ដោយអនុវត្តន៍តាមការណែនាំបញ្ជាផ្ទាល់ពីឯកឧត្ដមឧត្ដមសេនីយ៍ទោ សាត គឹមសានស្នងការ នៃស្នងការដ្ឋាននគរបាលខេត្តបាត់ដំបង ក៏ដូចជាលោកវរសេនីយ៍ឯក លឹមពុទ្ធីឡា ស្នងការរងផែនការងារនគរបាលព្រហ្មទណ្ឌ និងមានការសម្របសម្រួលទៅលើនីតិវិធីពី ឯកឧត្ដម គឺ ប៊ុណ្ណារ៉ា ព្រះរាជអាជ្ញា នៃអយ្យការអមសាលាដំបូងខេត្តបាត់ដំបងនៅថ្ងៃទី៣០ ខែធ្នូ ឆ្នាំ២០២០ វេលាម៉ោង១១:៤០នាទីនៅចំណុចភូមិស្តីលើឃុំព្រែកហ្លួងស្រុកឯកភ្នំ ខេត្តបាត់ដំបង លោកវរសេនីយ៍ឯក ឈឿង គឹមសុងនាយការិយាល័យនគរបាលព្រហ្មទណ្ឌកម្រិតស្រាល បានដឹកនាំកម្លាំងជំនាញសហការជាមួយកម្លាំងក្រុមអន្តរាគមន៍បង្ការបង្ក្រាប ចុះប្រតិបត្តិការបង្ក្រាបករណីហិង្សាដោយចេតនា មានស្ថានទម្ងន់ទោស និងធ្វើអោយខូចខាតដោយចេតនា (កាប់នឹងកាំបិត គប់ដុំថ្ម និងកាប់ម៉ូតូ) ០១ ករណី និងបានធ្វើការនាំខ្លួនជនសង្ស័យ ០១ នាក់ឈ្មោះសល់សាន់ហៅតឿភេទប្រុសអាយុ ១៨ ឆ្នាំមានទីលំនៅភូមិស្តីលើឃុំព្រែកហ្លួងស្រុកឯកភ្នំខេត្តបាត់ដំបងមកកាន់ស្នងការដ្ឋានដើម្បីធ្វើការសាកសួរ ។
តាមចម្លើយសារភាពរបស់ជនសង្ស័យឈ្មោះ សល់ សាន់ ហៅ តឿ បានឆ្លើយសារភាពថាខ្លួនរួមទាំងបក្សពួកចំនួន០៣នាក់ទៀត ដែលមានឈ្មោះភឿន, និងឈ្មោះថៃបានធ្វើសកម្មភាពដេញកាប់ទៅលើជនរងគ្រោះឈ្មោះ សុខ រ៉ានីឆា ភេទប្រុសអាយុ១៥ ឆ្នាំ មានទីលំនៅភូមិកាប់គោថ្មី សង្កាត់អូរចារ ក្រុងបាត់ដំបង ខេត្តបាត់ដំបងបណ្តាលឲ្យរងរបួសមុតរយះចេញឈាមត្រង់សៀតផ្កាខាងឆ្វេង និងមុតរយះត្រង់ខ្នងខាងឆ្វេង ព្រមទាំងខូចខាតម៉ូតូ០១គ្រឿង ម៉ាកហុងដាឌ្រីមសេ១២៥ ពណ៌ខ្មៅស៊េរីឆ្នាំ២០១៩ ត្រង់អាវម៉ូតូខាងមុខកុងទ័រ និងក្បាលម៉ូតូកាលពីថ្ងៃទី២៦ ខែធ្នូ ឆ្នាំ២០២០វេលាម៉ោង១៧:០០នាទី នៅចំណុចភូមិវត្តលៀប សង្កាត់ចំការសំរោង ក្រុងបាត់ដំបងខេត្តបាត់ដំបង ពិតប្រាកដមែនដោយមូលហេតុ ខឹងជនរងគ្រោះស្រលាញ់អតីតសង្សាររបស់ខ្លួន ។ ចំណែកបក្សពួករបស់ខ្លួនចំនួន ០២ នាក់ទៀត កំពុងតែរត់គេចខ្លូន។
បច្ចុប្បន្ន ការិយាល័យជំនាញកំពុងតែធ្វើការស្រាវជ្រាវបន្តតាមចាប់ខ្លួនជនសង្ស័យចំនួន០២នាក់ទៀត និងកសាងសំណុំរឿង ដើម្បីបញ្ជូនទៅសាលាដំបូងខេត្តបាត់ដំបងចាត់ការបន្តតាមនីតិវិធី ៕
