(ខេត្តកំពត)៖ រដ្ឋបាលខេត្តកំពតបាននឹងកំពុងពិភាក្សា លើគម្រោងពង្រីក និងកែលម្អសួនច្បារមាត់ព្រែកកំពតថ្មីមួយកន្លែង ដើម្បីទាក់ទាញភ្ញៀងទេសចរឲ្យមកកម្សន្តនៅខេត្តកំពតច្រើនជាងមុន។ បើតាមប្រសាសន៍របស់ឯកឧត្តមអភិបាលខេត្តថា សួនច្បារថ្មីនេះ ត្រូវធ្វើឲ្យមានសោភណ្ឌភាពស្រស់ស្អាត ធំទូលាយ និងអាចទាក់ទាញទេសចរណ៍ឲ្យមកកម្សាន្តខេត្តកំពតកាន់តែច្រើនជាងមុន។
កំពត គឺជាខេត្តគោលដៅទេសចរណ៍មួយទាក់ទាញ ក្នុងចំណោមខេត្តជាប់តំបន់មាត់សមុទ្រកម្ពុជា ហើយទោះស្ថិតនៅក្នុងអន្តរកាលកូវីដ១៩ ឆ្នាំ២០២០កន្លងទៅខេត្តមួយនេះ បានទទួលភ្ញៀវទេសចរមកកម្សាន្តជិតពីរលាននាក់។ ទន្ទឹមឆ្នេរខ្សាច់កម្សាន្ត និងកំពង់ផែរទេសចរណ៍អន្តរជាតិរបស់ខេត្តនេះ បាននឹងកំពុងស្ថាបនាជិតរួច រដ្ឋបាលខេត្តបានផ្តួចផ្តើមគំនិត ពិភាក្សាលើគម្រោងពង្រីក និងកែលម្អសួនច្បារមាត់ព្រែកកំពតថ្មី ដើម្បីបម្រើប្រយោជន៍ច្រើនយ៉ាង ទាំងទាក់ទាញទេសចរផង និងដើម្បីការពារទឹកជន់លិចចូលក្នុងក្រុងនារដូវវស្សាផង។
ប្រធានមន្ទីររៀបចំដែនដីនគរូបនីយកម្ម សំណង់និងសុរិយោដីខេត្ត លោក ដាញ់ សារី នៅក្នុងកិច្ចប្រជុំ ដាក់ឆ្លងគម្រោងកែលំអនិងពង្រីកសួនច្បារថ្មីមាត់ព្រែកកំពត កាលពីរសៀលថ្ងៃទី២០ ខែមករាឆ្នាំ២០២១ បានធ្វើបទបង្ហាញអំពីគម្រោងកែលម្អ និងពង្រីកសួនច្បារមាត់ព្រែកកំពតថ្មីដែលស្ថិតនៅតាមដងព្រែកកំពង់បាយ សង្កាត់កំពង់បាយ ក្រុងកំពតថា សួនច្បារថ្មីមានប្រវែង៦៣៣ម៉ែត្រ ទទឹមសួនប្រមាណ៣៤ម៉ែត្រ (ពង្រីកបន្ថែម១៥ម៉ែត្រ) លាតសន្ធឹងពីខាងត្បូងគល់ស្ពានថ្មី រហូតដល់គល់ស្ពានឥន្ទធនូចាស់ ។
តាមគំនូសពង្រៀងប្លង់ក្នុងបទបង្ហាញ សួនច្បារថ្មីនេះ មានរូបសំណាកតំណាងសួនច្បារខេត្តកំពត, ឃឿនសួនច្បារខាងមាត់ទឹកត្រូវធ្វើឲ្យខ្ពស់ជាងមុន និងមានបង្កាន់ដៃការពារផង , ស្ពានដើរឆ្លងចូលទៅក្នុងព្រែក សម្រាប់ថតអនុស្សាវរីយ៍ , សួនកុមារ និងកន្លែងហាត់ប្រាណ , ចំណតរថយន្ត និងម៉ូតូ , ផ្លូវសម្រាប់ដើរ និងរត់ហាត់ប្រាណ,ផ្លូវសម្រាប់ជិះកង់ និងមានសួនច្បារដាក់បង់សម្រាប់អង្គុយលេង រួមនឹងការដាំដើមឈើលម្អសោភ័ណភាពផងដែរ។
ឯកឧត្តម ជាវ តាយ អភិបាលខេត្តកំពត បានមានប្រសាសន៍ថា គម្រោងកែលម្អនិងពង្រីកសួនច្បារថ្មីនេះ មានសារៈសំខាន់ក្នុងការបម្រើដល់ផលប្រយោជន៍សាធារណៈ ប្រជាពលរដ្ឋខេត្តកំពត និងដើម្បីបំពេញតម្រូវការភ្ញៀវទេសចរផងដែរ។ ដូច្នេះត្រូវធ្វើឲ្យមានសោភ័ណ្ឌភាពស្រស់ស្អាត ធំទូលាយ ហើយទាក់ទាញ ជាងមុន ។
ឯកឧត្តមសង្កត់ធ្ងន់ថា បើត្រើយខាងកើតមានសួនច្បារស្អាត ទាក់ទាញ ត្រើយខាងលិចនៅទុលមុខក៏ត្រូវតែរៀបចំឲ្យស្អាត និងទាក់ទាញដែរ យ៉ាងហើចណាស់ត្រូវមានផ្លូវបេតុងជាប់មាត់ព្រែកមួយខ្សែ បំពាក់ភ្លើងបំភ្លឺលម្អមាត់ព្រែក។
ទោះជាយ៉ាងណាក៏ដោយ គេមិនទាន់ដឹងថា គម្រោងពង្រីកសួនច្បារថ្មីនេះ ចំណាយថវិកាអស់ប៉ុន្មាននោះទេ ប៉ុន្តែការស្ថាបនាសាងសង់ត្រូវចាប់ផ្តើមចុងខែនេះ ហើយគ្រោងនឹងបញ្ចប់នៅមុនថ្ងៃបុណ្យចូលឆ្នាំថ្មីមកដល់ ៕ សេង ណារិទ្ធ
