ខេត្តបាត់ដំបង ៖ នៅថ្ងៃទី ១៤ ខែ មករា ឆ្នាំ ២០២១ វេលាម៉ោង ១០:៥៤នាទី នៅចំណុចផ្ទះសំណាក់ ផាម ទ្រី ស្ថិតក្នុងភូមិកម្មករ សង្កាត់ស្វាយប៉ោ ក្រុងបាត់ដំបង ខេត្តបាត់ដំបង ការិយាល័យនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តបាត់ដំបង លោកវរសេនីយ៍ឯក ឈឿង គឹមសុង នាយការិយាល័យនគរបាលព្រហ្មទណ្ឌកម្រិតស្រាល បានដឹកនាំកម្លាំងក្រុមអន្តរាគមន៍ បង្ការ បង្ក្រាបចុះប្រតិបត្តិការ ធ្វើការនាំខ្លួនជនសង្ស័យ ០១ នាក់ ឈ្មោះ អឿត ពេក ភេទប្រុស អាយុ ៣១ឆ្នាំ មានទីលំនៅមិនពិតប្រាកដ ពាក់ព័ន្ធនឹងករណី លួចមានស្ថានទម្ងន់ទោស ( គាស់តូបលក់ខោអាវ ) ដែលប្រព្រឹត្តឡើងនៅចំណុច ផ្សារ ភ្ជាវ ឃុំត្រែង ស្រុករតនៈមណ្ឌល ខេត្តបាត់ដំបង កាលពីថ្ងៃទី ១០ ខែធ្នូ ឆ្នាំ ២០២១ ។
ជនសង្ស័យខាងលើបានធ្វើសកម្មភាពគាស់សោរទ្វារតូប រួចលួចយក ខោអាវដែលតាំងលក់ របស់ជនរងគ្រោះឈ្មោះ អ៊ុក ស្រីអូន ភេទស្រី អាយុ ៥០ឆ្នាំ មានទីលំនៅភូមិភ្ជាវ ឃុំត្រែង ស្រុករតនៈមណ្ឌល ខេត្តបាត់ដំបង ។
សម្ភារៈបាត់បង់មាន ៖ – ខោ ចំនួន ៣០០ ខោ – អាវចំនួន ៥០ អាវ – សរុបជាប្រាក់អស់ ប្រហែល ១៤,០០០,០០០ រៀល ។
បច្ចុប្បន្ន ការិយាល័យជំនាញកំពុងតែធ្វើការកសាងសំណុំរឿងដើម្បីបញ្ជូនទៅសាលាដំបូងខេត្តបាត់ដំបងចាត់ការបន្តតាមនីតិវិធី ។
គួរបញ្ជាក់ថា សកម្មភាពឃាត់ខ្លួននេះ គឺ អនុវត្តតាមការណែនាំបញ្ជាផ្ទាល់ពី ឯកឧត្ដម ឧត្ដមសេនីយ៍ទោ សាត គឹមសាន ស្នងការ នៃស្នងការដ្ឋាននគរបាលខេត្តបាត់ដំបង ក៏ដូចជាលោកវរសេនីយ៍ឯក លឹម ពុទ្ធីឡា ស្នងការរងផែនការងារនគរបាលព្រហ្មទណ្ឌ និងមានការសម្របសម្រួលទៅលើនីតិវិធីពី ឯកឧត្ដម គឺ ប៊ុណ្ណារ៉ា ព្រះរាជអាជ្ញា នៃអយ្យការអមសាលាដំបូងខេត្តបាត់ដំបង ៕
