(ប៉ៃលិន) ៖ នៅរសៀលថ្ងៃសុក្រ ថ្ងៃទី១៥ ខែមករា ឆ្នាំ២០២១នេះលោកជំទាវ បាន ស្រីមុំ អភិបាល នៃគណៈអភិបាលខេត្តប៉ៃលិន បានអញ្ជើញជួបសំណេះសំណាល សួរសុខទុក្ខ ថ្នាក់ដឹកនាំ មន្ត្រីរាជការ ចំនួនពីរមន្ទីរផ្សេងគ្នាគឺ មន្ទីរ កសិកម្ម រុក្ខាប្រមាញ់ និងនេសាទនិង មន្ទីរការងារ និងបណ្តុះបណ្តាលវិជ្ជាជីវៈ ខេត្តប៉ៃលិន ។
លោកជំទាវ បាន ស្រីមុំ បានផ្ញើសារទៅប្រធានមន្ទីរអង្គភាពថា សូមកុំឡូយឆាយនឹងសម្ភារៈនិយមទំនើបៗ ឯកូនចៅ និងកន្លែងធ្វើការមើលមិនយល់ គ្មានសណ្តាប់ធ្នាប់ របៀបរៀបរយ ត្រូវស្រឡាញ់កន្លែងធ្វើការ អោយដូចស្រឡាញ់ផ្ទះខ្លួនឯងដែរ ។
ក្នុងកីច្ចសំណេះសំណាលនេះដែរលោកជំទាវអភិបាលខេត្ត ជាមួយមន្ទីរពាក់ព័ន្ធនិមួយៗដើម្បីសម្រួល បែបបទរដ្ឋបាលផ្សេងៗ ឲ្យការងារដំណើរការទៅដោយរលូនក្នុងការបំរើការងារមានភាពទទួលខុសត្រូវនិងតម្លាភាព។
ជាមួយគ្នានោះដែរលោកជំទាវអភិបាលខេត្តក៍បានណែនាំដល់ថ្នាក់ដឹកនាំនិងមន្ត្រីរាជាការនៅតាមមន្ទីរនីមួយៗត្រូវមានសាមគ្គីភាពផ្ទៃក្នុងសហការគ្នាក្នុងមន្ទីរសាម៉ីនិងនៅអង្គភាពដ៍ទៃបំពេញការងារតាមតួនាទីដោយទទួលខ្ពស់ ពិសេស ត្រូវខិតខំបម្រើសេវាសាធារណៈ ជូនប្រជាពលដ្ឋអោយបានលឿន និងមានប្រសិទ្ធភាព កុំប្រកាន់បក្សពួក សាច់ញាតិ បងប្អូនឡើយ។
លើសពីនេះ ត្រូវចូលរួមសម្អាតបរិស្ថាន អនាម័យនៅតាមកន្លែងធ្វើការរបស់ខ្លួន អោយស្រស់ស្អាត គ្មានសម្រាម ដើម្បីរក្សាសោភ័ណភាព ទាក់ទាញការចាប់អារម្ភពីភ្ញៀវទេសចរ និងចូលរួមផ្សព្វផ្សាយ បង្ការ ទប់ស្កាត់ការរីករាលដាលវីរុសកូវីដ១៩ ចូលក្នុងសហគមន៍។
