ខេត្តកណ្ដាល ៖នៅវេលាថ្ងៃត្រង់ ទី៤ ខែមករា ឆ្នាំ២០២១ មានការភ្ញាក់ផ្អើលយ៉ាងខ្លាំងមួយនៅមុខមន្ទីរពេទ្យសម្រាកព្យាបាល និងសម្ភព សុខ ម៉េង លោកហេង គាហុង ពាក់ផ្កាយមួយ បានដកកាំភ្លើងខ្លីវាយក្បាលសន្តិសុខម្នាក់បណ្ដាលឲ្យបែកក្បាលដួលសន្លប់ក្នុងថ្លុកឈាមគួឲ្យរន្ធត់។
លោកឧត្តមសេនីយ៍ទោ ឈឿន សុចិត្ដ ស្នងការនគរបាលខេត្តកណ្ដាល ប្រាប់ដឹង នារសៀលថ្ងៃទី៤ ខែមករា ឆ្នាំ២០២១នេះថា ដើមចមដែលនាំឲ្យមន្ដ្រីយោធា ដកកាំភ្លើងវាយក្បាលសន្ដិសុខបណ្ដាលឲ្យបែកដួលសន្លប់ក្នុងថ្លុកឈាមនេះ គឺផ្ដើមចេញពីរឿងបាត់ស្បែកជើងមួយគូរបស់ជនបង្ក ហើយជនបង្កហៅប្រធានសន្ដិសុខ មកដោះស្រាយ តែប្រធាននោះពន្យាពេលមិនព្រមមក ទើបធ្វើឲ្យជនបង្កខឹងសម្បារតែម្ដង។
លោកឧត្តមសេនីយ៍ទោ ឈឿន សុចិត្ត បានបន្តថា រហូតមកដល់ពេលនេះ កម្លាំងនគរបាលជំនាញ នៃអធិការដ្ឋាននគរបាលស្រុកអង្គស្នូល កំពុងកសាងសំណុំរឿងដើម្បីបញ្ជូនទៅកាន់សាលាដំបូងខេត្តកណ្ដាល ផ្ដន្ទាទោសតាមផ្លូវច្បាប់ជាធរមាន។
មន្ដ្រីយោធាពាក់ផ្កាយមួយ និងជាម្ចាស់មន្ទីរសម្រាកព្យបាល និងសម្ភព សុខ ម៉េង មានឈ្មោះ ហេង គាហុង ជាមន្ត្រីយោធានៅតុលាការយោធាចំណុះក្រសួងការពារជាតិ។
ជុំវិញករណីអំពើហិង្សាដែលបង្កដោយមន្ដ្រីយោធាពាក់ផ្កាយមួយនេះ ត្រូវបានមហាជន ពិសេសអ្នកប្រើប្រាស់បណ្ដាញសង្គមមានការហួសចិត្ត និងសម្ដែងនូវការខឹងសម្បារយ៉ាងខ្លាំង ដោយពួកគាត់ទទូចឲ្យស្ថាប័នមានសមត្ថកិច្ច មេត្ដាផ្ដន្ទាទោសតាមផ្លូវច្បាប់ចំពោះជនបង្កឲ្យបានម៉ឹងម៉ាត់ ព្រោះករណីនេះមិនគួរឲ្យកើតមានទាល់តែសោះនៅក្នុងសង្គម។
សូមបញ្ជាក់ថា លោកផ្កាយមួយត្រូវបានសមត្តកិច្ចស្រុកអង្គស្នួលធ្វើការឃាត់ខ្លួនបានហើយ បច្ចុប្បន្នកំពុងកសាងសំណុំរឿងតាមនិតិវិធីច្បាប់បញ្ជូនទៅកាន់សាលាដំបូងខេត្តកណ្ដាលដើម្បីផ្ដន្ទាទោស ៕
