បាត់ដំបង ៖ កម្លាំងនគរបាលស្រុកសំពៅលូន ឃាតខ្លួនមនុស្សចំនួន០៨នាក់ ករណីសង្ស័យមានជាប់ពាក់ព័ន្ធនឹងការជូញដូរគ្រៀងញៀនល្មើសច្បាប់ ត្រូវបានកម្លាំងសមត្ថកិច្ចឃាត់ខ្លួនជាបន្តបន្ទាប់ ជាមួយនឹងវត្ថុតាង «គ្រឿងញៀន» ជាច្រើនកញ្ចប់ផង កាលពីរសៀលថ្ងៃទី ៣០ មិថុនា នៅ០២ទីតាំងផ្សេងគ្នា ក្នុងឃុំសន្តិភាព ស្រុកសំពៅលូន ។
តាមរយៈរបាយការណ៍អធិការស្រុកសំពៅលូន លោក ទឹម វិឆ័យ បានឲ្យដឹងថា ក្រុមមន្ត្រីជំនាញរបស់លោកបានចុះបង្ក្រាប និងឃាត់ខ្លួនជនសង្ស័យមួយក្រុមនេះ នៅពេលចេញល្បាតនៅតាមភូមិសាស្ត្រក្នុងស្រុកសំពៅលូន ។ ជាមួយនឹងការឃាត់ខ្លួន មន្ត្រីជំនាញបានត្រូតពិនិត្យ និងឆែកឆេររកឃើញថ្នាំញៀនជាច្រើនថង់ និងគ្រាប់ រួមជាមួយនឹងសម្ភារពាក់ព័ន្ធមួយចំនួនទៀត ដែលពួកគេរក្សាទុកជាប់ខ្លួន និងលាក់ទុកនៅក្នុងផ្ទះ ។
នៅក្នុងរបាយការណ៍ដដែល ក្រុមជនសង្ស័យទាំង០៨នាក់រួមមាន៖ ១-ឈ្មោះ នាក់ នី ភេទស្រី អាយុ៣៨ឆ្នាំ ២-ឈ្មោះ មិត្ត ឡាត់ អាយុ២៨ឆ្នាំ ៣-ឈ្មោះ កេត វល្លិល័ក្ខ ភេទប្រុស អាយុ៥៥ឆ្នាំ ៤-ឈ្មោះ ឌឿន សុខឈាង ភេទប្រុស អាយុ២៥ឆ្នាំ ៥-ឈ្មោះ សឹម ឌីណា ភេទប្រុស អាយុ៣៤ឆ្នាំ ៦-ឈ្មោះ កែវ ភ័ក្រ ភេទប្រុស អាយុ២៦ឆ្នាំ ៧-ឈ្មោះ ទុំ ទិត្យ ភេទប្រុស អាយុ៣៨ឆ្នាំ និង៨-ឈ្មោះ យុន ធឿន ភេទប្រុស អាយុ៤២ឆ្នាំ ពួកគេជាអ្នកស្រុកសំពៅលូនតែម្ដង ។
តាមរបាយការណ៍ដដែល លោក ទឹម វិឆ័យ បាននិយាយថា ជនសង្ស័យ០២នាក់ ឈ្មោះ ទុំ ទិត្យ និងឈ្មោះ យុន ធឿន នេះ ត្រូវបានកម្លាំងរបស់លោកធ្វើការឃាត់ខ្លួនចុងក្រោយក្នុងថ្ងៃដដែល ដោយយោងតាមចម្លើយសារភាពរបស់ជនសង្ស័យចំនួន០៦នាក់ខាងលើ ដែលឃាត់ខ្លួនលើកដំបូងក្រោមបទបញ្ជាផ្ទាល់ពីលោកស្នងការខេត្ត និងលោកព្រះរាជអាជ្ញា ។
ជាមួយនឹងការឃាត់ខ្លួនក្រុមជនសង្ស័យសរុបចំនួន០៨នាក់មន្ត្រីជំនាញដកហូតវត្ថុតាងបានរួមមាន៖ ១-ម្សៅក្រាមពណ៌.សថ្លា (ម៉ាទឹកកក) ចំនួន១៣ថង់ និងមួយចំនួនច្រកទុកក្នុងទុយោ ២-ប្រភេទថ្នាំគ្រាប់ពណ៌ផ្កាឈូកមានអក្សរ «WY» ចំនួន៤៨គ្រាប់ និងពណ៌បៃតង០១គ្រាប់ ៣-ជញ្ជីងសម្រាប់ថ្លឹងគ្រឿងញៀនចំនួន០១គ្រឿង ៤-សម្ភារសម្រាប់ប្រើប្រាស និងសម្រាប់វិចខ្ចប់មួយចំនួន ៥-កាំបិតច្រើនប្រភេទចំនួន០៧ដើម ៦-ម៉ូតូ០១គ្រឿងជាមធ្យោបាយសម្រាប់ជិះប្រព្រឹត្តបទល្មើស និងសម្ភារពាក់ព័ន្ធមួយចំនួនទៀត ។
បើយោមតាមចម្លើយសារភាពរបស់ក្រុមជនសង្ស័យចំនួន០៦នាក់លើកដំបូង ជនសង្ស័យ០២នាក់ឈ្មោះ ទុំ ទិត្យ និងឈ្មោះ យុន ធឿន អាចជាមេនាំអាទ៌ឲ្យមានការប្រព្រព្រឹត្តបទល្មើសគ្រឿងញៀននេះ ។ ព្រោះបើតាមរបាយការណ៍សមត្ថកិច្ច ជនទាំង០២នាក់នេះ ត្រូវមន្ត្រីជំនាញឆែកឆេរផ្ទះរកឃើញគ្រឿងញៀនច្រើនជាងគេរហូតដល់ចំនួន១២កញ្ចប់មាន ។
លោក ទឹម វិឆ័យ បានបញ្ជាក់ថា ក្រោយបញ្ចប់ការសួរនាំតាមនីតិវិធី ជនសង្ស័យប្រុស ស្រី ទាំង០៨នាក់ជាមួយនឹងវត្ថុតាង ត្រូវបានលោកស្នងការខេត្តបញ្ជាឲ្យបញ្ជូនពួកគេទៅកាន់ការិយាល័យជំនាញនៃស្នងការខេត្តហើយ ដើម្បីចាត់ការបន្តតាមនីតិវិធី ៕
