(ខេត្តរតនគិរី)៖ តាមសេចក្តីរាយការណ៍បានឲ្យដឹងថានៅវេលាម៉ោង ១០ និង១៥ នាទីថ្ងៃទី៩ ខែមករា ឆ្នាំ២០២១ កម្លាំងមូលដ្ឋានកងរាជវុធហត្ថស្រុកកូនមុំ និងជំនាញការិយាល័យបទល្មើសគ្រឿងញៀនកងរាជអាវុធហត្ថខេត្តរតនគិរី ដឹកនាំដោយលោក វរសេនីយ៍ត្រី រស់ វណ្ណា មេបញ្ជាការ មូលដ្ឋានកងរាជអាវុធហត្ថស្រុកកូនមុំ និងដោយមានការសម្របសម្រួលនីតិវិធីពីព្រះរាជអាជ្ញារងអមសាលាដំបូងខេត្តរតនគិរី កម្លាំងជំនាញបានចុះដល់ចំណុចកើតហេតុ នៅការដ្ឋានទី៦ក្រុមហ៊ុនហ័ងអាញ់យ៉ាឡាយ ស្ថិតនៅក្នុងភូមិ៣ ឃុំស្រែអង្គ្រង ស្រុកកូនមុំ ដោយបានឃាត់ខ្លួនជនសង្ស័យចំនួន ០១ នាក់ឈ្មោះ ភាន ចិត្ត (ហៅដេត) ភេទប្រុស អាយុ២៨ ឆ្នាំជនជាតិខ្មែរ មុខរបរមិនពិតប្រាកដស្រុកកំណើតភូមិថ្មី ឃុំឃ្សឹម ស្រុកស្នួល ខេត្តក្រចេះ មានទីលំនៅបច្ចុប្បន្នស្នាក់នៅក្នុងការដ្ឋានទី៦ ក្រុមហ៊ុនហ័ងអាញ់យ៉ាឡាយស្ថិតនៅក្នុងភូមិ៣ ឃុំស្រែអង្គ្រងស្រុកកូនមុំ។
ដល់វេលាម៉ោង១៦ និង១០នាទី ថ្ងៃខែឆ្នាំដដែល មុខសញ្ញាមេខ្លោងជួញដូរគ្រឿងញៀនបានបង្ហាញខ្លួន ភ្លាមៗកម្លាំងបានដេញតាមមុខសញ្ញាតែដោយសារភូមិសាស្ត្រស្មុគស្មាញ មុខសញ្ញាជនសង្ស័យ ០២នាក់បានបោះថ្នាំញៀនចោល និងផ្តួលម៉ូតូ រត់គេចខ្លួនចូលក្នុងព្រៃសហគមន៍បាត់។
វត្ថុតាងចាប់យករួមមាន៖
១•ម្សៅក្រាមពណ៌សថ្លាចំនួន ០៤កញ្ចប់
២•ដាវចំនួន ០៥
៣•ទូរស័ព្ទដៃចំនួន ០២គ្រឿង និងឧបករណ៍សេពគ្រឿងញៀនមួយចំនួន។
បច្ចុប្បន្នកម្លាំងជំនាញកំពុងអនុវត្តតាមនីតិវិធី។
