(ភ្នំពេញ)៖ លោក យូ សិរីវុឌ្ឍ ក្រុមការងារពិសេសរបស់សម្តេចតេជោ ហ៊ុន សែន ប្រធានគណបក្សប្រជាជនកម្ពុជា និងលោក ភឺន ផល្លា ជំនួយការសម្តេចតេជោ ហ៊ុន សែន ប្រធានគណបក្សប្រជាជនកម្ពុជា បានជួបសំណេះសំណាល ព្រមទាំងស្រស់ស្រូបអាហារសាមគ្គី ជាមួយអ្នកសារព័ត៌មានប្រមាណ ២០០នាក់។
ក្នុងជំនួបសំណេះសំណាល និងស្រស់ស្រូបអាហារសាមគ្គីនៅរាត្រីថ្ងៃទី១៧ ខែធ្នូ ឆ្នាំ២០២២នេះ លោក យូ សិរីវុឌ្ឍ បានថ្លែងអំណរគុណដល់អ្នកសារព័ត៌មាន ដែលបានប្រឹងប្រែងយកចិត្តទុកដាក់ក្នុងការផ្សព្វផ្សាយបង្ហាញព្រឹត្តិការណ៍នានានៅក្នុងសង្គមកម្ពុជា។
សម្រាប់លោក យូ សិរីវុឌ្ឍ អ្នកសារព័ត៌មាន និងប្រព័ន្ធផ្សព្វផ្សាយ បានដើរតួនាទីយ៉ាងសំខាន់បំផុតសម្រាប់ជាកញ្ចក់ឆ្លុះបង្ហាញនូវតថភាពពិតក្នុងសង្គម ហើយក៏ជាកញ្ចក់ជួយកែលំអរការផ្តល់សេវាសាធារណៈឱ្យបានកាន់តែប្រសើរ។ កាន់តែពិសេសទៀតនោះ សារព័ត៌មានដើរតួនាទីសំខាន់ក្នុងការរួមចំណែកថែរក្សាសន្តិសុខសណ្តាប់ធ្នាប់សង្គម បញ្ចៀសចលនាទុច្ចរិតទាំងឡាយ ដែលចង់បង្កភាពចលាចលក្នុងសង្គម ឬចង់បំផ្លាញសុខសន្តិភាព។
លោក យូ សិរីវុឌ្ឍ បានលើកទឹកចិត្តដល់អ្នកសារព័ត៌មានទាំងអស់ ឱ្យបន្តប្រឹងប្រែងបំពេញការងាររបស់ខ្លួនឈរលើភាពសុច្ចរិត ផ្សាយការពិតប្រកបដោយក្រមសីលធម៌ វិជ្ជាជីវៈ ដោយគោរពតាមអនុសាសន៍របស់សម្តេចតេជោ «កុំបំពានសិទ្ធិអ្នកដទៃ កុំបំភ្លៃការពិត»។
លោក យូ សិរីវុឌ្ឍ ក៏បានលើកទឹកចិត្តឱ្យអ្នកសារព័ត៌មានរួមគ្នាប្រឆាំងនឹងព័ត៌មានក្លែងក្លាយ ព័ត៌មានទុច្ចរិត ដោយផ្សាយត្រឡប់នូវសភាពពិតរបស់កម្ពុជា ដើម្បីរក្សាបាននូវសន្តិសុខសណ្តាប់ធ្នាប់ និងសុខសន្តិភាពក្នុងសង្គមកម្ពុជា៕
