(ខេត្តកំពត)៖ ថ្វីត្បិតប្រទេសយើង ពិសេសខេត្តកំពត កំពុងជួបវិបត្តិនៃជំងឺកូវីដ១៩ ប៉ុន្តែបើក្រលេកមកមើលការដាំដុះដំណាំម្រេចរបស់កសិករ ហាក់នៅតែផុលផុសដដែល រីឯតម្លៃក៏នៅតែខ្ពស់ដូចមុន។
ខាងលើនេះជាការលើកឡើងរបស់ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកំពត គឺលោក ចាន់ រិទ្ធិ បានប្រាប់អ្នកយកព័ត៌មាន នៅព្រឹកថ្ងៃទី២០ ខែមករា ឆ្នាំ២០២១ នេះ។
លោក ចាន់ រិទ្ធិ បានបញ្ជាក់ឲ្យដឹងផងដែថា ថ្វីត្បិតព្រះរាជាណាចក្រកម្ពុជា ពិសេសខេត្តកំពតបានទទួលរងនូវវិបត្តិជំងឺកូវីដ ១៩ ប៉ុន្តែដំណាំម្រេចនៅតែបន្តការដាំដុះជាបន្តបន្ទាប់លើផ្ទៃដីជិត៣០០ហិកតា ដោយការផលិតម្រេចនេះមានសហគមន៍មួយដែលកំពុងគ្រប់គ្រងមើលការខុសត្រូវ ថែមទាំងមានក្រុមហ៊ុនចំនួន៤ រួមសហការដើម្បីទិញផលិតផលម្រេចសម្រាប់បន្តចែកចាយនៅលើទីផ្សារអន្តរជាតិ។
ទាក់ទងនឹងការងារដាំម្រេច លោក ងួន ឡាយ ប្រធានសហគមន៍ម្រេចកំពត បានប្រាប់អ្នកយកព័ត៌មាននៅព្រឹកថ្ងៃដដែលថា ផ្ទែដីបង្កបង្កើនផលម្រេចក្នុងសហគមន៍មានសរុបជាង២៩០ហិកតា ក្នុងនោះយើងអនុវត្តលើផ្ទៃដី១០០% ដោយទទួលទិនផលបានខ្ពស់គួរសម ហើយបច្ចុប្បន្នទីផ្សារម្រេចកំពតក៏នៅតែមានតម្លៃហាងឆេងខ្ពស់ដូចមុនដដែល ពោលគឺតម្លៃទីផ្សារនៅថេរបែបនេះ រយៈពេល៥ឆ្នាំមកហើយ។
លោក ងួន ឡាយ បានបន្ថែមថា ក្នុងសហគមន៍ម្រេចកំពតមានក្រុមហ៊ុនចំនួន៤ កំពុងសហការដើម្បីទិញម្រេចពីកសិករនៅតំបន់នេះដើម្បីវិនិយោគទៅក្រៅប្រទេស ដូចជាក្រុមហ៊ុន ហ្វាមលីង ក្រុមហ៊ុន អុីយូលែន ក្រុមហ៊ុន ផារ៉ាដាយ និងក្រុមហ៊ុន កាំយ៉ា ដោយក្រុមហ៊ុនទាំងនោះបានកង់ត្រាជាមួយកសិករ(អ្នកដាំម្រេចខ្នាតតូច)ប្រមាណ១៧៥គ្រួសារ ដើម្បីទិញម្រេចនាំចេញទៅក្រៅប្រទេស ហើយក្រុមហ៊ុនទិញទៅតាមតម្លៃម្រេចមាន៣ប្រភេទ៖ ទី១-ប្រភេទម្រេចខ្មៅ ១គីឡូក្រាម តម្លៃ១៥ដុល្លារ ,២-ម្រេចក្រហម ១គីឡូក្រាម តម្លៃ២៥ដុល្លារ,ទី៣-ម្រេច ស ១គីឡូក្រាម តម្លៃ២៨ដុល្លារ។ ប៉ុន្តែក្នុងនោះជួនកាលក៏មានក្រុមហ៊ុនខ្លះសុំចរចារតម្លៃទាបជាងនេះ ហើយក៏មានក្រុមហ៊ុនខ្លះផ្តល់តម្លៃលើសពីការកំណត់ផងដែរ។
ជាមួយនេះប្រធានសហគមន៍ម្រេចកំពត បានបង្ហើបថា ការងារដាំដុះដើម្បីទាញយកផលម្រេចក្នុងរដូវណាក៏ទទួលបានភោគផលល្អ ដោយសារកសិករក្នុងសហគមន៍របស់លោក សុទ្ធតែមានបទពិសោធន៍ខ្ពស់ មានជំនាញច្បាស់លាស់ ក្នុងការថែទាំដំណាំម្រេច ពិសេសមានបច្ចេកទេសផ្នែកផលិតកម្ម មានជំនាញកំចាត់សត្វល្អិតបានទាន់ពេលវេលា ថែមទាំងទប់ស្កាត់បាននូវហានិភ័យផ្សេងៗទៀតផង៕ សេង ណារិទ្ធ
