(ខេត្តកែប)៖ តាមរបាយការណ៍ដែលទទួលបានពីរដ្ឋបាលខេត្តកែប បានឲ្យដឹងថា គិតចាប់ពីរសៀលថ្ងៃទី៣១ ខែធ្នូ ឆ្នាំ២០២០ រហូតដល់រាត្រីឆ្លងឆ្នាំសកល២០២០-២០២១ មានភ្ញៀវជាតិ-អន្តរជាតិ មកទស្សនា សម្រាក លម្ហែ កម្សាន្ត នៅខេត្តកែប ចំនួន ៥ ១.១៦៨នាក់ និងរថយន្តសរុបចំនួន៦.០២៩គ្រឿង ។
ចំនួនភ្ញៀវដ៏ច្រើននេះ បើប្រៀបធៀបជាមួយកម្លាំងសរុប និងទីតាំងកម្សាន្តដែលរដ្ឋបាលខេត្តមាន បច្ចុប្បន្ន វាពិតជាច្រើនលើសលប់ហួសពីការស្មាន ។ ដូច្នេះ ដើម្បីជៀសវាងកុំឲ្យមានករណីប្រឈមណាមួយទាក់ទិននឹងជំងឺកូវីដ១៩ អាជ្ញាធរខេត្តកែប បានជំរុញដល់មន្ត្រីគ្រប់ជំនាញត្រួតពិនិត្យនិងធ្វើការផ្សព្វផ្សាយនូវវិធានការ ការពារ ទប់ស្កាត់ កុំឲ្យមានការរីករាលដាលជំងឺកូវីដ១៩ នៅក្នុងតំបន់ទេសចរណ៍នានាទូទាំងខេត្ត។
របាយការណ៍បានបញ្ជាក់បន្ថែមទៀតថា ចំណែកនៅថ្ងៃទី០១ ខែមករា ឆ្នាំ២០២១ នេះ មានភ្ញៀវទេសចរណ៍ជាតិ-អន្តរជាតិមកលម្ហែ កម្សាន្ត សរុបចំនួន១២.៣៩១នាក់ ក្នុងនោះភ្ញៀវជាតិមានចំនួន ១២.៣៥៤នាក់ ភ្ញៀវអន្តរជាតិចំនួន៣៧នាក់ និងមានរថយន្តសរុបចំនួន១.៣៨៧គ្រឿង៕
