(បន្ទាយមានជ័យ)៖ អគ្គិភ័យដ៏សន្ធោសន្ធៅមួយ បាននិងកំពុងឆាបឆេះកាស៊ីណូហ្គ្រេនដាយមិន កណ្តាលក្រុងប៉ោយប៉ែត ខេត្តបន្ទាយមានជ័យ។
លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ បានឱ្យដឹងថា អគ្គិភ័យនេះ បានកើតមានតាំងពីវេលាម៉ោង ១១៖៣០នាទីយប់ថ្ងៃទី២៨ ខែធ្នូ ហើយរហូតដល់ទៀបភ្លឺថ្ងៃទី២៩ ខែធ្នូនេះ មិនទាន់រលត់នៅឡើយទេ។
លោកស្នងការ បានឱ្យដឹងថា កម្លាំងសមត្ថកិច្ចចម្រុះប្រមាណ ៣០០នាក់ និងរថយន្តពន្លត់អគ្គីភ័យ ១១គ្រឿង កំពុងប្រតិបត្តិការនៅកន្លែងកើតហេតុ។ តែដោយសារទីតាំងខ្ពស់ ចង្អៀត ទំហំភ្លើងឆេះរាលដាលពាសពេញទីតាំង ទើបធ្វើឱ្យប្រតិបត្តិការពន្លត់ជួបការលំបាក ហើយមិនទាន់អាចពន្លត់បាន។
លោកទេសរដ្ឋមន្ត្រី គន់ គីម អនុប្រធានគណៈកម្មាធិការជាតិគ្រប់គ្រងគ្រោះមហន្តរាយ បានប្រាប់សារព័ត៌មាន ថា បុគ្គលិកបម្រើការងារនៅក្នុងកាស៊ីណូជាច្រើននាក់ ត្រូវបានគេជម្លៀសមកលើដំបូងអគារ។ ពេលនេះលោកបានបញ្ជូនឧទ្ធម្ភាគចក្រ និងកងកម្លាំងកុម្មង់ដូចុះទៅកន្លែងកើតហេតុ ដើម្បីជម្លៀសបុគ្គលិកចេញពីដំបូលអគារ ។ លោកទេសរដ្ឋមន្ត្រី បានគូសបញ្ជាក់ថា រហូតមកដល់ពេលនេះ មិនទាន់ព័ត៌មានពាក់ព័ន្ធការស្លាប់ ឬរងរបួសក្នុងហេតុការណ៍នៅឡើយទេ។
ជាមួយគ្នានេះ កម្លាំងអន្តរាគមន៍កងប្រតិបត្តិការរុករក និងសង្គ្រោះគ្រោះមហន្តរាយ៧១១ កងពលតូចលេខ៧០ ឡើងឧទ្ធម្ភាគចក្រឆ្ពោះកន្លែងកើតហេតុនៅទីក្រុងប៉ោយប៉ែត ដើម្បីជួយសង្គ្រោះផងដែរ៕
