥ ត្រូវនឹងថ្ងៃទី១៤ ដល់ថ្ងៃទី១៦ ខែមេសា ឆ្នាំ២០២១៕
