កែប៖ មកទល់នឹងពេលនេះ សមត្ថកិច្ចខេត្តកែប កំពុងស្វែងរកចាប់ខ្លួនអតីតអភិបាលរងខេត្តកែប គឺលោក ភូ លិ ពាក់ព័ន្ធករណីអំពើហិង្សា និងបៀតបៀនកេរ្តិ៍ខ្មាស់លើស្ត្រី ២រូប កាលពីពេលថ្មីៗកន្លងទៅនេះ។
លោក ប៉ូង សុខេង ស្នងការរងនគរបាលខេត្តកែប ទទួលបន្ទុកផ្នែកព្រហ្មទណ្ឌ បានបញ្ជាក់ថា ពេលនេះកម្លាំងសមត្ថកិច្ចកំពុងស៊ើបស្វែងរកអតីតអភិបាលរងខេត្តកែប ដែលបានប្រើអំពើហិង្សាធ្ងន់ធ្ងរ និងបៀតបៀនកេរ្តិ៍ខ្មាសទៅលើស្ត្រីខ្មែរជាមន្ត្រីសាខាពន្ធដារខេត្តកែប។ អំពើហិង្សារបស់លោក ភូ លិ បណ្តាលឲ្យស្ត្រីជាប្រធានការិយាល័យ នៃសាខាពន្ធដារខេត្តកែប ត្រូវរបួសធ្ងន់ធ្ងរ ហើយពេលបញ្ជូនទៅសង្គ្រោះបន្ទាន់ ត្រូវគ្រូពេទ្យដេររបួសដល់ទៅ១៦ថ្នេរ។ រីឯស្ត្រីជាមន្ត្រីពន្ធដារម្នាក់ទៀត ក៏រងការបៀតបៀនពីលោក ភូ លិ ដែរ។ នេះបើតាមព័ត៌មានក្នុងញត្តិរបស់អគ្គនាយកដ្ឋានពន្ធដារ។
អំពើហិង្សានេះកើតឡើងក្នុងពិធីជប់លៀងឡើងតំ ណែងប្រធានថ្មី នៃមន្ទីរបរិស្ថានខេត្តកែបកាលពីយប់ថ្ងៃ ទី២៩ ខែធ្នូ ឆ្នាំ២០២២។ ភ្លាមៗគឺនៅថ្ងៃទី៣១ ខែធ្នូលោកត្រូវបានប្រមុខរដ្ឋាភិបាលសម្រេចបណ្ដេញចេញពីតំណែង។
ប្រភពពីមន្ត្រីរាជការក៏ដូចជាប្រជាពលរដ្ឋនៅខេត្តកែបមើលឃើញថា ប្រសិនបើសមត្ថកិច្ចមិនដុតដៃដុតជើងឲ្យខ្លាំងក្លាទេនោះ លោក ភូ លិ អាចនឹងរួចផុតពីសំណាញ់ច្បាប់នៅគ្រាដែលប្រជាពលរដ្ឋរិះគន់ទង្វើរបស់លោក ក្នុងនាមជាអ្នកដឹកនាំខេត្តមួយរូបប៉ុន្តែអត្តចរិតមិនថ្លៃថ្នូរ៕
